Dhaniyeli 11:4 - Bhiblia Yo Sawuleka

⁴ Aniko ngako ene a di ngadi emile, mfumo wakwe wu na hoxotwa wu abaniswa ngu mune wa mimoya ya nzumani; kambe kha wu na mbi ningelwa ka liveleko lakwe, hambi mtamo wa kona kha wu na mbi fana ni wakwe, nguko mfumo wakwe wu na honyolwa wu ningela ka vamwani.

Dhaniyeli 11:4 Referans Kwoze

Dhaniyeli 8:22

kufunywa ka litxheho, ni kumila ka mune wa titxheho ka wukhalo wa lona, ti txhamusela ku, ku na wuswa mune wa mifumo ya ditikoni kumweko, kambe i si nga ngu mtamo wa dona.

Dhaniyeli 8:8

Aniko mabhongwe a to tikulisa ngutu ta tinene; kambe a di ngadi mtamoni kwakwe ka hombe, litxheho lile la hombe li to funywa; se kumila mune wa tona ka wukhalo wa lona, ta hombe ni tona, ti kula ti di rendekete ka mune wa mimoya ya nzumani.

Jeremiya 12:17

Aniko ngako va si engisi, ni na dula ditiko diya di txi lova, kuwomba Mkoma.

Dhaniyeli 7:8

Se ni txi nga di ni wonetela titxheho eto, ni to wona limwani la lidotho li txi huma ngu hagari ka timwani, masoni ka tile tiraru to khata di nga dulwa; se ka litxheho e lo ku ti ni maso o fana niya m'thu, ni txisofu txi nga ti womba-womba mapswi o guleka ngutu.

Dhaniyeli 7:2

Dhaniyeli a to womba a txi khene: Ni to wona amu ka txiwoniso txangu txa ha wusiku, mune wa mimoya ya nzumani yi txi vhilusa mati a Linene la hombe.

Jeremiya 18:7

Ngu mbimo yokari ni nga womba-womba ni wukela mfumo, ti taku ni wu dula ni kukhundumusa ni ku wu lovisa;

Jeremiya 12:15

Aniko msana ka kuva ni ti va dute, ni na tshumela ni va pfela wusiwana, ni na va tshumeta, mmwani ni mmwani thombani kwakwe, mmwani ni mmwani e tshumelela ditikoni kwakwe.

Luka 12:20

Aniko Txizimu txi to mu gela txi txi kha txona: ‘Diphuphuluwe, ka wona wusiku wu, moya wako wu na lawa. Se tithomba ti u nga sengeletela, ti na sala ni mani kani?’

Matewu 12:25

Kambe Jesu, ngu kuziva mialakanyo yawe, a to khene kwawe: “Mfumo wuhi ni wuhi wu ti bhandako ngu hagari wu txi ti lwisa wu na hasuka; ni didhoropa dihi ni dihi di ti bhandako ngu hagari di ti lwisa, mwendo mwaya wuhi ni wuhi wu ti bhandako ngu hagari wu ti lwisa kha wu na kutsana.

Dhaniyeli 7:6

Msana keto, ni to simama ni wonetela, ni wona tximwani txihari txo fana ni yingwe, txi di ni mune wa tibhapi ta sinyana makatani ka txona; kambe txi ti ti ni mune wa misungo, se txi to ningwa kufuma.

Jeremiya 45:4

U na m'gela tiya: Mkoma a khene: Asi ani ni nga si aka na si khundumusa, asi ni nga phaya ni na si dula, ni na maha eto kotshe ha mafuni.

Jeremiya 31:40

Se wotshe mkova wo tshotshela ka wona sirumbi ni dikhuma, ni kotshe tithembweni kala ka txinambwana txa Kedroni, kala ka dikhona da Ditimba da Mahantxhi kuya wutxani, si na sawulekiselwa Mkoma, kha si na mbi dulwa, hambi kukhundumuselwa kambe, kala kupinduka.

Ekleziyaste 4:8

Ku ni m'thu mmweyo i ku ekha, kha ku na wa wumbidi; ina, ene kha na mwanana mwendo ndiya; hambi keto, wotshe mthumo wakwe kha wu nga ni magwito, hambi maso akwe kha ma kolwi ngu thomba; kha wombi ku khene: Ni thumela mani ani, ni txi ti tona makatekwa kani? Eto ni tona mbukanganyisi, kambe mthumo wo karata.

Masalmo 39:6

Ene wa pinda kufana ni mtsudi! Kha ti vhuni txilo kusengeletela tithomba, na asi ti zivi ti to ti na sala ni mani.

Mtuletelo 7:1

Msana ka tiya, ni to wona mune wa tingelozi ti di emile ka mune wa makhona a mafu, ti di ñote maphuho a mune a mafu, kasi ku di si peki diphuho ha mafuni, ha lineneni mwendo ha mndongani.

Jeremiya 49:36

Ni na tisa txitimwi ka Elame, mune wa mimoya ya mune wa makhona a nzuma, se ni na yi hangalasa yi londisa mimoya yiya yotshe; kambe kha di na mbi vaho ditiko di va no mbi tutumela ka dona va ka Elame.

Ezekhiyele 37:9

Se Mkoma a to khene kwangu: Profeta ka moya, profeta awe mwanana wa m'thu, u txi khawe ka moya: Mkoma Txizimu a khene: Ngono ngu ka mune wa madhawa awe moya, u txi ta futeta txitmwi ka vava vofa, kasi kuva txi hanya.

Zakariya 2:6

Yaho! Anu! Tutumani, ngu ditikoni ka Wuphemba, kuwomba Mkoma, nguko ni mi hangalasile ku nga mune wa mimoya ya nzumani, kuwomba Mkoma.

Zakariya 6:5

Se ngelozi yi to ni xamula yi txi kha yona: Ayiya i mune wa mimoya ya nzumani, yi humako ngu mu yi nga ti ti kona masoni ka Mkoma wa mafu otshe.