2 Makronika 15:7 - Bhiblia Yo Sawuleka

⁷ Kambe anu mi nga thaveni, mi nga godoliseni mawoko anu, nguko mthumo wanu u na va ni hakhelo.

2 Makronika 15:7 Referans Kwoze

1 Vakorinto 15:58

Se ngu toneto, vanathu vo randeka, zumbani mi di tsani, mi si xulwi ngu txilo. Khutalani miya masoni ka mthumo wa Mkoma, na mi txi tiziva tito, masoni ka Mkoma, mthumo wanu hi nga wa mahala.

Joxuwa 1:7

Tsana, uva ni mtamo, u tsanisa mbilu, kasi ku u txi khutalela kuxayisa yotshe milayo yi Mosi, txithumi txangu, a nga kuleleta; u nga ti hambukise ka yona, u txi ya txinene mwendo txibhabha, kasi ku u na humelela ka yotshe mithumo yako.

Vahebheru 10:35

Ngu toneto, mi nga karaleni, nguko kutimisela ku fanetwe ngu hakhelo ya hombe.

Joxuwa 1:9

Ina kha na kugela ani kani? Tsana uva ni mtamo; u nga xamale, kambe u nga thave, nguko Mkoma, Txizimu txako, a ni nawe, ni hani mu uyako kona.”

1 Makronika 28:20

Se Dhavhidha a to khene ka mwanakwe Solomoni: Tsana, u nga kanakane, maha mthumo; u nga thave, hambi kudhudhumela, nguko Mkoma Txizimu, Txizimu txangu, a na va ni nawe; kha na mbi ku leka, hambi ku ku divala, kala kuza u heta wotshe mthumo wo aka Nyumba ya Mkoma.

2 Johani 1:8

Ti woneleni kasi ku mi si mwalati mihando ya kutikarata kwanu; aniko mi fanete kumana hakhelo yi yi dinganako.

Genesisi 15:1

Msana ka totshe tiya, dipswi da Mkoma di tile ka Abramu, ngu txiwoniso, di txi kha dona: “U nga thave awe Abramu, ani ngani txitxhavangu txako, hakhelo yako yi na va ya hombe ngutu.”

Masalmo 58:11

Se vathu va na womba va txi kha vona: “Kha dikhuri mlulami ana ni hakhelo! Ngu ditshuri txi ho Txizimu txi txi lamulako ha mafuni!”

Vahebheru 6:10

Nguko, Txizimu kha txi nga ni tshofu. Kha txi na kudivala mthumo wanu, ni lirando li mi nga li kombisa ka ditina da txona anu mi nga thumela vasawuleki va txona, avava ni konkuwa, mi va thumelako.

Vakolosa 3:24

Na mi txi tiziva kambe ti to Mkoma a na mi hakela ngu ku mi maha vadyi va thomba yakwe. Mkoma ngu Kristu, anu mi sithumi sakwe.

Rute 2:12

Mkoma a na hakele mithumo yako, u txi amukela hakhelo yako ka Mkoma, Txizimu txa Israyeli, atxile u nga thavela mabhapini ka txona.”

Vaefesu 6:10

Ngu kugwitisa, zumbani mi di tsani ta tinene ka Mkoma, ni ka mtamo wakwe wu si tandwiko ngu txilo.

1 Vakorinto 3:8

Awu a phayako kumweko ni wu a theletelako mati mbamwevo; se mmwani ni mmwani a na tshungulwa madingano ni mthumo wakwe.

1 Vakorinto 3:14

Se ngako mthumo wa m'thu wu di akilwe wu di tsani, muaki a na tshungulwa.

Matewu 6:6

Kambe awe, ngako u txi khongela, wulela nyumbani kwako, seka ditimba, u txi khongela ngu malengo ka Tate wako; se Tate wako a wonako ti ti ku kusisalani a na kutshumetela.”

Matewu 6:4

ti to asi u ningako si zumba kusisalani; se Tate wako a wonako kusisalani a na kutshumetela.”

