2 Timoti 2:15 - Bhiblia Yo Sawuleka

¹⁵ Khutalela kumaneka masoni ka Txizimu u di m'thu wu a nga dukwa, txithumi txi txi si faneliko kutelwa ngu tingana, awu a gondisako dipswi da ditshuri ngu nzila yo lulama.

2 Timoti 2:15 Referans Kwoze

1 Vatesalonika 2:4

Aniko ngako Txizimu txi nga hi wona hi di ni fanelo ya kuningwa mthumo wa Evhangeli, ngu toneto hi yi txhumayelisako tona. Hi nga to lava kutsakisa vathu, aniko ndo tsakisa Txizimu, atxi txi xolako timbilu tathu.

2 Pedro 1:10

Ngu toneto, va ka kwathu, khutalani mi txi ya masoni, kasi ku mi txi sikota kutsanisa kudhanwa kwanu ni kusawulwa kwanu. Nguko, mi txi mahisa eto, kha mi na mbi thuka mi txi khuvekiswa.

1 Timoti 4:6

Ngako u txi txhamusela timhaka tiya ka vanathu, u na va u di m'dhiyakoni wamnene wa Jesu Kristu, awu a dyiswako ngu mapswi a likholo ni gondo ya yinene, ayi u yi londetelako ngu kale.

2 Vakorinto 10:18

Nguko, awu a ti dhumisako kha amukelwi, hahanze ka wu a dhumiswako ngu Mkoma.

2 Vakorinto 5:9

Ngu toneto, mwendo hi hafuhi, mwendo hi kule nayo, ha ti karata ngu kumaha mithumo ya ku mtsakisa.

2 Vakorinto 4:2

Athu hi lekile matsimbilelo o sisala ni a tingana, se kha hi tsimbili ngu marindi, kambe kha hi timeti dipswi da Txizimu; aniko ngu kuhumisa ditshuri ha kubasani, hi txi khutala ngu kuva hi maneka hi di thembekile masoni ka livhalo la votshe vathu ni masoni ka Txizimu.

2 Pedro 3:14

Ngu kota yeto, vo randeka, na mi txi rinzela simaha siya, ti karateni kufela ku ene a txi ta mi mana mi di basile, mi si nga ni txisolo, kambe a ne ta mi mana mi di ni kudikha.

Vagalatiya 1:10

Ina no lava kudhumiswa ngu m'thu kani, mwendo kudhumiswa ngu Txizimu, kani? Mwendo no lava kutsakisa vathu kani? Idiku ni ngadi ni txi dhunda kutsakisa vathu, nga ni si fanekelwi ngu kuthumela Kristu.

2 Pedro 1:15

Hambi keto, ni na ti karata kasiku hambi ni txi fa, mi na sala mi txi ti alakanya totshe tiya.

Vaefesu 1:13

Nananu, ngako mi nga engisa dipswi da ditshuri, i ku Evhangeli ya kuhanyiswa kwanu, ngako mi nga kholwa ka dona dipswi dile, mi bhatwe ngu txixambanyo txa Moya wo Sawuleka, wu nga ti thembisilwe,

1 Vatesalonika 5:14

Ha mi laya, vanathu, kawukani sindaka-milayo. Tsanisani ava va ku ni dizowa, vhunani ava va ku ni dikhodho, mi va ni kuhonisela ka votshe.

2 Vakorinto 3:6

Txona ngu txona txi nga hi ninga mtamo wa kuthumela Txitumelelano txa Txiphya, i ku txa moya, i si nga ngu mlayo wa kubhalwa nguko mlayo wa kubhalwa wa daya, kasi wona moya wu ninga wutomi.

Varoma 14:18

Nguko awu a thumelako Kristu ngu nzila yiya, wa tsakisa Txizimu, na a txi dhundeka ka vathu.

Vahebheru 4:11

Ngu toneto, he khutaleleni kuya wulela kona kuhumulaniyo, kasiku ni wammweyo asi wi, ngu mhaka ya kukanyisa ko fana ni kwawe.

Jakobe 1:18

Ngu kuranda kwakwe ene, a hi velekile ngu dipswi da ditshuri, kasi ku hi txi maha matiwula a siwumbwa sakwe.

1 Vakorinto 2:6

Hambi keto, athu hi womba-womba ngu wuzivi hagari ka vale i ku vo thembeka, kambe hi womba-womba ngu wuzivi wo va i si nga wa ditiko diya, awu kambe i si nga wuzivi wa va va fumako ditikoni muwa, ava va no gwita ngu kufa.

Mithumo 2:22

“Anu vavamna va ka Israyeli, engisani mapswi awa: Jesu wa Nazareta, i ku m'thu wu a nga fakazelwa ngu Txizimu hagari kwanu ngu mithumo ya mtamo ni sidiwukiso ni sikombiso si Txizimu txi nga si maha hagari kwanu ngu ngene, kota nga ti mi ti zivako.

Mithumo 20:27

Nguko kha ni zivi kutshumelela msana, yihi ni yihi mbimo ti nga ti laveka kutxhumayela otshe mahungu a Txizimu.

Matewu 13:52

Se a to va gela kambe a txi khene: “Ngu toneto, m'bhali wuhi ni wuhi a nga gondiswa timhaka ta Mfumo wa nzumani, a fana ni wu i ku nyamne wa m'ti, awuwa, ka txuma txakwe, a humisako sasiphya ni sa kale.”

Varoma 16:10

Dingulani Apelesi, wa kuthembeka ngu ka Kristu. Dingulani va nyumba ya ka Aristobulusi.

Luka 12:42

Mkoma a xamute a txi khene: “Ngu wuhi muwoneleti wo thembeka ni kutxhariha, awu Mkoma a no mu veka masoni ka sithumi, kasiku e avela sakudya ngu mbimo yi yi lavekako kani?

Marku 4:33

E va txhumayela dipswi da Txizimu ngu sidinganiso so tala, nga ti va nga txi sikotisa tona ku di pfisisa.

Varoma 6:13

mi nga ningeleni sihango sanu kuonhani, si maha matxhari a ku ambi lulama, aniko ti ningeleni ka Txizimu, nga va va nga huma kufani, ve hanya, mi teka sihango sanu si maha matxhari a kululama, a kuthumela Txizimu.

Jakobe 1:12

A katekile m'thu wu a amukelako txiduko ngu kutimisela; nguko, a di gwitile kudukwa, a na amukela m'bhoti wa wutomi, awu Mkoma a nga wu thembisa ka vale va mrandako.