2 Pedro 2:4 - Bhiblia Yo Sawuleka

⁴ Ngu toneto, ngako Txizimu txi nga mbi divalela tingelozi ti ti nga onha, aniko txi ti rinzile maphalani ka txidema txa Gehena, ahawa ti woneletwako kala ditshiku da kulamulwa,

2 Pedro 2:4 Referans Kwoze

Judha 1:6

Se tingelozi ti ti nga mbi veketa wukoma wa tona, aniko ti nga leka wukhalo wa tona, a ti vekile mtemani, ti di sungilwe ngu makhodha o mbi guma, ti verela kulamulwa ka ditshiku da hombe.

Matewu 25:41

Sekoko ngu msana, a na gela ava va txibhabha kwakwe, a txi khene: ‘Hambukani kule ni nani, anu vathu va kurukwa, tsulani mndiloni ko mbi na magwito, awu wu nga longiselwa Sathani ni tingelozi takwe.

Varoma 8:32

Txona txi nga mbi felela Mwanana wa txona, kambe txi nga mningela ngu mhaka yathu hotshethu, ina kha txi na mbi hi ninga silo sotshe kumweko nayo kani?

Isaya 14:12

U wisile kutxani ngu nzumani, awe nyeleti ya mixo, dihorana da wuronga! U rinzisilwe kutxani hahatshi, awe m'wisi wa matiko!

Mtuletelo 20:10

Dhiyabhulosi wu a nga ti va xengetela a to vinzwa txizivani ka mndilo ni txivavula, amu se txi nga ti ti kona txikalani ni mprofeti wa makuhu. Va na zumba ve dyiswa mihumbo wusiku ni mitshikari, ngu hawa ku si gumiko.

Ezekhiyele 7:4

Diso dangu kha di na mbi kutsetsa, kambe kha ni na mbi va ni wumbilu ni nawe, aniko ni na kutsayisa madingano ni dihanyo dako do biha, manyala ako ma nava hagari kwako; se mi na tiziva ti to ani ngani Mkoma.

Luka 10:18

Ene a to va gela ku khene: “Ani ni woni Sathani a txi wa nga kukeluka ka nzuma.

Ezekhiyele 5:11

Ngu kumaha keto, ni xambanya ngu kuhanya kwangu, kuwomba Mkoma Txizimu, nguko u nyenyezisile wukhalo wangu wo sawuleka, ngu totshe ta kwa mbi tumeleka, ni otshe manyala ako, kambe ni na kuhungula, diso dangu kha di na mbi kudivalela, hambi ni ku kupfela.

Jobe 4:18

Txizimu kha txi thembi tingelozi ta txona, kambe txa mana tingelozi ti di xangile.

1 Johani 3:8

Awule a mahako txionho mbwa Sathani nguko Sathani, njionhi kukhukhela makhatoni. Mwanana wa Txizimu a ti wonekisile, kasi ku ta fuvisa mithumo ya Sathani.

2 Pedro 2:11

Kasi tingelozi, hambiko ti va palako vathu vale amu ka mtamo ni mu ka kusikota, kha ti humisi mapswi a ku si ruketela masoni ka Mkoma.

2 Pedro 2:5

kufana ni toneto Txizimu kha txa divalela kambe vathu va kale. Aniko, mbimo yi txi nga wuyisa ndambi txitimwi ka vathu va kuonha, txi to ponisa Nowa dwe, mruruteli wa wululamo, kumweko ni mtxhanu wa vathu ni vambidi va nga sala nayo.

Luka 8:31

Se ona ma to mkombela ti to asi ma yisi diphalani ko mbi gwita.

Johani 8:44

Tate wanu ngu Sathani. Se mi randa kumaha kunavela ka tate wanu. Ene i m'dayi kukhukhela kukhatani, kha zumba ditshurini, nguko kwakwe kuwalo ditshuri. Ngako a txi womba-womba makuhu, a womba-womba ngu ti i ku takwe, nguko i m'hembi ni tate wa makuhu.

Marku 5:7

Se a txi peka huwa ngu dipswi da hombe a txi khene: “I mhaka muni u ku nayo ni nathu, awe Jesu Mwanana wa Txizimu Nyatxitimwi?”

Matewu 8:29

Vona va to peka huwa va txi kha vona: “I mhaka muni hi ku nayo ni nawe, Jesu Mwanana wa Txizimu kani? U tile hawa ku ta hi xanisa, yi sinzi kuhoka mbimo kani?”

Judha 1:13

i mavimbi o leva a linene; mithumo yawe ya tingana yi pupuma nga diphutu; ndinyeleti to pepuka ati ti nga lulamiselwa txidema txa hombe txo mbi na magwito.

2 Pedro 2:9

Atiya ti womba ti to Mkoma wa sikota kuponisa vathu va wukhongeli ni kuveketa ava vo biha kasi ve ta tsayiswa ngu ditshiku do lamulwa;

Ezekhiyele 7:9

Se diso dangu kha di na mbi kutsetsa, kambe kha ni na mbi va ni wumbilu; madingano ni tinzila tako, ngu kumaha keto, ni na kunemetisela, manyala ako ma nava txitimwi kwako; se mi na tiziva taku ani Mkoma na tsayisa.

Jobe 21:30

Taku wo biha a xayiselwa ditshiku da kuhasamulwa, ni kuguletwa ngu ditshiku da txiviti kani?

Dhewuteronome 29:20

Mkoma kha na mbi m'divalela, nguko kuhenya kwakwe ni txiviti txakwe, si na tura txitimwi ka eneyo m'thu, a txi welwa ngu otshe makhombo, aawa ma nga bhalwa ka diya dibhuku, se Mkoma a na pfhita ditina dakwe hahatshi ka nzuma.

Varoma 11:21

Nguko, akuwa Txizimu txi nga mbi divalela Vajudha i ku madhavi a txona, na nawe kha txi na mbi kudivalela.

Masalmo 78:50

Txi to leka kuhenya ka txona ku txi ya masoni, kha txa va hulukisa ka lifo! Txi to ningela wutomi wawe ka mtungu!