Ekleziyaste 1:2 - Bhiblia Yo Sawuleka

² Wukanganyisi wa wukanganyisi! Kuwomba m'gondisi, wukanganyisi wa wukanganyisi! Sotshe mbukanganyisi.

Ekleziyaste 1:2 Referans Kwoze

Masalmo 144:4

M'thu a fana ni wukanganyisi; masiku akwe ma fana ni mtsudi wu wu pindako.

Varoma 8:20

Nguko sotshe si vekilwe hahatshi ka sixaniso sa ditiko, i si nga ngu kuranda ka sona, aniko ngu mhaka ya wule a nga si veka hahatshi; hambi keto, txi ho txithembo txa tito:

Ekleziyaste 5:10

Awule a dhundako male kha na mbi dhuka e kolwa ngu male; ni wule a randako thomba yayingi kha na mbi dhuka e kolwa ngu dibhindu da kona; eto nitona mbukanganyisi.

Ekleziyaste 12:8

Wukanganyisi wa wukanganyisi, kuwomba M'gondisi, sotshe mbukanganyisi.

Ekleziyaste 2:26

Nguko Txizimu txa ninga wutxhari, ni wuzivi, ni litsako ka m'thu wule i ku mnene masoni ka txona; aniko ka muonhi txi mninga mthumo, kasi ku e sengeletela ni kuwungeletela, se e ninga wule a nga maha ta tinene masoni ka Txizimu. Eto ni tona mbukanganyisi, ni kuxaniseka ka moya.

Ekleziyaste 2:19

Se i mani a ti zivako ti to m'thuyo i nava txhari mwendo txiphukuphuku kani? Hambi keto, ene a na fumela wotshe m'thumo wangu, wule ni nga wu maha, ni wutxhari wule ni nga nigwa hahatshi ka ditambo; eto ni tona mbukanyganyisi.

Ekleziyaste 2:11

Se ani ni wonisisa yotshe mithumo yile yi nga mahwa ngu manza angu, kumweko ni mthumo wule ni nga wu maha, mbimo yile ni nga ti thuma; se wona taku totshe i ti ti wukanganyisi, ni kuxanisa moya, kambe ku ti si nga ni dibhindu hahatshi ka ditambo.

Ekleziyaste 2:23

Nguko otshe masiku akwe nga kupandiseka, ni kutikarata kwakwe i xomulo; hambi ni wusiku mbilu yakwe kha yi humuli; eto ni tona mbukanganyisi.

Ekleziyaste 2:17

Ngu kumaha keto, ni to nyenya kuhanya kuwa, nguko mthumo wule wu mahwako hahatshi ka ditambo i ti ti wo karata; ina, totshe mbukanganyisi, ni kuxaniseka ka moya.

Ekleziyaste 11:8

Ngako m'thu a txi hanya malembe o tala, se e tsaka mndani ka ona otshe, a na alakanye masiku a txidema, nguko ma nava amangi. Totshe ti ti humelelako mbukanganyisi.

Ekleziyaste 6:11

I ti ditshuri ti to ku ni so tala si engetelako wukanganyisi, nji txani txa txhuko kambe a ku natxo m'thu kani?

Ekleziyaste 4:8

Ku ni m'thu mmweyo i ku ekha, kha ku na wa wumbidi; ina, ene kha na mwanana mwendo ndiya; hambi keto, wotshe mthumo wakwe kha wu nga ni magwito, hambi maso akwe kha ma kolwi ngu thomba; kha wombi ku khene: Ni thumela mani ani, ni txi ti tona makatekwa kani? Eto ni tona mbukanganyisi, kambe mthumo wo karata.

Ekleziyaste 4:4

Kambe ni to wona ti to wotshe mthumo, ni kotshe ku ti ningela kuthumani, si tisa kubavelwa ka m'thu, ngu mwakelani wakwe. Eto ni tona mbukanganyisi, ni kuxaniseka ka moya.

Ekleziyaste 3:19

Nguko ati ti mahekako ka vanana va vathu, toneto kambe ta maheka ni ka sihari; kumaheka toneto tatimweto: A ti a fisako tona m'thu, ni txona txihari txi fisa toneto, sotshe si ni m'hefumulo wumwewo; kambe m'thu kha pali txihari ngu txilo, nguko sotshe mbukanganyisi.

Ekleziyaste 2:21

Nguko ku ni m'thu wu a mahako mthumo wakwe ngu wutxhari, ni wuzivi, ni ku ti ningela; hambi keto, a na wu siya wu maha thomba ya m'thu wule a nga mbi ti karata ngu txilo ka wona; eto ni tona mbukanganyisi, kambe ngu xaniseka ka hombe.

Ekleziyaste 11:10

Thavisa koko kukarateka ka mbilu yako, u hambana ni kuxaniseka ka nyamani kwako, nguko wanana, ni wujaha mbukanganyisi.

Ekleziyaste 4:16

Votshe vathu kha va nga ni magwito, votshe vale a va fumako; ni ka kudotho, tiveleko takwe, kha ti na mbi mtsakela. Ngu ditshuri eto ni tona mbukanganyisi, ni kuxanisa moya.

Ekleziyaste 2:15

Ngu kumaha keto, ni ti khani mbiluni kwangu: Atile ti mahekako ka txiphukuphuku, ti na maheka ni kwangu; ngu kutxani ni nga lava wutxhari kani? Sekoko ni ti khani mbiluni kwangu, eto ni tona mbukanganyisi.

Jobe 11:12

Aniko m'thu wa diphanga mbwo pwata mapimo; ina, m'thu a velekwa kufana ni mbongola ya txitinga.

Masalmo 89:47

Alakanya, Mkoma, ti to wutomi wangu wu komile! Votshe vathu, u nga va va nga, va pinda ngu kukuluveta.

Ekleziyaste 2:8

Ni to ti sengeletela silivhela, ni nzalama, ni tithomba ta vafumeli ni ta matiko a hombe; ni ti lavete vaembeleli va txiwamna ni va txisikati, ni ku ti tsakisa ngu vanana va vathu, ni siya so embelela ngu sona sa totshe tixaka.