Amosi 9:11 - Bhiblia Yo Sawuleka

¹¹ Ka ditshiku dile, ni na tshumela ni guleta ditenda da Dhavhidha, di nga wa, ni vhaletela amule ku nga vharuka, ni tshumela ni wusa marumbi, ni ma aketa kufana ni masiku a kale;

Amosi 9:11 Referans Kwoze

Isaya 16:5

Nguko txikhalo txa wukoma txi na tsaniswa ngu wumbilu, se txitimwi ka txona ku na zumba mlamuli, amu ditendani ka Dhavhidha, awu a no lamula, a lavako wululamo, kambe a kuluvetako kumaha ta tinene.

Masalmo 80:12

Ngu kutxani u txi khundumusa libhiyo la thembwe yako, u leka avale va pindako ngu nzila va txi hapha mauvha a wona kani?

Isaya 63:11

Hambi keto, a to alakanya masiku a kale ngutu, a Mosi ni a vathu vakwe, va nga kha vona: Ahayi wule a nga va humisa lineneni, kumweko ni vadyisi va mtxhambi kani? Ahayi wule a nga thela Moya wakwe wo Sawuleka hagari kwawe,

Hoseya 3:5

Msana keto, vanana va ka Israyeli va na tshumela ve lava Mkoma, Txizimu txawe, ni Dhavhidha, mfumeli wawe; ka masiku o gwita va na thava Mkoma ni wumbilu wakwe.

Ezekhiyele 36:11

Aniko ni na andisa vathu ni sihari txitimwi kwanu; vona va na velekela ve anda; se ni na mi maha mi zumba nga kukhatani, ni txhukwata dihanyo danu kupinda kukhatani; mi na tiziva taku ani, ngani Mkoma.

Ezekhiyele 17:24

Ngu kumaha keto, yotshe mindonga ya txitinga yi na tiziva taku ani Mkoma, ni date mndonga wo lapha, ni guletile mndonga wo koma, ni omisile mndonga wo nakana, ni nakanisa mndonga wa kuoma; Ani Mkoma ni wombile, kambe ni na ti maha eto.

Sidilo 5:21

Awe Mkoma, hi wuyisele kwako, kasi ku hi txi tshumelela kwako ngu ditshuri, hi tshumetele ka txiemo txile hi nga ti ka txona kale.

Jeremiya 46:26

Ni na mningela manzani ka vale va mlavako ku m'daya, i ku manzani ka Nebhukodhonosori, mfumeli wa Bhabhilona, ni manzani ka sithumi sakwe; se msana keto, ku nava ni vo zumba, nga masiku a kale, kuwomba Mkoma.

Isaya 5:5

Konkuwa koko, na mi gela ti ni no maha, ka thembwe yangu ya m'vhinya: Ni na thavisa libhingo la yona, yi na maha lihawu; ni na khundumusa diseta da kona, di na kandetelwa.

Jobe 1:10

Ina awe khwa mranganyeta ngu tithomba, ni nyumba yakwe, ni sotshe sile a ku naso kani? U katekisile mithumo ya manza akwe, wufuyi wakwe wa anda ha mafuni.

Mika 7:14

Dyisa vathu vako ngu ndonga yako, i ku mtxhambi wa thomba yako wu zumbako wokha txitingani, hagari ka ditiko do nona; wu na dyiselwe Bhasani ni Gileyadhi, kufana ni masiku a kale.

Mika 5:2

Awe Bhetlehema wa Efrata, awe u ku wam'dotho hagari ka Judha, ku na huma ngu kwako awu a no va Mfumeli wa Israyeli, eyo makhato akwe i ku a kukhukhela kale, kukhukhela ka masiku a kaleko.

Jeremiya 30:9

Aniko va na thumela Mkoma, Txizimu txawe, ni Dhavhidha mfumeli wawe, awu ni no va wusela ene.

Masalmo 143:5

Na alakanya masiku a kaleko na pimisela yotshe mithumo yako; na khumbula sotshe simaho sa manza ako.

Masalmo 89:40

U khundumusile otshe maguma a didhoropa; u mahile marumbi mikhokhola ya kona.

Mitengo 24:18

Se Edhomi a na va i di thomba, Seyiri nene a na va thomba yo salela valala vakwe; koko Israyeli a na kombisa mtamo wakwe.

Isaya 58:12

Se avale va no huma ngu kwako, va na wusa makhalo a marumbi a kale; kambe u na wusa makhato a liveleko ni liveleko, se va na ku dhana taku u mlulamisi wa mule ko sakala, ni muwusi wa tisoko ta vazumbi va ditikoni.

Isaya 65:9

Kambe ni na humisa lixaka ngu ka Jakobe ni ka Judha, txidya-thomba txa mimango yangu, se vasawuleki vangu va na ningwa ditiko, ni sithumi sangu si na zumba ka dona.

Jeremiya 18:9

Ngu ka yimwani mbimo yi ni nga womba-womba ngu ditiko dokari ni mfumo, ti taku ni wu aka ni ku wu phaya;

Obhadhiya 1:17

Kambe mmangoni ka Siyoni ku nava ni vahuluki, se mmango wu na va wo sawuleka; va nyumba ya ka Jakobe va na teka tithomba tawe.

Mika 7:8

Awe mlala wangu wa txisikati, u nga tsakele dikhombo dangu; hambi ngako ani ni di wite, ni na wuka; ngako ni txi zumba txidemani, Mkoma a na va liwoningo langu.

Mika 7:11

Ka ditshiku di u no aketa maguma ako, kedo ditshiku, txi na va txi di ngadi kule txileleto.

Zakariya 6:12

Se m'gele, u txi khawe: Mkoma wa Mabutho a Tiyimbi, a khene: Ndiyo m'thu wu ditina dakwe i ku Kuthunga; Ene a na mila ka wukhalo wakwe, kambe a na aka dithepele da Mkoma.

Zakariya 12:7

Se kukhata, Mkoma a na hulukisa matenda a ka Judha, ku mahela tito, wudhundo wa nyumba ya Dhavhidha ni wudhundo wa vaaki va Jerusalema, wu si guletwi kupinda wa ka Judha.

Zakariya 14:10

Dotshe ditiko di na maha libala, kukhukhela Gebha kala Rimoni, ngu wulambwe ka Jerusalema; ene a na guletwa, ni kuaketwa wukhaloni kwakwe, kukhukhela ka txike txa Bhenjamini, kala ka wukhalo wa txike txo khata, kala ka txike txa Dikhonani, ni kukhukhela ka txitezi txa Hananeli, kala ka mapipa a mfumeli.