Dhaniyeli 3:25 - Bhiblia Yo Sawuleka

²⁵ Mfumeli a to xamula, a txi khene: Ani koko, ni wona mune wa vavamna va di txhatxhilwe, va txi tsimbila-tsimbila mndani ka mndilo, kambe kha ku woneki ni ka kudotho va nga dawiswa; se txiemo txa wa wumune txi fanana ni txa mwanana wa sizimu.

Dhaniyeli 3:25 Referans Kwoze

Isaya 43:2

Ngako u txi txhatuka matini, ni na va ni nawe, hambi u txi txhatuka minambo, kha yi na mbi kumita; ngako u txi pinda ngu ha mndiloni, khu na mbi hya, hambi m'dhikila kha wu na mbi kuhisa.

Mithumo 28:5

Aniko ene a to huphuta mnyoka wule, wu txi wa ha mndiloni, se ene kha nga za a di humeletwe ngu phango ya txilo.

Marku 16:18

va na ñola minyoka ngu manza, se hambi va txi sela sa txhefu, kha si na mbi va wusela phango; va na sanzeka manza ka valwali, ve kalamuka.”

Jobe 1:6

Na ku ti hokile ditshiku dile vanana va Txizimu va nga ta masoni ka Mkoma, Sathani nene a ti ti hagari kwawe.

Dhaniyeli 3:28

Se Nebhukodhonosori a to womba, a txi khene: Ku na bongwe Txizimu txa Xadreke, ni Mixake, ni Abhedhi-Nego, txile txi nga rumela Ngelozi ya txona ku ta hulukisa sithumi sa txona, sile si nga themba ka txona, nguko kha va lava kulondisa dipswi da mfumeli, ve tumela kuningela mmidi yawe, kasiku va si thumeli hambi kukhozela tximwani txizimu txokari, hahanze ka Txizimu txawe.

Masalmo 34:7

Ngelozi ya Mkoma ya vhikela avale va mthavako yi va hulusa ka tiphango.

1 Pedro 3:13

I mani a no mi mahela wubihi, ngako anu mi txi khutalela ta tinene, kani?

Dhaniyeli 3:18

Se hambi txi si hi hulukisi, tizive awe mfumeli, ti to athu kha hi na mbi thumela sizimu sako, hambi kukhozela txithombe txa nzalama txile u nga txi emisa.

Jobe 38:7

mbimo yile tinyeleti ta wuronga ti nga patana ti embelela, na votshe vanana va Txizimu va txi tsaka ngutu kani?

Varoma 1:4

aniko ngu ka Moya wo Sawuleka, a kombisilwe ti to i Mwanana wa Txizimu, ngu kuwuka kwakwe ngu ka vakufa, ene Jesu Kristu Mkoma wathu.

Luka 1:35

Se ngelozi yi to mu angula tiya: “Moya wo Sawuleka wu na txhika txitimwi kwako, se mtamo wa Nyatxitimwi wu na kufenengeta ngu mtsudi wakwe. Ngu toneto, Msawuleki wu a no velekwa a na dhanwa ku Mwanana wa Txizimu.

Mavingu 30:4

I mani a nga nga kwela nzumani, e gwita e txhika kani? I mani a nga nga fumbareta moya ngu manza kani? I mani a nga nga phutela mati amu ka simaha kani? I mani a nga nga veka mihingano ya mafu kani? I mani ditina dakwe, ni ditina da mwanana wakwe, mwendo wa di ziva kani?

Jeremiya 1:8

U nga thave masoni kwawe; nguko ni ni nawe, kasi ku ku hulukisa, kuwomba Mkoma!”

Jeremiya 1:19

Va na lwa ni nawe, aniko kha va na mbi kuxula; nguko ani ni kumweko ni nawe, kasi ku kuhulukisa, kuwomba Mkoma.”

Jeremiya 15:21

Ni na kuhulukisa manzani ka vabihi, ni na kutirula manzani ka vanyatshiku.

Dhaniyeli 3:24

Sekoko mfumeli Nebhukodhonosori a to dhuka e khukha ngu kukuluveta; a txi khene ka vathangeli va yimbi yakwe: Ina athu kha ha rinza vavamna vararu va di sungilwe hagari ka mndilo kani? Va to xamula va txi kha vona ka mfumeli: U womba ditshuri mfumeli.

Dhaniyeli 6:23

Sekoko mfumeli a to tsaka ngutu, e rumisa ti taku Dhaniyeli e humiswa diphalani ka tingonyamo; ngu kumaha keto, Dhaniyeli a to humiswa diphalani, se ve mana ti taku kha dawiswa ni ka kudhoto, nguko a ti khotwe ka Txizimu txakwe.

Jobe 5:19

Ka mtxhanu wa makhati a kuxaniseka txi na kutxhatxhisa, da wutxhanu ni mambidi wubihi kha wu na mbi kugwesa.