Dhaniyeli 5:12 - Bhiblia Yo Sawuleka

¹² Ngu kumaha keto ku to maneka ka Dhaniyeli moya wa wunene, wa wuzivi, wa mapimo, wo txhamusela miloro, kutxhamusela masambala, ni kuthavisa kukanakana, keyo mfumeli a nga mninga ditina daku i Bhelxazari; konkuwa koko a na dhanwe Dhaniyeli, se ene a ta ninga txhamusela.

Dhaniyeli 5:12 Referans Kwoze

Dhaniyeli 6:3

Sekoko Dhaniyeli wuwa a ti pinda vathangeli ni vafumeli, nguko kwakwe ku ti ti ni moya wa wunene; se mfumeli a to pimisa ku m'veka kuva mthangeli txitimwi ka wotshe mfumo.

Dhaniyeli 5:14

Ni khala kupfa va txi womba ngu ngawe, ti taku moya wa sizimu wuho kwako, ni ti taku liwoningo ni mapimo, ni wutxhari wa hombe ngutu si maneka kwako.

Dhaniyeli 1:7

Se mthangeli wa mithenwa a to va raya matina mamwani, i ku awa: Dhaniyeli a to mraya ditina daku i Bheltexazari, Hananiya e mraya ditina daku i Xadrake, Misayeli e mraya ditina daku i Mixake, se Azariya a to mraya ditina daku i Abhedhi-Nego.

Dhaniyeli 5:16

Ani koko, ni pfite ti taku awe wa sikota kutxhamusela ni kuthavisa kukanakana; se konkuwa, u txi sikota kugonda mibhalo yiya ni ku ni gela txhamuselo ya yona, wu na ambekwa nguwo yo bhilivila, ni liketani la nzalama mkoloni kwako, se u na va mfumeli wa wuraru amu ka mfumo wangu.

Mavingu 12:26

Mlulami mtsimbitisi wa mwakelani, aniko nzila ya vaonhi ya va maha ve timela.

Dhaniyeli 4:8

Aniko ngu magwito Dhaniyeli, awule ditina dakwe i Bheltexezari, a to ta masoni kwangu, i ku ditina da txizimu txangu, awule moya wa sizimu so sawuleka wu ku txitimwi kwakwe; se ani ni to xawutela mloro masoni kwakwe.

Masalmo 16:3

Vasawuleki va va ku ha mafuni, ava va xamalisako ngu mtamo wawe, ngu vona va ni tsakisako.

Mavingu 17:27

Awule a vekisako mapswi a ni wuzivi, se a wule wa moya wo ziza m'thu wa mapimo.

Vakolosa 1:29

Ngu toneto, ni ti karatelako tona, na ni txi lwa ngu mtamo wakwe, awu ene a ni ningako wona.

Dhaniyeli 4:19

Sekoko Dhaniyeli awule ditina dakwe i ku Bheltexezari, a to xamala, a txi dwee, ngu ora yimweyo, a txi karateka mapimoni kwakwe. Se mfumeli Nebhukodhonosori a to womba, a txi khene: “Bheltexezari, u nga karateke ngu mhaka ya mloro, hambi txhamuselo ya wona.” Bheltexezari a to xamula a txi khene: Nyamne wangu, mloro wuwa wu na wukele vale va ku nyenyako, ni txhamuselo ya wona, ka valala vako.

Ezekhiyele 28:3

Wona taku u txharihile kupinda Dhaniyele: Kha ku na txihunja ni txa tximwetxo txo timeleka kwako.

Dhaniyeli 2:26

Mfumeli a to wotisa Dhaniyeli (awule ditina dakwe i nga ti ti Bheltexazari) a txi khene: “Ina awe u nga sikota ku ni zivisa mloro wangu, ni txhamuselo ya wona kani?”

Dhaniyeli 1:17

Txizimu txi to ninga mazambi awa a mune wuzivi ni mapimo wo ziva yotshe mibhalo ya wutxhari; kambe Dhaniyeli txi to mninga mapimo o txhamusela sotshe siwoniso ni miloro.

Dhaniyeli 6:4

Sekoko vathangeli ni vafumeli, va to lava nzila yo wukela Dhaniyeli ngu mhaka ya mfumo; kambe kha va mana nzila hambi mnandu ni wawumwewo; nguko ene a ti thembekile, aniko kwakwe kha kwa maneka wubihi mwendo mnandu.