2 Makronika 30:13 - Bhiblia Yo Sawuleka

¹³ Ngu mtxima wa wumbidi ka dilembe ku to sengeletana vathu vavangi ngutu kona Jerusalema, ve maha m'buso wa mapawu o mbi tshumbelwa. I ti ti msengeletano wa hombe ngutu.

2 Makronika 30:13 Referans Kwoze

Masalmo 84:7

Vona va tsimbila na mtamo wu txi engetelwa ditshiku ni ditshiku kala veya ti kombisa Siyoni masoni ka Txizimu.

2 Makronika 30:2

Nguko mfumeli a ti ti mani silayelo sa vathangeli vakwe ni sa wotshe msengeletano kona Jerusalema saku va txi maha Pasika ngu mtxima wa wumbidi.

2 Makronika 30:14

Va to khukha va thavisela siluvelo asi si nga ti ti Jerusalema, ve thavisa ni totshe tikhadi to hisela ka tona dibaselo, veya si tshotsha mlongani ka kedroni.

Mitengo 9:10

Gela vanana va ka Israyeli u txi khawe: Ngako wokari hagari kwanu mwendo hangari ka tiveleko tanu, a txi tipfa ti to a nyete ngu mhaka ya kugwesa m'thu wa kufa, mwendo a mu kuendani ka dipfhumba da hombe, a fanete kuxayisa ditshiku da Pasika ya Mkoma.

2 Vafumeli 23:22

Nguko kha yi zivi ka nga mahwa Pasika yo fana ni yiya, kukhukhela ka masiku a valamuli vale va nga lamula ka Israyeli, hambi ka masiku otshe a vafumeli va ka Israyeli, ngutu-ngutu ka vafumeli va ka Judha.

2 Makronika 30:15

Sekoko ngu ditshiku da wugumi ni mune ka mtxima wa wumbidi va to phaxa mhamba ya Pasika. Vaphaxeli ni va ka Levhi va to wa tingana, ve ti basisa ve neha mningelo wo hiswa Nyumbani ka Mkoma.

2 Makronika 35:1

Josiya a to maha Pasika ya Mkoma kona Jerusalema, ve daya txihambana txa Pasika ngu ditshiku da wugumi ni mune da mtxima wo khata.