Dhaniyeli 11:31 - Bhiblia Yo Sawuleka

³¹ Se ku na huma mitamo yokari yi txiya kwakwe, yi txiya nyenyezisa wukhalo wo sawuleka ni mikhokhola, kambe yi na fuvisa miphaxo ya ditshiku ni ditshiku, yi na veka tximaha txa kudhukisela ka hombe.

Dhaniyeli 11:31 Referans Kwoze

Dhaniyeli 12:11

Se kukhukhela ka mbimo yi mphaxo wa ditshiku ni ditshiku wu no thaviswa wu txi vekwa ka makhalo o nyenyeza, ku nava ku di pindile 1.290 wa masiku.

Dhaniyeli 9:27

Aniko ene a na tsanisa txitumelelano ni votala ngu divhiki dimwedo; se ka hafu ya divhiki a na emisa miphaxo ni miningelo ya sakudya; muhoxoti a nata ngu tibhapini ka vanyenyeki, kambe eto ngu ha ku sigwitiko; ni sile si nga emiswa si na theketwa txitimwi ka muxaseli.

Matewu 24:15

“Ngu konaho, mbimo yi mi no wona manyala a kuthisa, ma nga songolela kuwombwa ngu mprofeti Dhaniyeli ma di talete wukhalo wo sawuleka, (awu a gondako a na ti pfisise!)

Marku 13:14

“Ngako mi txi wona manyala a kuthisa ma di zumbile ahawa ku si faneliko (awu a gondako a na pfisise), ka yoneyo mbimo, ava va ku Judheya va na tutumele mimangoni.

Mtuletelo 17:12

“Titxheho tile ta digumi u nga ti wona digumi da vafumeli va sinziko kuamukela mfumo. Kambe vona va na amukela wukoma kota vafumeli txipimo txa txikhati tximwetxo dwe, kumweko ni txikalani.

Luka 21:20

Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi.

Dhaniyeli 8:26

Se txiwoniso txa mixo ni txa minova, txile txi nga wombwa, nja ditshuri; awe koko, lema txiwoniso, nguko msana ka masiku amangi txi na hetiseka.

Dhaniyeli 8:24

Se mtamo wakwe wu na tsana, na i si nga ngu mtamo wakwe apune; kambe a na haxula ngu kuxamalisa, e bhindula e maha kuranda kwakwe; a na lovisa tindena ni ditiko do sawuleka.

Ezekhiyele 9:7

Se a to va gela ku khene: Nyenyezisani nyumba, mi tata mithanda ngu sirumbi, se mi huma. Se va to huma ve xasela didhoropa.

Sidilo 2:7

Mkoma a lekile txiluvelo txakwe a tsukute ni wukhalo wakwe wo sawuleka, a ningete manzani ka valala maguma a tinyumba tawe ta wukoma; va pekile huwa Nyumbani ka Mkoma nga disthiku da msengeletano wa mpipi.

Sidilo 1:10

Mlala wakwe a mtekete tithomba takwe; nguko a woni matiko ma txi wulela ka wukhalo wakwe wo sawuleka, eyo awe Mkoma, u nga ti ma tsimbile kuwulela ka msengeletano wako.

Jeremiya 7:30

Nguko vanana va ka Judha va mahile kubiha masoni kwangu, kuwomba Mkoma; va wuletile manyala awe mu ka nyumba yi yi dhanwako ngu ditina dangu, ve yi nyenyezisa.

Jeremiya 19:4

Nguko va ni lekile, ve nyenyezisa wukhalo wuwa, nguko va nga hisa dibaselo ka simwani sizimu, eso va nga mba si ziva, vona ni vakokwani vawe ni vafumeli va ka Judha; va tatile wukhalo wuwa ngu mnoha wa va va singako ni mnandu;

Hoseya 3:4

Nguko vanana va ka Israyeli va na zumba masiku amangi va si na mfumeli, va si na mthangeli, va si na mphaxo, va si na txithombe, va si na efodhe kumbe materafime.