Amosi 9:14 - Bhiblia Yo Sawuleka

¹⁴ Ni na thavisa wukhumbi wa vathu vangu va ka Israyeli, kambe va na aketa madhoropa o xaselwa, se va na zumba ka ona, ve phaya mivhinya, ve sela vhinya ya kona, ve phaya mipeto ya mindonga, ni kudya mihando ya kona.

Amosi 9:14 Referans Kwoze

Isaya 61:4

Se va na aketa makhalo ale ma nga xaselwa, kambe va na wuseta ni ale ma nga haxulwa kale, ni kuwusa madhoropa ale ma nga xaselwa, ma nga khundumuswa ka liveleko ni liveleko.

Jeremiya 30:3

Nguko ma ngadi ma txi ta masiku, kuwomba Mkoma, ayo ni no tshumeta ngu ona ava vo sungwa, i ku Israyeli ni Judha, kuwomba Mkoma. Ni na va wuyisa ditikoni mu ni nga ha vakokwani vawe, va na di fumela.

Jeremiya 30:18

Mkoma a khene: Ni na wuyisa vo ñolwa va matenda a Jakobe, ni na pfela wusiwana dizumbo dakwe; didhoropa di na aketwa txizani ka dona, nyumba ya wukoma yi na nga tontile ta kale.

Ezekhiyele 28:26

Se va na zumba ka dona ngu kutsana, va na aka tinyumba ni kuphaya mivhinya: Ina, va na zumba ngu kutsana, mbimo yile ni no lamula votshe vale va va pelako madhawani kwawe; va na tiziva taku ani ngani Mkoma, Txizimu txawe.

Jeremiya 31:28

Ku na maheka ati to, nga kule ni nga va emela kasi kudula ni kugangela, ni kuvhinganyisa, ni kukhundumusa, ni kuxanisa, ngu toneto ni na va wonelela, kasi kuaka ni kuphaya, kuwomba Mkoma.

Isaya 65:21

Se va na aka tinyumba, ve zumba ka tona; va na phaya mivhinya, ve dya mihando ya kona.

Masalmo 53:6

Oh, idiku kuhanyiswa ka Israyeli ko ta ngu Siyoni! Ngako Txizimu txi txi wuyisa vathu va txona ngu wukhumbini, liveleko la Jakobe li na tsaka, vathu va ka Israyeli va na nengela.

Ezekhiyele 39:25

Ngu konaho, Mkoma Txizimu a khene: Kona kuwa, ni na tshumela ni wuyisa tikhumbi ta ka Jakobe. Kambe ni na mahela wumbilu yotshe nyumba ya ka Israyeli, ni na emela ditina dangu do sawuleka.

Ezekhiyele 16:53

Ani koko ni na wuyisa vale va wukhumbini: Va wukhumbini ka Sodhoma ni vanana vawe vamahorana, ni wukhumbini ka Samariya ni vanana vawe vamahorana, ni tikhumbi ta wukhumbi wako;

Jeremiya 31:23

Mkoma wa Mabutho a Tiyimbi, i ku Txizimu txa Israyeli, a khene: Mi ngadi mi txi na womba dipswi diya ka Judha ni madhoropani kwakwe, mbimo yi ni no heta wukhumbi wawe: Mkoma a na kukatekisa, awe m'ti wa kululama, awe mmango wo sawuleka!

Zefaniya 1:13

Ngu toneto, yi na handwa thomba yawe, ni kuxaselwa tinyumbani kwawe; kambe va na aka tinyumba, aniko kha va na mbi zumba ka tona, va na phaya mivhinya, aniko kha na mbi yi sela vhinya ya kona.

Amosi 5:11

Ngu koneho a ku mi kandako txisiwana, ka txona mi lava nduwo ya fulaho, mi na aka tinyumba ngu marigwi o vatwa, kambe kha mi na mba zumba ka tona: Mi na phaya mivhinya yo tsakisa, kambe mi na mbi sela vhinya ya kona.

