Eksodha 10:3 - Bhiblia Yo Sawuleka

³ Se Mosi ni Aroni, va yite kambe ka Faro, va txi ya m'gela tiya: “Mkoma, Txizimu txa Vahebheru, a khene: U na gwita mbimo muni kukaneta u si ti veki hahatshi masoni kwangu kani? Leka vathu vangu ve huma, kasi va txi ya ni khozela.

Eksodha 10:3 Referans Kwoze

1 Pedro 5:6

Ngu konaho, ti vekeni hahatshi ka diwoko da mtamo, da Txizimu, kasi ku txona, txi nata mi guleta ka mbimo yi yi lavekako.

Jakobe 4:10

Ti vekeni hahatshi masoni ka Mkoma, se ene a na mi guleta.

1 Vafumeli 21:29

Khwa ti wona taku Akabe wa ti namisa masoni kwangu kani? Ngako koko a ti namisako masoni kwangu, kha ni na mbi tisa kubiha kuwa ka masiku a kuhanya kwakwe, aniko ni na tisa wubihi wuwa ka masiku a kuhanya ka mwanana wakwe, nyumbani kwakwe.

Vahebheru 12:25

Ti woneleni ti to mi si lambi kuengisa wu a wombawombako. Nguko, akuwa va nga mbi huluka kutsayiswani avale va nga lamba kuengisa awule a nga ti va kawuka ha mafuni, ngutu-ngutu athu kha hi na mbi huluka, ngako hi txi lamba kuengisa awu a hi kawukako a di nzumani.

Varoma 2:4

Mwendo wo kanyisa kutala ka wunene wa Txizimu, ni kutimisela ka txona, ni kuhonisela ka txona; khu ti zivi ti to wunene wuwa wa Txizimu wu ku ndindela kuya kuhundulukani kani?

Jeremiya 13:18

Gela mfumeli ni mame wa mfumeli, u txi khawe: Ti namiseni, mi txi khalahatsha, nguko mbhoti wa wukoma wanu wu wite, i ku txona txiningo txanu txa mfumo.

Ezekhiyele 5:6

Ene koko, valamuli vangu a va onhisile ngutu kupinda matiko, ni sileleto sangu kupinda matiko ale ma nga mrandela; nguko va lambile wulamuli wangu, kambe kha va londisa silayelo sangu.

Jeremiya 13:10

Ditiko diya do biha, adi di si tumeliko kupfa mapswi angu, adi di tsimbilako ngu kubanga ka mbilu ya dona, di txi londetela simwani sizimu, di txi si thumela ni ku si khozela, di na fana ni libhandi li li si vhuniko txilo.

Isaya 2:11

Maso a vathu vo ti kulisa ma na pfhupeliswa, ni kutikulisa ka vavamna ku na vekwa hahatshi, Mkoma ngene dwe a no dhumiswa ka ditshiku donado.

Isaya 1:5

Ngu kutxani mi no tsayiswa, nga kusimama miya masoni ngu kueyisa kani? Wotshe msungo wa lwala, ni yotshe mbilu yi pandisekile.

Mavingu 18:12

Mbilu ya m'thu ya ti guleta na ku si se hoka kufuviswa kwakwe; ku khata ti veke hahatshi, se kudhundeka ku nata.

Mavingu 1:24

Ani ni mi dhani, aniko anu mi lambile; nguko ni nawulutile diwoko dangu, aniko kha ka maneka wo pfisisa;

Mavingu 1:22

Anu siphukuphuku, mi na randa wuphukuphuku wanu kala yihi mbimo kani? Ni nanu vatseketseli, mi na randa kutseketsela kani? Se anu siphukuphuku mi na venga wuzivi kani?

Jobe 42:6

Ngu mhaka yeto, na ti sola, ni kutilaya, ni di mu ka lithulu ni mu ka dikhuma.

