Eksodha 11:10 - Bhiblia Yo Sawuleka

¹⁰ Mosi ni Aroni va mahetete sidiwukiso sotshe masoni ka Faro. Aniko Mkoma a bangisile mbilu ya Faro, e va lambela kuleka vanana va ka Israyeli va txi tsula, va txi huma ditikoni kwakwe.

Eksodha 11:10 Referans Kwoze

Eksodha 4:21

Se Mkoma a to khene ka Mosi: “Ngako u txi tshumela uya ditikoni ka Egipta, alakanya kuya maha ka Faro sotshe sixamaliso si ni nga si veka manzani kwako; aniko ani ni na bangisa mbilu yakwe ti to asi leki vathu ve huma ve tsula.”

Eksodha 10:27

Kambe Mkoma Txizimu txi bangisile kambe mbilu ya Faro, aha ko ene kha tumela ku va leka va txi tsula.

Eksodha 10:20

Kambe Mkoma a to bangisa mbilu ya Faro, aha ko kha sikota kuleka vanana va ka Israyeli ve tsula.

Varoma 9:22

Hi na khathu txani ngako Txizimu txi txi lava kukombisa kuhenya ka txona ni kuzivisa mtamo wa txona? Txizimu txi vile ni kutimisela ngutu ka vale va nga ti fanela kuhenyelwa ngu txona, avale va nga ti lulamisetwe kufuviswa.

Jobe 9:4

Txizimu txi ni wutxhari mbiluni, txona i nyamitamo ngutu; i mani a nga ti bangisa ka txona, e mana kuthutha kani?

1 Samuwele 6:6

Mi ndi na bangisela txani koko timbilu tanu, kufana ni Vaegipta ni Faro va nga bangisa timbilu tawe kani? Ina msana kova va di va xanisile ngutu, kha va va leka ve tsula, vona kha va tsula kani?

Dhewuteronome 2:30

Aniko Seyoni, mfumeli wa Hesibhoni, kha hi tumelela ti to hi pinda ngu ditikoni kwakwe, nguko Mkoma, Txizimu txako, a hangalasile moya wakwe ni mbilu yakwe, kasi ku e mningela manzani kwako, nga ti ti nga maheka kala ni nyamsi.

Johani 12:40

“A phumisile maso awe e bangisa timbilu tawe, kasiku va si woni ngu maso, ni ku va si pimi ngu timbilu tawe, kufela ku va si hunduluki, nani ni si va hanyisi.”

Varoma 9:18

Ngu toneto, Txizimu txi mahela wumbilu awule txi ti lavako ku mmahela, txi bangisa mbilu ya wule txona txi ti lavako ku m'bangisa.

Eksodha 7:3

Aniko ani koko, ni na bangisa mbilu ya Faro, kambe ni na andisa mu ditikoni ka Egipta sikombiso sangu ni sidiwukiso sangu.

Eksodha 9:12

Kambe Mkoma a bangisile mbilu ya Faro, se ene kha nga va engisa, nga ti Mkoma a nga ti wombisile tona ka Mosi.

Eksodha 12:1

Ditikoni ka Egipta, Mkoma a wombile ka Mosi ni ka Aroni, a txi khene:

Joxuwa 11:20

Nguko Mkoma ngene a nga bangisa timbilu ta vathu vale, ti to ve huma va txi yalwa ni Israyeli, kasi ku a txi va lovisa do gwita, asi va tsetsi, aniko e va lovisa votshe, nga tile Mkoma a nga leleta ka Mosi.

Isaya 63:17

Ngu kutxani, awe Mkoma u hi mahako hi hambuka ka tinzila tako kani? U bangisela txani timbilu tathu kuva hi si ku thavi kani? Wuyisa tihunzu ta thomba yako, ngu kuranda sithumi sako.

Eksodha 3:19

Ani na tiziva ti to Faro, mfumeli wa Egipta, kha na mbi mi leka mi txi tsula, hahanze ko kurumetwa ngu dianza da mtamo.