2 Makronika 19:7 - Bhiblia Yo Sawuleka

⁷ Konkuwa koko, thavani Mkoma, mi vekisa ni kuxayisa sileleto sakwe nguko kha ku na kukanganyisa ka Mkoma Txizimu txathu, hambi kuya ngu khohe ya m'thu, hambi kuamukela simaha.

2 Makronika 19:7 Referans Kwoze

Dhewuteronome 32:4

Txizimu Dirigwi, ni mthumo wa txona mbwo hetiseka. Nguko totshe tinzila ta Txizimu ti lulamile. Njizimu txa ditshuri, atxi txi ku si nga ni wubihi. Txi na ni wunene, txi lulamile.

Genesisi 18:25

Lambi, ti nave kule ni nawe eto ta kufuvisa valulami kumweko ni vabihi, u txi teka mlulami ni m'bihi u txi va maha vamwevo. Eyo mapimo ma nave kule ni nawe. Mlamuli wa ditiko dotshe, kha na mbi lamula ngu kululama kani?”

Varoma 2:11

nguko Txizimu kha txi yi ngu khohe ya m'thu.

Varoma 9:14

Se hi na khathu txani kani? Ina hi na khathu Txizimu kha txa lulama kani? Lambi!

Vakolosa 3:25

Ngu toneto, awu a mahako to wekela a na amukela hakhelo yo wekela wakwe. Txizimu kha txi yi ngu khohe ya m'thu.

Mithumo 10:34

Konaho Pedro a to khata kuwombawomba, a txi khene: “Kha ditshuri se na ti wona ti to Txizimu kha txi khedhi m'thu.

Jobe 34:19

Ngutu-ngutu Txizimu txi si nyenyiko mthangeli, hambi kukhatalela nyatithombe kupinda txisiwana; nguko sotshe mthumo wa manza a txona.

Eksodha 23:8

Kambe u nga amukele txiningo, nguko txiningo txa vhala maso avale va wonako, kambe txa jikisa timhaka ta vale va nga lulama ha banza.

Vaefesu 6:9

Nananu vakoma, mahisani toneto kwawe, mi txi leka ku va dhusetela, ngu kuziva ti to Mkoma wu i ku wawe ni wanu i mmweyo a ku nzumani, ni ti to ene kha yi ngu khohe.

Vagalatiya 2:6

Se ngu didhawa da vale va nga ti woneka nga vathangeli va kona, mwendo kambe i ti si nga vona, kha ni nga ni mhaka nato: Txizimu kha txi yi ngu khohe ya m'thu vonavo kha va nga ni kurumeta kuengetela txilo.

Matewu 22:16

Se va to m'rumela vagondiswa vawe ni va ka Herodha, va txi ya kha vona: “M'gondisi, ha tiziva ti to u na ni ditshuri ni ti to u gondisa nzila ya Txizimu ngu ditshuri, u si khatali ngu m'thu, nguko khu yi ngu txiemo txa m'thu.

Mika 7:3

Manza awe ma ti ningetetela kumaha wubihi; maxonga ma wotisela, se mlamuli a tutumela hakhelo, ni wa hombe a womba-womba ngu kunavela ka mbilu yakwe, ngu kumaha keto, vona votshe mba khulumeteli.

Isaya 33:15

Awu a tsimbilako ngu kululama, kambe a wombawombako ngu wunene, a tshotshako kule ni nene kuhumelela ngu wutsindaveti, a zuzako ngu manzani kwakwe sotshe siningo; a tsivako tinzeve kasi asi engisi kuwombawombwa ngu mnoha, ni kutsiva maso kasi asi woni kubiha,

Nehemiya 5:15

Aniko vafumeli vo khata, avale va nga fuma masoni kwangu, va ti ti nemelisela vathu, va txi va tekela sakudya ni vhinya, hahanze ka mune wa magumi a maxekele a silivhela; hambi vafana vawe va ti ti xanisa vathu; aniko ani kha na maha eto, ngu mhaka yo thava Txizimu.

1 Pedro 1:17

Ngako mi m'dhanako tito, “Tata,” ene wule a lamulako m'thu ni m'thu madingano ni mithumo yakwe, hanyani ngu txithavo yotshe mbimo ya kuhanya kwanu.

Genesisi 42:18

Kambe ka ditshiku da wuraru, Josefa a va gete ku khene: “Mahani tiya, mi na hanya, nguko ani ni thava Mkoma Txizimu.

2 Samuwele 23:3

Kuwombile Txizimu txa ka Israyeli Dirigwi da Israyeli di wombile tiya kwangu: Ku nava ni mlulami wu a no fumela txitimwi ka vathu, a na fuma ngu kuthava Txizimu.

Jobe 8:3

Ina txi ndi na sanula madingano Txizimu kani? Niku wa Mtamo-wotshe a ndi na sanula wululamo kani?

1 Samuwele 11:7

Se a to teka tihomu timbidi e daya, e wilela ngu sihango, e si rumela ka dotshe ditiko da ka Israyeli ngu manza a mitumi, a txi khene: Ni wuhi wule a no mbi huma e londeta Sawule ni Samuwele, tihomu takwe ti na mahwa tonatiya. Sekoko kuthava Mkoma kutota txitimwi ka vathu, ve huma votshe ngu mbilu yimweyo.

Jobe 13:10

Ngu ditshuri txi na mi tsayisa, ngako mi txi sawulela vathu ngu kusisala.

Masalmo 82:2

“Mi na leka ditshiku muni kulamula ko soholoka ni kuemela vabihi kani?