Dhaniyeli 3:4 - Bhiblia Yo Sawuleka

⁴ Se m'zivisi wa timhaka a to kwangula ngu dipswi do guleka, a txi khene: Kugelwa anu mifumo, ni nanu matiko, ni vathu va totshe tidimi:

Dhaniyeli 3:4 Referans Kwoze

Dhaniyeli 6:25

Sekoko mfumeli Dhariyo a to bhalela vathu va tixaka totshe, matiko ni vathu va tidimi to hambanelana, va zumbako kotshe ha mafuni, a txi khene: “Kudikha ku na ande hagari kwanu!”

Dhaniyeli 4:1

Mfumeli Nebhukodhonosori a to rumela mhaka ka otshe matiko, mifumo ni ka vathu va totshe tidimi, vale va nga aka kotshe ha mafuni, a txi khene: Kudikha ku na ande hagari kwanu!

Mika 6:16

Nguko mi txi xayisa sileleto sa Omiri, ni yotshe mithumo ya nyumba ya Akabhi, ni nanu mi tsimbila ka milayo yawe; kasiku ani ni kumaha dirumbi, ni vahanyi vako ve va mloti; ngu kumaha keto mi na wuyisa txiruko txa vathu vangu txitimwi kwanu.

Hoseya 5:11

Efrayime a ha kuxanisekani, ni kukarala ka mialakanyo, nguko a lavile kutsimbila ngu nzila yo biha.

Dhaniyeli 4:14

yi txi kwangula ngutu yi txi kha yona: Gangani mndonga, mi tshatulela madhavi ya wona; zuzani mazokoro ya wona mi hangalasa ni mihando ya kona; Sihari si si zumbako hahatshi ka wona si na hangalake, ni sinyana si na hume madhavini ka wona.

Isaya 58:1

Huwelela ngu dipswi do guleka, u nga malale, guleta dipswi kufana ni mpundu; kambe zivisa vathu vangu wuhambunyeti wawe, ni va nyumba ya ka Jakobe sionho sawe.

Isaya 40:9

Awe u m'zivisi wa mahungu amanene ka Siyoni, kwela ka mmango wo guleka. Awe u m'zivisi wa mahungu amanene ka Jerusalema, guleta dipswi ngu mtamo; di gulete, u nga thave, womba ka madhoropa a ka Judha, u txi khawe: Wonani, nditxe hawa Txizimu txanu.

Esteri 8:9

Sekoko ku to dhanwa vamabhalani va mfumeli, ka yona mbimo yile, ngu mtxima wa wuraru (i ku mtxima wa Sivani), ka ditshiku da magumi mambidi ni masiku marau, ka wona mtximewo, se ve ta bhala madingano ni totshe tile Mordhekayi a nga ti lavisa tona ku ti gelwa Vajudha, ni ka tinduna, ni vafumeli, ni vahombe va matiko a hombe, kukhukhela Indiya kala Etiyopiya, 127 wa matiko a hombe, ka ditiko dimwani ni dimwani da hombe madingano ni mabhalelo awe, ni ka vathu vamwani ni vamwani madingano ni lidimi lawe; ni ka Vajudha madingano ni mabhalelo awe ni lidimi lawe.

Mtuletelo 5:9

va txi embelela ndando ya yiphya va txi: “U ni fanelo yo amukela dibhuku, u txi tula sixambanyo sa dona, nguko u datwe, se ngu mnoha wako u xavete Txizimu vathu va totshe tihunzu, totshe tidimi, otshe matiko ni yotshe mifumo.

Dhaniyeli 3:3

Sekoko ku to sengeletana tinganakana, vafumeli, ni vathangeli, valamuli, vaxayise va timale, madhota, vathangeli va mabutho a yimbi, ni votshe vafumeli va matiko a hombe, ku ta tsakela txithombe txile mfumeli Nebhukodhonosori a nga ti txi emisile, se va ti emile masoni ka txitxhombe txile Nebhukodhonosori a nga ti txi emisile.

Dhaniyeli 3:7

Ngu kumaha keto, ngako otshe matiko, ni mifumo, ni vathu va totshe tidimi va di pfite mpfumawulo wa mipundu, ni wa sitende, ni wa makhombela, ni wa tingoma, ni wa totshe tixaka ta sivetaveta va to khizama ve khozela txithombe txa nzalama txile mfumeli Nebhukodhonosori a nga ti txi emisile.

Dhaniyeli 3:10

Awe mfumeli u humisile mthetho waku votshe vathu vale va no pfa diguwa da mpundu, ni da txitende, ni da dikhombela, ni da ngoma, ni da totshe tixaka ta sivetaveta, va na khizame ve khozela txithombe txa nzalama;