Eksodha 12:50 - Bhiblia Yo Sawuleka

⁵⁰ Se votshe vanana va ka Israyeli va to maha, nga ti Mkoma a nga ti leletisile tona ka Mosi ni Aroni.

Eksodha 12:50 Referans Kwoze

Mtuletelo 22:15

Ti na sala hahanze timbwa, vasalamusi, vamahi va wugelegele, vadayi va vathu, vakhozeli va si i ku si nga Txizimu ni votshe va va dhundako mwendo va hanyako ngu makuhu.

Johani 15:14

Anu mi vangana vangu, ngako mi txi maha totshe ti ni mi rumako.

Johani 13:17

Ngako mi txi tiziva tiya ni ku ti thuma, mi katekile.”

Johani 2:5

Se Mame wakwe a to gela sithumi, a txi khene: “Mahani totshe ti a no mi gela.”

Matewu 28:20

mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo, kala kugumani ka mafu.”

Dhewuteronome 12:32

U na xayisa totshe ti ni no kuruma; u nga engetele txilo, hambi kuhungula.

Eksodha 12:41

Ka ditshiku di ku nga ti guma 430 wa malembe, mabutho a tiyimbi ta Mkoma ma manekile ma txi huma ditikoni ka Egipta.

Eksodha 7:4

Faro koko kha na mbi mi engisa; hambi ka toneto ani ni na veka dianza dangu txitimwi ka Egipta, nina humisa mabutho angu mu ditikoni ka Egipta, vona vathu vangu, vanana va ka Israyeli, ngu sitsayiso sa hombe.

Eksodha 6:26

Aroni ni Mosi, ngu vale Txizimu txi nga womba kwawe txi txi kha txona: Humisani vanana va ka Israyeli ditikoni ka Egipta, ngu mabutho awe a tiyimbi.

Vahebheru 11:27

Ngu likholo, a humile Egipta, asi thavi kuhenyelwa ngu mfumeli. Se ene a to tsana e lamba nga wo wona awule asi wonekiko.

Eksodha 12:49

Ku nava ni mlayo wumwewo dwe ka wu i ku lihunzu la ka kwanu, ni ka wule i ku mluveli wu mi hanyako kumweko nayo.”

Eksodha 12:51

Ka ditshiku donedo Mkoma a humisile vanana va ka Israyeli ditikoni ka Egipta, ngu mthetho wa mabutho awe.

Mitengo 3:51

Se Mosi e ninga Aroni ni vanana vakwe, male yo tirulisa ngu yona, madingano ni kuruma ka Mkoma, nga ti Mkoma a nga wombisa tona ka Mosi.

Mitengo 5:4

Sekoko, vanana va ka Israyeli va to maha toneto: Va to va humisa hahanze ka wugovelo. Vanana va ka Israyeli va mahile nga ti Mkoma a nga ti leletisile tona ka Mosi.

Mitengo 8:19

Kha ditshuri ni ningete Valevhi ka Aroni ni ka vanana vakwe, ti to ve maha mthumo wa vanana va ka Israyeli, amu ka ditenda da msengeletano, ni ti to ve maha mphaxo wa midiho ya vanana va ka Israyeli, kasi ku si dhuki kuhuma phango hagari ka vanana va ka Israyeli, mbimo yi va tshuketako hafuhi ka wukhalo wo sawuleka.

Mitengo 8:20

Se Mosi ni Aroni, ni wotshe msengeletano wa vanana va ka Israyeli, ni Valevhi, madingano ni ti Mosi a nga leletwa ngu Mkoma.

Mitengo 8:22

Msana keto, Valevhi va to ta ve ta maha mthumo wawe, amu ka ditenda da msengeletano, masoni ka Aroni ni masoni ka vanana vakwe, madingano ni ti Mkoma a nga leleta ka Mosi, ngu didhawa da Valevhi, ngu toneto va nga mahelwa tona.

Mitengo 9:5

Sekoko va yi xayisile Pasika amu txiwulani txa Sinayi, amu ka ditshiku da digumi ni mune ka mtxima wo khata, ni minova. Vanana va ka Israyeli va to maha totshe ti Mkoma a nga leleta ka Mosi.

Mitengo 36:10

Vanana vamahorana va Zelofeyadhi, va mahisile tona ti Mkoma a nga rumisa tona ka Mosi.