2 Makronika 7:21 - Bhiblia Yo Sawuleka

²¹ Se nyumba yiya yi nga guletwa ngutu, ni mmhi wu a no pinda ngu hawa, a na xamala, a txi khene: Ngu kutxani Mkoma e maha to nga tiya ka ditiko diya ni ka vathu vava kani?

2 Makronika 7:21 Referans Kwoze

Jeremiya 19:8

Ni na maha didhoropa diya diva txidiwukiso ni txiruko; ni wihi a no pinda ngu kona, a na diwuka aha koza e veta mloti ngu kuxamala, ngu mhaka ya otshe makhombo eyo.

Jeremiya 50:13

Ngu mhaka ya kuhenya ka Mkoma, kha ku na mbi zumba m'thu, ku na maha txiwula, ni mmhi a no pinda ngu Bhabhilona a na xamala ni kuveta mloti, a txi wona tiphango ta kona.

Jeremiya 49:17

Ngu toneto, Edhomi a na va txixamaliso; ni wihi a no pinda ngu kona a na xamala, a na veta mloti ngu mhaka ya sikarato sa kona.

Jeremiya 22:28

Ina m'thu wuwa Jokoniya njiya txo fayeka ni kunyenywa, a txi txi si vhuniko txilo kani? Kasi a leketwe txani ni vanana vakwe va txi ya tshotshwa ka ditiko va si di ziviko kani?

Jeremiya 13:22

Ngako u txi womba mbiluni kwako, u txi khawe: “Ti tisa kutxani kwangu ta ku nga tiya kani?” Ziva ti to u vhunungutwe syambalo sako, ngu mhaka ya kubiha kwako ka hombe, ni sizenende sako si pekilwe.

Jeremiya 5:19

Ngako va txi kha vona: Ngu kutxani Mkoma Txizimu txathu a nga hi mahela tiya kani? U na va gela u txi khawe: Kunganu mi nga ni leka, mi phaxela simwani sizimu ditikoni kwanu; ngutoneto, mi na thumela vamatiko ditikoni kova i si nga kwanu.

2 Makronika 29:8

Se kuhenya ka Mkoma kutota ka va ka Judha ni Jerusalema, e va ningela ka pfilu-pfilu, ka kuhoxotwa, ni txisekiso, nga ti anu mi ti wonako ngu maso anu.

Jeremiya 22:5

Aniko ngako mi si engisi tiya timhaka, na xambanya ngu wutumbu wangu, kuwomba Mkoma, a ti taku ayiya nyumba yi na va dirumbi.