1 Vakorinto 2:1 - Bhiblia Yo Sawuleka

¹ Vanathu, mbimo yi ni nga ta kheyo kwanu, kasi ku ta mi fakazela mapswi a Txizimu, kha na tela ku ta womba-womba mapswi a kutiguleta mwendo o komba wuzivi.

1 Vakorinto 2:1 Referans Kwoze

1 Vakorinto 1:17

Nguko Kristu kha ni rumela kubhabhatisa, aniko a ni rumete kutxhumayela Evhangeli, i si nga ngu kutxhumayela ka wutxhari wa txisofu, kasiku ni si thavisi lisima Txihambano txa Kristu.

1 Vakorinto 2:13

Timhaka tiya kha hi ti xawuteli ngu mapswi a wutxhari wa txithu, aniko hi ti xawutela ngu mapswi ale hi gondiswako ngu Moya wo Sawuleka, i ku mapswi awa ma xawutelako timhaka ta Moya ngu mawombelo a Moya.

1 Vakorinto 2:4

Dipswi dangu ni kutxhumayela kwangu i ti si nga sa kukomba wuzivi wa ha mafuni, aniko i ti mapswi a kutsaniswa ngu Moya ni mtamo wa Txizimu;

2 Timoti 1:8

Ngu toneto, u nga telwe ngu tingana kufakazela Mkoma Wathu, hambi kufakazela ani ni ku txibotxhwa ngu kota yakwe, aniko sengela ni nani kuxanisekani kwangu ngu mhaka ya Evhangeli, u txi tsaniswa ngu mtamo wa Txizimu,

Varoma 16:18

Nguko ava vo ngeto kha va thumeli Mkoma wathu Jesu Kristu, kambe va thumela masusu awe dwe; va hambukisa timbilu ta va vo divala ngu mapswi o tshamba ni kukanganyisa.

Eksodha 4:10

Sekoko Mosi a to khene ka Mkoma: “Yowe! Mkoma! Ani kha ni nga m'thu wo womba-womba ta tinene, hambi nyamnova, hambi nyatulo, hambi nyamsi konkuwa u nga womba-womba ni txithumi txako; kha ni sikoti kuwombawomba ta tinene, nguko ni m'thu wa kukangamela ni txidimiti.”

2 Vakorinto 11:6

Hambi ni sa txhariha ngu mapswi, kambe wuzivi ni nawo ka sotshe simaha ni ka totshe tinzila ti hi nga mi kombisa tona.

Mtuletelo 1:2

awu a xambanyako ti to totshe ti a nga ti wona i Dipswi da Txizimu ni wufakazi wa Jesu Kristu.

1 Johani 4:14

Se athu hi ti woni, kambe ha fakaza ti to Tate a rumete Mwanana wakwe ku ta maha Muhanyisi wa ditiko.

2 Vatesalonika 1:10

mbimo yi a nota ka edo ditshiku, kasi ku ta dhumiswa hagari ka vasawuleki vakwe, ni ku ta xamalwa hagari ka vale va nga kholwa kwakwe, kufana ni nanu mi nga amukela wufakazi wathu.

1 Vakorinto 1:6

Ngu toneto, wu tsanisilwe kwanu wufakazi wathu ka Kristu,

Mithumo 22:18

se ni txi wona Mkoma, a txi ni gela ku khene: ‘Kuluveta, u txi khukha Jerusalema, nguko vathu va kona kha va na mbi amukela wufakazi wu u wu wombako kwawe ngu ngani.’

Mithumo 20:21

Kufakaza kwangu i ti ka kulaya Vajudha ni Vagriki, kasiku ve hunduluka ve kholwa ka Txizimu, ni ka Mkoma wathu Jesu Kristu.”

Isaya 8:20

Amu ka mlayo ni mu ka wufakazi! Ngako va si wombi dipswi diya, kha va na mbi dhuka ve wona wuronga.

Mtuletelo 19:10

Konako ni to ti wisa minengeni ka ngelozi, kasiku ni yi khozela, aniko yona yi to ni tsimba, yi txi kha yona: “Lambi! U nga mahe eto. Ani ni txithumi kufana ni nawe ni vakakwanu va veketako wufakazi wa Jesu. Txizimu ngu txona u fanelako ku txi khozela!” Kunene wufakazi wa Jesu ngu wona i ku mtamo wa wuprofeti.

Mtuletelo 1:9

Ani, Johani, ani ni ku mwananu, na kambe ni ku mmweyo wanu, amu ka sixaniso, ni mu ka mfumo, ni mu ka kutimisela ditinani ka Jesu Kristu, ani ni ti Txitondoloni ka Patmosi ngu mhaka ya dipswi da Txizimu ni kufakazela Jesu.

1 Timoti 1:11

yi engisanako ni Evhangeli yi yi nga vekwa manzani kwangu, ayi yi pfalisako Txizimu, i ku txisima txa makatekwa.

2 Vakorinto 10:10

Nguko va kha vona, mapapilo akwe ma nemela, ma ni mtamo, aniko a diho ene ngu wutumbu hagari kwathu, kha nga ni mtamo, ni mapswi akwe kha ma vhuni txilo.

Varoma 16:25

Ka wule a ku ni mtamo wa ku mi tsanisa ka Evhangeli yangu, madingano ni kutxhumayela ka Jesu Kristu ni kuwonekeliswa ka msisalo wu wu nga ti tumbetilwe kukhukhela ka mbimo ya kale ni kale,

1 Vakorinto 2:7

Aniko athu hi gondisa wuzivi wa Txizimu, awu wu nga tumbetwa ngu makungo a txona, txi txi nga sisala ni konkuwa, awu wu nga sikelwa ngu kale ni kale ti to wu na maha wudhumo wathu,