2 Makronika 34:27

A ku u nga dhukiswa mbiluni kwako, u ti veka hahatshi masoni ka Txizimu, mbimo yi u nga pfa mapswi akwe madingano ni wukhalo wuwa ni vathu va kona, u txi ti veka hahatshi, u vharulela ni syambalo sako, u dila masoni kwangu, ani ni ku pfite, kuwomba Mkoma.

2 Makronika 33:19

Se mkombelo wakwe, ni ti Txizimu txi nga wu amukelisa tona, ni sotshe sionho sakwe, ni wubihi wakwe, ni makhalo o guleka ale a nga aka e veka ni sithombe sawe so vatwa, na a sanzi kutiveka hahatshi, wonani ti to totshe ti bhatwe ka mabhuku a vahuti.

2 Makronika 33:12

Se ene a di pandisekile, a to khongela masoni ka Mkoma Txizimu txakwe, e ti veka hahatshi ngutu masoni ka Txizimu txa vatate vakwe,

1 Vafumeli 18:21

Sekoko, Elija a to tshuketa hafuhi ka votshe vathu a txi khene: Mi na khwita hagari ka mipimiso yimbidi kala yihi mbimo kani? Ngako Mkoma i di Txizimu mlondiseleni; ni loku i di Bhahali, mlondiseleni. Hambi keto, vathu kha va mxamula txilo.

Mitengo 14:27

“Kasi ngu yihi mbimo ni no gwita kutimisela ngu msengeletano wuwa wo biha nga tiya kani? Va na ngungurukela kala mbimo muni kani? Ani ni pfite kusura ka vanana va ka Israyeli, ava va ni mahelako gujeguje tinzeveni kwangu.

Eksodha 16:28

Sekoko Mkoma a to khene ka Mosi: “Mi na lamba kuvekisa sirumo sangu ni mithetho yangu kala mbimo muni kani?

Eksodha 9:17

Awe u ngadi u txi ti guleta u txi wukela vathu vangu, u txi lamba ku va leka ve tsula kani?

2 Makronika 7:14

Ngako vathu vangu, avale va dhanwako ngu ditina dangu, va txi ti sola, ve khongela, ve leka tinzila tawe to biha, ani ni na va engisa ni di nzumani, ni va divalela sionho sawe, ni holisa ditiko dawe.

Eksodha 4:23

Ani ni kugete ti to khani: Leka mwanana wangu wa matiwula a txi tsula, kasiku a txi ya ni thumela! Aniko ngako u txi lamba ku mleka a txi tsula, ani ni na daya mwanana wako wa matiwula.

Eksodha 10:4

Ngako u txi simama u lamba, u si leki vathu vangu ve huma, wona taku mangwana ni na tisa humbi kotshe ditikoni kwako.

2 Vafumeli 22:19

Ngako mbilu yako yi nga rawula, u ti namisa masoni ka Mkoma, mbimo yile u nga engisa ni txi henya ngu wukhalo wuwa, ni vazumbi va kona, va ti dingana kufuviswa ni kuve txiruko, u vharulete syambalo sako, u dite masoni kwangu, kambe ni ku engisile, kuwomba Mkoma.

Jeremiya 50:29

Bhabhilona mu rambeleni vamatiko votshe va va dombako malaho; vekani mazumbo anu madhawani kwakwe, ku nga huluke ni wammweyo; a na tshumetelwe madingano ni mthumo wakwe, nga tona tile a nga maha, mmaheleni toneto, nguko a wukete Mkoma ngu ku ti gwilikisa, a wukete wo Sawuleka wa Israyeli.

Dhaniyeli 5:22

Se awe mwanana wa kona Bhelxazari, khwa ti veka hahatshi, hambi ku u nga ziva mhaka yotshe.

Eksodha 5:1

Ngu msana ka totshe Mosi ni Aroni va to tsula va txi ya wonana ni Faro, va txi ya kha vona: “Mkoma, Txizimu txa ka Israyeli, a womba tiya: Leka vathu vangu ve tsula, kasiku va txi ya ni mahela m'buso txiwulani.”