Ekleziyaste 2:3 - Bhiblia Yo Sawuleka

³ Ni to lava kuziva mbiluni kwangu tito, ni nga pfanisa kutxani ni vhinya (kambe na ni txi thumisa mbilu yangu ngu wutxhari), ni ti ni ndi no xayisisa tona wuphukuphuku, kala kuza ni wona ti ti no va ta txhuko, kasi ku vanana va vathu va txi ti maha, hahatshi ka nzuma, mndani ka mtengo wa masiku a kuhanya kwawe.

Ekleziyaste 2:3 Referans Kwoze

Mavingu 20:1

Vhinya mtseketseli, ni wusuke wu vangisa diguwa; ni wihi wule a ti ningetetelako ka wona, kha na mbi maha wo txhariha.

Ekleziyaste 1:17

Se ni to ningetetela mbilu yangu kuziva wutxhari, ni kuziva lihuhe ni wuphukuphuku, se ni wona taku, eto ni tona ngu xanisa moya.

Vaefesu 5:18

Se mi nga leveni ngu vhinya, ayi ka yona ku ku ni mazunga, aniko talani ngu Moya;

Ekleziyaste 12:13

Ka totshe ti u nga tipfa, magwito a tona ngu awa: Thava Txizimu, u xayisa milayo ya txona; nguko ayiya ngu yona fanelo ya votshe vathu.

Ekleziyaste 6:12

Nguko i mani a zivako ti i ku ta tinene kuhanyani ka m'thu, ka otshe masiku a wukanganyisi wakwe, ale ma pindako kufana ni mtsundi kani? Nguko i mani a nga zivisako ka m'thu, tile ti no humelela hahatshi ka ditambo msana kwakwe kani?

Matewu 6:24

“Ku walo m'thu wu a sikotako kuthumela vakoma vambidi, nguko mwendo a na vengela mmweyo e dhunda mmwani, mwendo a na namarela ka mmweyo e kanyisa mmwani. Kha mi na kusikota kuthumela Txizimu ni thomba ya mafu.”

Ekleziyaste 7:25

Ni to tshumela ni ningetetela mbilu yangu ka kuziva, ni kuxolisisa, ni kulava wutxhari, ni ditshuri, ni kuziva wuphukuphuku wa kubiha, ni ti to wuphukuphuku ngu xanga.

Ekleziyaste 7:18

Ndinene ku u txi ti veketa eto, kambe u nga thavise dianza dako ka tona; nguko awule a thavako Txizimu wa huluka ka totshe eto.

Ekleziyaste 2:24

Ina hi nga ta tinene ku m'thu edya, e sela, e tsakisa mbilu yakwe, ngu mthumo wakwe kani? Ni woni ti to eto ni tona, tita ngu ka dianza da Txizimu.

Jobe 14:14

Ina m'thu a txi fa, a nga tshumela e hanya kani? Otshe masiku a kulwa kwangu, ni na verela, kala kuza kumaneka kutxitxa kwangu.

1 Samuwele 25:36

Mbimo yile Abhigayeli a nga wuya ka Nabhali, a to mana taku m'tini kwakwe ku ni m'buso wa hombe, wo fana ni m'buso wa mfumeli; se mbilu ya Nabhali yi ti ti tsakile ngutu, a di levile ngutu, aha koza asi m'gela txilo kala ni mixo.

Genesisi 47:9

Jakobe a to xamula ka Faro, a txi khene: “Malembe a ku pepeseka kwangu ha mafuni, 130 wa malembe awa, ona madotho, aniko ma tate ngu sixaniso, kha ninzi kuhoka ka mtengo wa malembe awa vatate vangu va nga hanya ha mafuni.”

Valamuli 9:13

M'vhinya wu xamute wu txi kha wona: Ni nga leka vhinya yangu ya yiphya, ayi yi tsakisako Txizimu ni vathu, kasi ku ni txi ta fuma txitimwi ka yimwani mindonga kani?

Masalmo 104:15

Vhinya yi yi va tsakisako timbilu, mafura awa ma va tshurisako tikhohe ni sakudya si si va ningako mtamo.

Ekleziyaste 5:18

Mhaka ya yinene yo tshura yi ni nga yi wona, ngu yiya: Ngudya ni kusela, ni kutitsakela mmwani ni mmwani, ngu dibhindu da wotshe mthumo wakwe, wule a nga wu maha hahatshi ka ditambo, ka otshe masiku a kuhanya kwakwe, aale Txizimu txi nga mninga; nguko atxiya njiavelo txakwe.

Ekleziyaste 8:15

Sekoko ani ni to dhumisa litsako, ngako m'thu asi ngako ni txa tximwetxo txa txhuko hahatshi ka ditambo, txo pinda kudya, e sela, ni ku ti tsakela; nguko eto ti na m'vhuna ka mthumo kwakwe, ka masiku a kuhanya kwakwe, ale Txizimu txi mningako hahatshi ka ditambo.

Ekleziyaste 10:19

Vathu va rambana kasi ku ta tsaka, ni vhinya yi tsakisa kuhanya, kambe sotshe si manwa ngu male.