Masalmo 107:37

Ve phaya tithembwe ta sakudya ni ta mivhinya ve elula mihando yo tala.

Isaya 60:4

Gula maso ako, u ma rendelekisa ka madhawa otshe, u wona; votshe vava se va sengeletani va ta kwako; vanana vako va majaha va nata ngu kule; ni vanana vako vamahorana va na wunjeka didhawa kwako.

Jeremiya 12:15

Aniko msana ka kuva ni ti va dute, ni na tshumela ni va pfela wusiwana, ni na va tshumeta, mmwani ni mmwani thombani kwakwe, mmwani ni mmwani e tshumelela ditikoni kwakwe.

Jeremiya 23:8

Aniko: Mkoma a hanyako, awu a nga thangela vanana va ka Israyeli, ve huma ngu ditikoni ka Wuphemba, ni ka otshe matiko ale a nga ti va tovelete ka ona; va nata aka ditikoni kwawe.

Jeremiya 24:6

Ni na va wona ngu wunene, ni na tshumela ni va wuyisa ka diya ditiko. Ni na va akisa, ni si va wisi hahatshi; ni na va phaya ni si va duli.

Jeremiya 31:5

U nga txi na phaya sivhina mimangoni ka Samariya; ava va phayako va na dya mihando ya kona.

Jeremiya 32:15

Nguko a womba tiya Mkoma wa Mabutho a Tiyimbi, Txizimu txa ka Israyeli: Mi ngadi mi txi na xava tinyumba, ni tithembwe, ni mipeto, ka diya ditiko.

Jeremiya 32:37

Wonani, ni na mi tshanganisela ngu matikoni kotshe, ayo ni nga va tutumisela ka ona kuhenyani kwangu ni txiviti txangu ni dikhulo da hombe; ni na tshumela ni va wuyisa ka wukhalo wuwa, ni va maha ve zumbiseka.

Jeremiya 33:7

Ni na wuyisa va vo ñolwa va ka Judha ni Israyeli, ni na va akisa nga kale.

Ezekhiyele 37:21

Va gele koko ku khawe: Mkoma Txizimu a khene: Wonani taku ni na teka vanana va ka Israyeli hagari ka matiko ale va nga ya ka ona, ni txi va sengeleta ngu ka otshe madhawa, ni txi va heleketa ditikoni kwawe.

Jeremiya 16:15

Aniko va na kha vona: Mkoma a hanyako, awu a nga humisa vanana va ka Israyeli ngu ditikoni ka Wuphemba, ni ka otshe matiko awa a nga ti va tutumisete ka ona. Ni na va wuyisa kambe ditikoni kwawe adi ni nga ninga vatate vawe!

Jeremiya 29:14

Ni na manwa ngu nganu, kuwomba Mkoma, ni na tshumeta va va nga ñolwa, ni na mi sengeleta ngu ka otshe matiko, ni ka otshe madhawa, awa ni nga mi hangalasa ka ona, kuwomba Mkoma; ni na tshumela ni txi mi wuyisa ka wukhalo wu ni nga mi tutumisa ka wona, mi txi ya wukhumbini.

Jeremiya 33:11

Ku na pfala dipswi da mkulungwani ni da litsako, dipswi da mteki ni da mtekiwa, ni dipswi da va va ku kha vona: Dhumisani Mkoma wa Mabutho a Tiyimbi, nguko mnene, nguko wumbilu wakwe mbwa kala kupinduka; ni mapswi a va va nehako miningelo ya kubonga Nyumbani ka Mkoma. Nguko ni wuyisa ava va nga ñolwa ka wuwa wukhalo, va na nga mbimoni ka kale, kuwomba Mkoma.

Zefaniya 2:7

Mabambe mule ku na lumba miboti ya nyumba ya ka Judha, kuva va txi dyisela kona sifuyo; ni minova va na ya otela tinyumbani ka va ka Axikaloni, nguko Mkoma, Txizimu txawe, a na va endela, kambe a na va tshumetela tikhumbi tawe.