Masalmo 27:14

Themba Mkoma! Tsanisa, u nga thave txilo, themba Mkoma!

Matewu 5:46

Nguko, ngako mi txi randa ava va mi randako dwe, ditshungulo muni mi na ku di mana kani? Hi nga toneto va ti mahako ni vona vakhupisi kani?

Dhaniyeli 10:19

Txi txi kha txona: U nga thave, wamwamna wo dhundeka ngutu! Kudikha ku nave ni nawe! Tsana, ina, tsana! Se a txi ngadi e womba-womba ni nani, ni to tsana ni txi khani: Womba-womba nyamne wangu, nguko wu ni tsanisile.

1 Vakorinto 16:13

Wonelelani, mi zumba mi di tsani mu ka likholo, mi hanyisa txiwamna, mi va ni mtamo.

Luka 6:35

Kasi i di anu, randani valala vanu, mahani wunene, mi txi lombisa simaha sanu ka vamwani, hambi mi si rinzeli kutshumetelwa ngu vona. Kudihelwa kwanu ku nava ka hombe, mi na va mi di vanana va Nyatxitimwi, nguko Ene wa maha wunene ka vale va si ziviko kubonga ni ka vale va tshofu.

Matewu 6:18

kasi u si woneki ka vathu ti to u ti tonile sakudya, aniko ti na ziwa ngu Tate wako a ku kusisalani, se Tate wako awu a wonako sa kusisalani, a na kutshumetela.”

Matewu 6:1

“Ti woneleni ti to mi si mahi mithumo yanu ya yinene masoni ka vathu, kasi kuwonwa ngu vona; ngako mi txi mahisa eto, kha mi na mbi tshungulwa ngu Tate wanu wa nzumani.”

Matewu 5:12

Tsakani ta tinene mi txi nengela, nguko nja hombe hakhelo yanu nzumani. Nguko va va xanisisile toneto vaprofeti va va nga mi thangela.”

Masalmo 19:11

ya gondisa wuzivi ka txithumi txako, Mkoma, awule a yi xayisako wa mana hakhelo.

Joxuwa 1:6

U fanete kuva ni mtamo, u txi tsanisa mbilu, nguko ngawe u no abanisela ditiko ka vathu vava, adi ni nga xambanya ka vatate vawe, ti to ni na va ninga.

Joxuwa 14:14

Ngu tona eto, Hebroni i thomba ya Kalebhi, mwana Jefoni Mkenezi, kala nyamsi, nguko a londetile Mkoma, Txizimu txa Israyeli, asi rereki.

2 Makronika 19:11

Tiziveni ti to Amariya, mphaxeli wa hombe a na va i di mthangeli wanu ka toshe timhaka ti ti lumbako Mkoma; se ka timhaka ta mfumo, mi na thangelwa ngu Zebhadhiya, mwana Ismayeli, mthangeli wa nyumba ya va ka Judha. Valevhi va na vhunetela ka mithumo ya dibhazani. Thumani mi di tsani, Mkoma a na va ni vale va kululama.

2 Makronika 32:7

Mahani mtamo mi tsana; mi nga thaveni txilo hambi kuwika msana ngu mhaka ya mfumeli wa Asiriya ni vathu votshe ava aku navo, nguko ava hi ku navo mbavangi kupinda ava a ku navo.

Jeremiya 31:16

Mkoma a khene: U ngaswe u txi dila, maso ako ma nga thekete mirongo; nguko mithumo yako yi na dihelwa, kuwomba Mkoma; va na wuya ngu niya ditikoni ka valala.

Zakariya 8:9

A womba tiya Mkoma wa Mabutho a Tiyimbi: Ma na ti karate manza anu motshenu, mi nga engisa masikwanano mapswi awa a vaprofeti, vale va nga ti tiho, ka ditshiku dile ku nga vekwa makhato a Nyumba ya Mkoma wa Mabutho a Tiyimbi, kasi ku dithepele di mana kuakwa.