Dhaniyeli 7:24 - Bhiblia Yo Sawuleka

²⁴ Se ngu ka titxheho tile ta digumi, ngu ka mfumo wonewo wawumwewo ku na emiswa digumi da vafumeli; msana ka kwawe ku na emiswa mmwani, wule a no hambana ni vale vo khata, e wisa vafumeli vararu.

Dhaniyeli 7:24 Referans Kwoze

Dhaniyeli 7:20

se ni timhaka ta digumi da titxheho, ni txi txhehwana txi txi nga huma hagari ka tona, masoni ka txona ku nga wa tiraru, txitxhehwana txa kona txi ti ni maso, ni txisofu txo womba-womba mapswi o guleka ngutu, txo tsana kupinda vangana va txona.

Mtuletelo 13:1

Konako, ni to wona txikalani txi nga pfukula ngu lineneni, txi di ni digumi da titxheho ni mtxhanu wa misungo ni mimbidi. Txitimwi ka titxheho ku ti ni digumi da mibhoti, se txitimwi ka misungo, ku ti ni ditina do ruketela Txizimu.

Dhaniyeli 11:36

Se mfumeli wuwa a na maha madingano ni kuranda kwakwe, a na tiguleta, e tikulisa txitimwi ka sotshe sizimu; a na womba-womba wubihi ngu Txizimu txa sizimu, kambe a na humelela an'ze magwito ka kuhenya; nguko ti ti nga vekiswa ti na maheka.

Mtuletelo 17:3

Ngelozi yi to ni teka ngu mu ka moya yi ni yisa txiwulani, ahawa ni nga ya wona wamsikati a di khalahatshile txitimwi ka txikalani txo bhilivila, txi di tate ngu matina o ruketela, txi di ni mtxhanu wa misungo ni mimbidi ni digumi da titxheho.

Mtuletelo 12:3

Ngu msana ku to woneka tximwani txidiwukiso nzumani: Mwamilambo wa hombe ngutu, wo bhilivila a di ni mtxhanu wa misungo ni mimbidi, ni digumi da titxheho, se misungo yi ti ni mibhoti yotshelele.

Dhaniyeli 7:23

A to womba ku khene: Txihari txa wumune i mfumo wa wumune wa ha mafuni, wule wu no hambana ni yotshe mifumo; wu na khadamula otshe mafu, wu ganyatela ngu mikondo, ni kuphatulela.

Dhaniyeli 2:41

Se ka sile u nga si wona, mikondo ni titiho, didhawa da dibumba da muwumbi, ni didhawa dimwani da simbi, ewo i nava mfumo wo abaniswa; hambi keto, ku nava ni txokari txo tsana txa simbi, nguko u woni simbi yo patwa ni dibumba da ndope.