2 Makronika 10:15 - Bhiblia Yo Sawuleka

¹⁵ Ngu toneto, mfumeli kha engisa vathu, nguko kutxitxa kuwa ku ti ta ngu ka Txizimu, kasi ku Mkoma e tsanisa dipswi dakwe, dile a ngadi womba ka Jerobhowamu, mwana Nabhate, ngu mprofeti Ayasi, wa Silo.

2 Makronika 10:15 Referans Kwoze

1 Samuwele 2:25

Ngako m'thu a txi onhela mmwani m'thu, valamuli va na mlamula; aniko ngako m'thu a txi onhela Mkoma, i mani a no mkombelela kani? Hambi keto, kha va engisa dipswi da tate wawe, nguko Mkoma a ti ti lava ku vadaya.

Isaya 19:14

Mkoma a thete moya wa wugeu hagari kwawe, se vona va to rerelisa Egipta, ngu yotshe mithumo yawe, kufana ni didevi di txi tshumelela makosa a dona.

Mithumo 4:28

Ngu konaho vona va mahile totshe ti u nga ti emisa ngu kale ngu diwoko dako ni kuranda kwako, ti to ti na maheka.

Mithumo 2:23

Ngene wu a nga ningelwa mtamoni kwanu ngu txikungo txa kutsana ni wuzivi wa Txizimu. Se anu mi mu date ngu ku mu gogotela ha txihambanoni ngu manza a vathu va i ku sindaka-milayo.

1 Vafumeli 22:20

Se Mkoma a to khene: I mani a no xenga Akabe, a txi ya fela didhoropani ka Ramoti-Gileyadhi kani? Se mmweyo a txi wombisa ti, mmwani a txi womba tile.

1 Vafumeli 12:24

Mkoma a khene: Kha mi na mbi kwelela mi txi ya wukela vananu, i ku vanana va ka Israyeli; m'thu ni m'thu a na tshumele e tsula m'tini kwakwe, nguko ani ngani ni nga maha mthumo wuwa. Se va to engisa dipswi da Mkoma, va to tshumela madingano ni kuwomba ka Mkoma.

1 Vafumeli 12:15

Mfumeli kha ngava ni mhaka ngu vathu, nguko ku va wukela kuwa kutxita ngu ka Mkoma, kasi kutsanisa dipswi dile a nga ti di wombile ngu mprofeti Ayasi, musilonita ka Jerobhowamu, mwana Nebhate.

Valamuli 14:4

Aniko tate wakwe ni mame wakwe, va ti si ti zivi ti to atiya ti txi ta ngu ka Mkoma; nguko a ti ti lava nzila ya kutsayisa Vafilista, ngako ka yona yile mbimo, Vafilista va ti ti fuma txitimwi ka Israyeli.

Johani 19:24

Se va to langana, va txi kha vona: “Hi ngadi vharuleni, aniko he xaxuveni tixolo, kasi kuwona ti to di na lumba mani.” Ngu koneho ku nga tatiseka dipswi da Mibhalo, adiya di ku kha dona: “Va abanete syambalo sangu, ve xaxuva tixolo ngu dibhaji dangu.” Ngu toneto, ma nga mahisa tona masotxhwa.

2 Makronika 9:29

Se ngu wungi wa mithumo ya Solomoni, ni totshe tile a nga maha, ti ngava ti sa bhalwa amu ka dibhuku da matimu a Nathani mprofeti, ni ka wuprofeti wa Ayiya wa Siloni, ni ka siwoniso sa Idho m'huti, ngu Jerobhowamu mwana Nebhate?

Dhewuteronome 2:30

Aniko Seyoni, mfumeli wa Hesibhoni, kha hi tumelela ti to hi pinda ngu ditikoni kwakwe, nguko Mkoma, Txizimu txako, a hangalasile moya wakwe ni mbilu yakwe, kasi ku e mningela manzani kwako, nga ti ti nga maheka kala ni nyamsi.

2 Makronika 10:14

Se a to va xamula mandingano ni mapswi a vafana kuloni, a txi khene: Tate wangu a nemetisile mrwalo wanu, aniko ani na engetela ku wunemeta kambe; tate wangu a mi tsayisile ngu sisephu, kambe ni na mi tsayisa ngu tihume.

2 Makronika 11:4

Mkoma a womba tiya: Mi nga kweleleni hambi ku yalwa ni vananu; mmwani ni mmwani a na tshumelele nyumbani kwakwe, nguko ngani ni nga maha eto. Se va to engisa dipswi da Mkoma ve tshumela, ve leka kuya wukela Jerobhowamu.

2 Makronika 22:7

Sekoko kuloviswa ka Akaziya i ti ti kuranda ka Txizimu, ngu mhaka ya kuya ka Joramu, nguko mbimo yile a nga hoka a to xoma yimbi ni Joramu ve lwa ni Jewu mwana Ninisi, awule Mkoma a nga mtota kufuvisa nyumba ya ka Akabe.

2 Samuwele 17:14

Sekoko Abhisalome ni votshe vavamna va ka Israyeli va to kha vona: Mapswi a Husayi, muariki, ma pfala kupinda a Ayitofeli ( nguko Mkoma a rumisile toneto, kasi kutxhipisa mapswi amanene a Ayitofeli, kuva Mkoma e tisa dikhombo txitimwi ka Abhisalome).