2 Makronika 1:12 - Bhiblia Yo Sawuleka

¹² Wuzivi ni wutxhari ni na kuninga, se kambe na kuninga tithomba, ni mikhokhola, ni nduma, asile si nga mbi manwa ngu mfumeli wo khata, kha si na mbi manwa ngu m'thu ka vale vatako msana kwako.

2 Makronika 1:12 Referans Kwoze

Jakobe 1:5

Se ngako mmweyo wanu a txi pwata wutxhari a na wu kombele ka Txizimu, atxi txi ningako votshe vathu ngu wunene, na txi si feleli, a na ningwa.

2 Makronika 9:22

Sekoko mfumeli Solomoni a to pinda (pala) votshe vafumeli va ha mafuni ngu tithomba ni wuzivi.

Matewu 6:33

“Kukhata, lavani Mfumo wa Txizimu ni kululama ka txona, ani sotshe siya mi na engetelwa.

Vaefesu 3:20

Txi na dhumiswe Txizimu, txi sikotako kumaha sasingi ngutu kupinda asi hi txi kombelako mwendo asi hi si pimisako, ngu mtamo wu, txi thumako ngu wona kwathu,

1 Makronika 29:25

Se Mkoma a to kulisa Solomoni, ngutu-ngutu masoni ka votshe va ka Israyeli; e kulisa mfumo wakwe, kupinda wa vafumeli votshe vale va nga maneka ka Israyeli.

Ekleziyaste 2:9

Se ni to kula, ni anda kupinda votshe vale va nga fuma Jerusalema, ni sanzi ku va ho; ni wutxhari wangu wu to simama kwangu.

1 Makronika 29:12

Se tithomba ni wudhumo si ta ngu kwako, awe wa fuma txitimwi ka sotshe, mtamo ni wukoma si manzani kwako; wa kulisa ni kuninga mtamo ka sotshe ngu manza ako.

Nehemiya 13:26

Ina hi nga toneto Solomoni, mfumeli wa ka Israyeli, a nga onha ngu tona, ku si nga ngadi ni mfumeli wo nga ene hagari ka matiko o tala, wa ku randwa ngu Txizimu txakwe, se Txizimu txi mveka kuva mfumeli wa dotshe ditiko da ka Israyeli kani? Hambi keto vavasikati va matiko, va to muonhisa.

Ekleziyaste 5:19

Se ka m'thu wule Txizimu txi nga mninga tithomba ni mipeto, ni mtamo wa ku tidya, a txi teka txyavelo txakwe, e ti tsakela ngu mthumo wakwe, etxo njiningo txa Txizimu.

1 Vafumeli 10:24

Se vathu va dotshe ditiko va txi lava kuwona khohe ya Solomoni, kasi vepfa wutxhari wule Txizimu txi nga ti vekile mbiluni kwakwe.