2 Makronika 6:5 - Bhiblia Yo Sawuleka

⁵ Kukhukhela ditshiku dile ni nga thavisa vathu vangu ditikoni da Egipta, kha na sawula didhoropa ni da dimwedo ka totshe tihunzu ta ka Israyeli kasi kuaka nyumba, kasi ni veka kona ditina dangu. Futhi kha na sawula m'thu awu no thangela vathu vangu va Israyeli.

2 Makronika 6:5 Referans Kwoze

Dhaniyeli 9:19

Awe Mkoma, engisa! Awe Mkoma, divalela! Awe Mkoma, hi pfisise, maha u nga swele; ngu kuranda kwako, awe Txizimu txangu; nguko didhoropa dako ni vathu vako va dhanwa ngu ditina dako.

1 Vafumeli 8:16

Kukhukhela ka ditshiku dile ni nga thavisa vathu vangu va ka Israyeli ngu Egipta, kha na sawula didhoropa ni da dimwedo ka tihunzu ta ka Israyeli kasi kuaka nyumba, kasi ni veka kona ditina dangu; aniko ni sawute Dhavhidha, kasi e fumela vathu vangu va Israyeli.

1 Samuwele 15:23

Nguko kutitsimba kufana ni txionho txa wuloyi, ni kutikulisa kufana ni wubihi ni kukhozela sifananiso. Nga kule awe u nga lamba dipswi da Mkoma, nene a ku lambile, kasi ku u si mahi mfumeli.

1 Samuwele 10:24

Sekoko Samuwele a to khene ka vathu votshe: Ma mona koko, awule Mkoma a nga msawula kani? Hagari ka vathu votshe, kha ku na m'thu wu a fanako nayo. Sekoko votshe vathu va to tsaka ngutu, va txi kha vona: Hanya mfumeli!

Dhewuteronome 12:11

Sekoko ku nava ni wukhalo wule a no wu sawula Mkoma, Txizimu txanu, kasi ku ditina dakwe di zumba kona; mi na tisa koneho sotshe si ni mi leletako: Miningelo yanu yo hiswa, ni miphaxo yanu, ni sa wugumi sanu, ni mningelo wo ndiwitelwa wa manzani kwanu, ni sotshe si mi nova mi di xambanyile ka Mkoma.

Dhewuteronome 12:5

aniko mi na ya khozela Mkoma, Txizimu txanu, ka wukhalo wule a no wu sawula hagari ka totshe tihunzu tanu, kasi kuveka kona ditina dakwe, ni kuva a txi zumba kona; se mi na va koneho.

Eksodha 23:21

Yi xoniphe masoni kwako, u txi engisa dipswi da yona, u nga yi eyise, nguko kha yi na mbi divalela sihoxo sanu, kambe yona yi na womba ngu ditina dangu.

Eksodha 20:24

U na ni akela txiluvelo ngu mafu, txitimwi ka txona u na maha miphaxo yako yo hiswa ni ya kudhumisa, ni timhamba ta tinvuta tako ni ta tihomu tako. Kotshe amu ditina dangu di no alakanywa kona, ni nata kwako ni ta kukatekisa.

2 Makronika 6:4

A txi khene: A na dhumiswe Mkoma, Txizimu txa ka Israyeli, a nga womba ngu txisofu txakwe ka tate wangu Dhavhidha, ni kumaha ngu dianza dakwe, a txi khene:

2 Makronika 6:6

Konkuwa ni sawute m'ti Jerusalema kasi ku ditina dangu di txi zumba kona; ni Dhavhidha kasi e fumela vathu vangu va Israyeli.

2 Vafumeli 21:4

Se a to aka siluvelo Nyumbani ka Mkoma, ikumo Mkoma a nga ti wombile ku khene: Ni na veka ditina dangu Jerusalema.

1 Makronika 17:5

nguko kha ni khali kuzumba ka nyumba ni ya yimweyo, kukhukhela ditshiku dile ni nga humisa va ka Israyeli kala ka ditshiku da nyamsi; kambe ni tsimbila ngu ka ditenda ni ditenda, ni ka makhalo o sawuleka.

2 Makronika 6:20

Kasi ku maso ako me wonelela txitimwi ka nyumba yiya wusiku ni mitshikari, txitimwi ka wukhwlo wuwa, aha u nga womba ngu yona ku khawe: Ditina dangu di nave hale; kasi u engisa mkombelo wu txithumi txako txi no maha ka wukhalo wuwa.

2 Makronika 7:16

Nguko konkuwa ni sawute nyumba yiya, ni yi sawulekisa, kasiku wu veka kona ditina dangu yotshe mbimo; se maso angu ni mbilu yangu si na zumba kona mule masiku otshe.

2 Makronika 12:13

Se mbimo yile mfumeli Robhowamu mwana Solomoni, a nga fuma Judha; a to khata kufuma a di ni mune wa magumi a malembe ni dimwedo, se a to fumela Jerusalema digumi da malembe ni mtxhanu ni mambidi, ka didhoropa dile Mkoma a ngadi sawula hagari ka totshe tihunzu ta ka Israyeli kasi kuveka ditina dakwe kona; se ditina da mwamwakwe i ti ti Nahama Muamoni.

2 Makronika 20:8

Se va to aka ka dona ni kuakela ditina dako nyumba yo sawuleka va txi kha vona:

2 Makronika 20:9

Hi txi humelelwa ngu to biha, ti yimbi, mitungu mwendo nzala, athu i naya ema masoni ka nyumba yiya ni masoni kwako; nguko ditina dako di nyumbani muwa; hi nata huwelela tixaniso tathu se awe u na hi engisa u txi hi hulukisa.

2 Makronika 30:8

Mi nga bangiseni tithamo tanu kufana ni vatate vanu kambe ningelani dianza danu ka Mkoma se mi wulela amu ka wukhalo wo sawuleka awu ene a nga wu basisa ngu ha ku si gwitiko, mi thumela Mkoma Txizimu txanu, kasi ku kuhenya kwakwe kuhambuka kwanu.

2 Makronika 33:4

Se a to aka siluvelo Nyumbani ka Mkoma, amu Mkoma a nga womba a txi khene: Ditina dangu di na zumba Jerusalema ngu hawa ku si gwitiko.

2 Makronika 33:7

Manasi a to veka txithombe txo vatwa, e txi emisa Nyumbani ka Txizimu; amule Txizimu txi nga nga womba ka Dhavhidha ni ka mwanana wa kona Solomoni ku khene: Ka yiya nyumba, kona Jerusalema, i ku kona ni nga kusawula hagari ka totshe tihunzu ta ka Israyeli, ni na veka ditina dangu ngu ha ku si gwitiko.

Ezra 7:16

Kumweko ni silivhela ni nzalama mi nga yi manako ka dotshe ditiko da Bhabhilona, ni sile vathu ni vaphaxeli va nga ningako, ngu kuranda kwawe, Nyumbani ka Txizimu txawe, txi txi zumbako Jerusalema.

Zakariya 3:2

Aniko Mkoma a to khene ka Sathani: Mkoma wa kukawuka awe Sathani, ina, Mkoma, wu a nga sawula Jerusalema, wa kukawuka; ina hi nga txisoso txo thaviswa ha mndiloni kani?