Dhaniyeli 3:27 - Bhiblia Yo Sawuleka

²⁷ Se tinganakana, ni tinduna, ni vafumeli, ni vathangeli va yimbi ya mfumeli, va to sengeletana ve wonetela vavamna vava, se va to wona taku mndilo kha wa mana mtamo txitimwi ka mimidi yawe; aha ko hambi msisi ni wawumwewo wa ha msungo kwawe wu sahya, hambi majasi awe kha ma txitxa, hambi kununga ka mndilo ku si pfali kwawe.

Dhaniyeli 3:27 Referans Kwoze

Isaya 43:2

Ngako u txi txhatuka matini, ni na va ni nawe, hambi u txi txhatuka minambo, kha yi na mbi kumita; ngako u txi pinda ngu ha mndiloni, khu na mbi hya, hambi m'dhikila kha wu na mbi kuhisa.

Vahebheru 11:34

va timile midhikila ya mndilo, va hulukile kudawa ngu matxhari, amu ka dikhodho va mani mtamo, va hindukile ve maha tindena yimbini, va tovete mitxawa ya tiyimbi ta valala.

Mithumo 27:34

Na mi khongotela ti to mi dya sakudya, nguko ngu tona ti ti no mi hanyisa. Kha ku na mbi luzeka hambi i di msisi wumwewo wa ha msungo kwanu.”

Matewu 10:30

Kasi anu, hambi ni misisi ya ha msungo kwanu yi batwe yotshe.

Isaya 26:11

Mkoma, dianza dako di guletilwe, hambi keto, kha va di woni; va na di wona, hambiko va no kanganyiseka, ngu mhaka ya ku u pfelako vathu vako; kambe mndilo wu na tshokomisa valala vako.

Masalmo 83:18

Kasiku va na tiziva awu di lumbako kwakwe ditina daku Mkoma, U Nyatxitimwi ka otshe mafuni!

2 Vafumeli 19:19

Konkuwa koko, awe Mkoma, Txizimu txathu, thumelwa ngu kuva u di hi txhatxhisile, ngu kumaha keto, yotshe mifumo ya ha mafuni yi na tiziva ti to ngawe wekha u Mkoma Txizimu.

Dhaniyeli 3:21

Se vavamna vale va to sungwa ni majasi awe, ni sibhulukwana sawe, ni sigoko sawe, ni syambalo sawe, veya rinzwa hagari ka txikho txa mndilo wo tura ngutu.

Mithumo 26:26

Hakunene, mfumeli wu a ni tsanisako ni txi womba-womba masoni kwako, wa tiziva totshe tiya, txi walo ni txa tximwetxo a txi timelelako, nguko kha ta mahwa kusisalani.

Dhaniyeli 6:7

Votshe vathangeli va mfumo, vafumeli ni vafumeli va ditiko, vathangeli va yimbi, ni vafumeli va matiko a hombe, va to sunga txikungo, kasi kuveka txileleto txa wukoma ni kutsanisa mlayo wuwa, waku: Ni wuhi wuwa mndani ka magumi mararu a masiku a no maha txikombelo ka txizimu txokari mwendo ka m'thu wokari, na i si nga kwako, awe mfumeli, a na rinzwe diphalani ka tingonyamo.

Dhaniyeli 6:23

Sekoko mfumeli a to tsaka ngutu, e rumisa ti taku Dhaniyeli e humiswa diphalani ka tingonyamo; ngu kumaha keto, Dhaniyeli a to humiswa diphalani, se ve mana ti taku kha dawiswa ni ka kudhoto, nguko a ti khotwe ka Txizimu txakwe.

1 Vafumeli 13:28

Se a to tsula eya mana txirumbi txa kona txi di kwapa-kwapa hanzila, se mbongola ni ngonyamo si di emile hafuhi ni txirumbi; ngonyamo yi sa mita mmidi, hambi kuphatulela mbongola.