2 Vafumeli 13:5 - Bhiblia Yo Sawuleka

⁵ Se Mkoma a to ninga muhanyisi ka Israyeli, se vanana va ka Israyeli va to huma ngu manzani ka Vasiriya, veya zumba matendani kwawe, nga kukhatani.

2 Vafumeli 13:5 Referans Kwoze

Nehemiya 9:27

Ngu toneto, u va ningete manzani ka valala vawe ve va xanisa; kambe ka mbimo ya kuxaniseka kwawe, va pekile huwa kwako, awe u to engisa u di nzumani; se ngu mhaka ya wumbilu wako wa hombe, u va ningile vatxhatxhisi, va va nga va txhatxhisa manzani ka vaxanisi vawe.

2 Vafumeli 14:27

Kambe Mkoma si se womba txilo ngu kupfhita ditina da Israyeli hahatshi ka nzuma; hambi keto, a va txhatxhile ngu dianza da Jerobhowamu, mwana Jehowasi.

2 Vafumeli 14:25

Kambe ene a wusile mihingano ya Israyeli, kukhukhela txidingeni ka didhoropa da Hamati, kala ka Linene la Libalani, madingano ni dipswi da Mkoma, Txizimu txa ka Israyeli, nga kule a nga womba ngu mthumo wa mprofeti Jona, mwana mprofeti Amitayi, awule i nga ti ti wa Gati-Heferi.

2 Vafumeli 13:25

Se Jehowasi, mwana Jehowakazi, a to tshumela e honyola kambe madhoropa manzani ka Bheni-Hadhadhe, a ngadi ma tekile ngu kulwa manzani ka tate wakwe Jehowakazi, Jehowasi a to lwa kuraru, e teka kambe madhoropa a ka Israyeli.

Luka 2:11

Nyamsi, didhoropani ka Dhavhidha, a velekilwe Muhanyisi, awu i ku Kristu Mkoma.

Obhadhiya 1:21

Se ku na wuka vahanyisi mmangoni ka Siyoni, ku ta thethisa va mmangoni ka Esawu; se wukoma wu na va wa Mkoma.

Isaya 19:20

Se txi na maha txikombiso ni wufakazi, ka Mkoma wa Mabutho a Tiyimbi, ditikoni da Egipta, nguko va na dila ka Mkoma ngu mhaka ya vaxanisi, ene a na va rumela Mtiruli ni M'vhikeli, va no va txhatxhisa.

1 Makronika 11:2

Hambi ni kale, Sawule i di ngadi mfumeli, ngawe u nga ti ti huma ni kuwulela ni Israyeli; Mkoma, Txizimu txako, a ti khene kwako: Awe u na dyisa vathu vangu va ka Israyeli, ni ti to awe u na va mthangeli txitimwi ka Israyeli.

1 Samuwele 19:7

Se Jonatani a to dhana Dhavhidha, e mtxhamusela otshe mapswi awa, aniko Jonatani a to teka Dhavhidha e tsula nayo ka Sawule; kambe eya maneka kona kufana ni kale.

Dhewuteronome 19:4

Se mhaka yi yi ningako m'dayi fanelo ya kulava wuthavelo kasi ku e hulukisa wutomi wakwe, ngu yiya. Awu a dayako muakelani wakwe ngu phango, na a sa thanga ngu ku m'venga.

Eksodha 4:10

Sekoko Mosi a to khene ka Mkoma: “Yowe! Mkoma! Ani kha ni nga m'thu wo womba-womba ta tinene, hambi nyamnova, hambi nyatulo, hambi nyamsi konkuwa u nga womba-womba ni txithumi txako; kha ni sikoti kuwombawomba ta tinene, nguko ni m'thu wa kukangamela ni txidimiti.”

Esteri 4:14

Nguko ka mbimo yiya hambi u txi malala ka totshe, kutxhatxhiswa ni kuhuluka si nata ngu ka dimwani didhawa da Vajudha, kambe awe ni nyumba ya tate wako, mi na lova; se kona ti ziwa ngu mani, mwendo u tile ngu mbimo yiya ka mfumo wuwa ngu mhaka yiya kani?

1 Samuwele 12:11

Se Mkoma a to rumela Jerubhahali ni Bhedhani, ni Jefite, ni Samuwele e mi txhatxhisa manzani ka valala vanu vale va nga mi randela, se mi zumba mi di tsani.