2 Vafumeli 8:7 - Bhiblia Yo Sawuleka

⁷ Msana keto, Elixa a to ya Dhamasku, na a txi lwala Bheni-Hadhadhe, mfumeli wa Siriya; se va to m'gela ku kha vona: A bwakile m'thu wa Txizimu.

2 Vafumeli 8:7 Referans Kwoze

2 Vafumeli 6:24

Msana keto, ku to maheka ti to Bheni-Hadhadhe, mfumeli wa Siriya, e tshanganisa otshe masotxhwa akwe; a to kwelela eya randela Samariya.

1 Vafumeli 11:24

a to tshanganisa vavamna e maha mthangeli wawe, mbimo yile Dhavhidha a nga va daya, se va to tsula Dhamasku, va to zumba koneyo, ve fuma Dhamasku.

1 Vafumeli 20:1

Se Bheni-Hadhadhe, mfumeli wa Siriya, a to sengeleta yotshe mitamo yakwe kumweko ni magumi mararu ni vambidi a vafumeli, ni mahantxhi, ni sikotxikani si a nga ti naso; se a to kwelela e randela Samariya e mlwisa.

Mithumo 17:6

Se ngako va di va pwati, va to ruruvisa Jasoni ni vanawe vokari, ve va yisa masoni ka tinduna ta didhoropa, veya kwangula va txi kha vona: “Vathu va va nga wusa vhilinganya ka dotshe ditiko va hokile ni kona muwa kwathu,

Isaya 7:8

Nguko m'zinda ka Siriya ngu Dhamasku, ni msungo wa Dhamasku i Rezimi; se mndani ka mtxhanu wa magumi ni dimwedo, ni mtxhanu wa malembe, Efrayime a na xaselwa, e leka kuva ni vathu.

2 Vafumeli 6:12

Se mmweyo wa sithumi sakwe a to khene: Ku walo ni wammweyo, awe mfumeli, nyamne wangu. Aniko mprofeti Elixa a manekako Israyeli, ngene a zivisako ka mfumeli wa ka Israyeli, totshe ti u bhulako na u di nyumbani mu u otelako kona.

2 Vafumeli 2:15

Mbimo yile va nga mu wona vanana va vaprofeti, na va di rendekelani ni Jeriko, va to kha vona: Moya wa Elija wu khandamile ka Elixa. Se va to mu hingeta ve ta mu khizamela.

1 Vafumeli 20:34

Se Bheni-Hadhadhe a to khene: Madhoropa ale ma nga honyolwa ngu tate wangu ka tate wako ni na kutshumetela, ti longisele sitarato so khukhela Dhamasku, ku nga tile a nga mahisa tona tate wangu ditikoni ka Samariya. Se ani kha Akabe, ni na kuleka u tsula ni txitumelelano txiya. A to maha nayo txitumelelano e mleka e tsula.

1 Vafumeli 15:18

Sekoko Asa a to teka yotshe silivhela ni nzalama yi nga ti sate ka tithomba ta Nyumbani ka Mkoma, ni mu ka tithomba ta nyumbani ka mfumeli, se a to si ningela manzani ka sithumi sakwe, e si rumela ka Bheni-Hadhadhe, mwana Tambrimo, wa mwana Heziyomi, mfumeli wa Siriya, a nga ti zumba Dhamasku, a txi khene:

1 Vafumeli 13:1

Wonani ati to ngu kuruma ka Mkoma kutile m'thu wa Txizimu Bheteli ngu Judha; se Jerobhowamu a ti txiluveloni, kasi kuhisa dibaselo.

Valamuli 16:2

Se vathu va Gaza va to ziviswa ti taku: “Samusoni a wulete muwa.” Va to tsula koko veya mrandela, ni ku m'zingela wusiku wotshe, ha txikeni ka didhoropa; ngu kumaha keto wotshe wusiku va to thutha, na va txi kha vona: “Hi na rinzela kala di txi txa; se ngu kona hi no m'daya.”

Dhewuteronome 33:1

Kambe atxiya, njikatekiso a txi Mosi, m'thu wa Txizimu, a nga katekisa ngu txona vanana va ka Israyeli, na a sinzi kufa.

Genesisi 14:15

Se ene a to abanisa vathu vakwe ngu mitxawa, va txi dayela valala vawe ni wusiku, ve va khozisa, ni kuva hinga kala Hobha, wuphemba ka Dhamasku.

2 Vafumeli 1:2

Se Akaziya a to pfodola ngu ha ka tisimbi ta nyumba ya txitezi txa wumune, a ngadi nayo kona Samariya, a to lwala, eruma mitumi e va gela tiya: Tsulani mi ya wotisa Bhahali-Zebhubha, txizimu txa Ekroni, ku mwendo ni na kalamuka ka wulwati wuwa kani?

2 Vafumeli 5:20

Sekoko Gehazi, dijaha da Elixa, m'thu wa Txizimu, a to khene: Hi nga wonani, nyamne wangu a tsimbile musiriya wule Nahanani, ku mninga ngu dianza dakwe, sa sidotho ka sile a ngadi naso. Ni xambanya ngu Mkoma wo hanya a tito, ni na tutuma ngu msana kwakwe ni ya teka txokari.

2 Vafumeli 8:6

Kambe mfumeli a to wotisa ka wamsikati, se ene e mxawutela; sekoko mfumeli a to mninga mthenwa, a txi khene: Mmahe e tshumetelwa sotshe si i ngadi sakwe, ni mabhindu a mafu, kukhukhela ditshiku dile a nga huma ditikoni kala kuwa.

Jeremiya 40:5

Ngako a nga sanzi kutshumela, a to khene kwakwe: “Tshumelela ka Gedhaliya, mwana Ahikamu, mwana Xafani, eyo a nga mahwa mfumeli txitimwi ka didhoropa da ka Judha ngu mfumeli wa Bhabhilona, u zumba nayo hagari ka vathu; hambi ku ti yela ka ni dihi didhawa u di lavako.” Sekoko mthangeli wa vawoneleli yi to mninga timbuva ni siningo yi mu leka e tsula.