2 Makronika 32:23 - Bhiblia Yo Sawuleka

²³ Vathu vavangi va to tisa simaha Jerusalema, ku ta ninga Mkoma, ni simaha sa lisima ngutu ve ta ninga Ezekhiya, mfumeli wa va ka Judha, kukhukhela koneho a to guleka masoni ka matiko otshe.

2 Makronika 32:23 Referans Kwoze

2 Makronika 17:5

Mkoma a to tsanisa wukoma mawokoni kwakwe, votshe va ka Judha va to ta luva Josafati; a to mana thomba yayingi ngutu ni wudhumo wa hombe ngutu.

Matewu 2:11

Se va di wulete nyumbani, va mani mwanana ni mame wakwe Mariya, se va to khizama, ve mu khozela; va di tute mikwama yawe va to mluva ngu nzalama ni dibaselo ni mira.

2 Makronika 9:24

Se mmweyo ni mmweyo a txi ta mninga siya sa silivhela ni siya sa nzalama, syambalo, ni matxhari, ni makha, ni mahantxhi, ni mamula; tximwetxo ni tximwetxo ngu dilembe ni dilembe.

2 Makronika 1:1

Se Solomoni, mwana Dhavhidha, a to tsana amu ka mfumo wakwe; aniko Mkoma, Txizimu txakwe, a ti ni nene, atxi mkulisa ngutu.

Masalmo 72:10

Vafumeli va Tarxixi ni va sitondolo va na m'luva; vafumeli va Sabha ni va Sebha va na rumela tinduvo!

Masalmo 68:29

Dithepele dako di maneka Jerusalema; vafumeli va tsula koneyo va txi ya ku mahela siningo.

Ezra 7:27

A na dhumiswe Mkoma, Txizimu txa vatate vathu, a nga thela timhaka tongeto mbiluni ka mfumeli, kuva hi tshurisela Nyumbani ka Mkoma, kona Jerusalema.

2 Makronika 17:11

Vamwani Vafilista va ti ti luva Josafati ngu male ya resa; Hambi Marhabi ma to mluva ngu sifuyo sa sidotho i ku siya: 7.700 wa tihamba ni 7.700 wa vamabhongwe.

1 Makronika 29:25

Se Mkoma a to kulisa Solomoni, ngutu-ngutu masoni ka votshe va ka Israyeli; e kulisa mfumo wakwe, kupinda wa vafumeli votshe vale va nga maneka ka Israyeli.

1 Vafumeli 10:25

Se mmweyo ni mmweyo a txi ta mninga siya sa silivhela ni siya sa nzalama, ni syambalo, ni matxhari, ni sithimbelo so bhumula ni mahantxhi ni mamula; tximwetxo ni tximwetxo ngu dilembe ni dilembe.

1 Vafumeli 10:10

Se a to ninga mfumeli 120 wa titalenta ta nzalama, ni tixakaxaka tatingi ta makha, ni marigwi a lisima; kha kuzivi kuta makha amangi ngutu ku nga tiya mfumeli wa txisikati wa Sabha a nga ningisa tona ka mfumeli Solomoni.

1 Vafumeli 4:21

Solomoni a ti ti khozisa yotshe mifumo kukhukhela mnamboni ka Ewufrate, kala ditikoni ka Vafilista, kala magwito ka Egipta; va ti mluva ni ku mthumela ka otshe masiku a kuhanya kwakwe.

2 Vafumeli 19:30

Nguko va nyumba ya ka Judha avale va nga huluka, va tshumela ve zima mikoloti hahatshi, ve wonekisa mihando txitimwi.

Masalmo 76:11

Mahani sithembiso ka Mkoma, Txizimu txanu, aniko txi ningeni asi mi nga txi thembisa. Otshe matiko a hafuhi ma na wuyise miningelo me ta luva Txizimu txi fanelako kuxoniphwa!