1 Vafumeli 8:42 - Bhiblia Yo Sawuleka

⁴² (nguko va na pfa ngu ditina dako da hombe, ni dianza dako da mtamo, ni diwoko dako do nawuluka), se a txi ta khongela ka yiya nyumba.

1 Vafumeli 8:42 Referans Kwoze

Dhewuteronome 3:24

“Mkoma Txizimu, se u khatile kukombisa ka txithumi txako, wuhombe wako ni dianza dako da mtamo; nguko njizimu muni txi kuho nzumani ni mafuni, txi nga sikotako kumaha mithumo yo nga yako, ngu mtamo wo fana ni wako kani?

Mithumo 8:27

Se ene a to khukha e tsula. Se mmweyo wamwamna wa Muetiyopiya, i nga ti mthenwa ni mthangeli wa hombe wa Kandake, mfumeli wa wamsikati wa Etiyopiya, ni muwoneleti wa txotshe txuma txakwe, awu a nga ti tile Jerusalema ku ta khozela;

Zakariya 14:16

Ku na maheka taku, votshe vale va no sala, ka otshe matiko ale ma nga lwisa Jerusalema, ma na kwelela dilembe ni dilembe, kuya khozela Mfumeli, Mkoma wa Mabutho a Tiyimbi, ni kuya maha m'buso wa Midhuti.

Dhaniyeli 4:37

Se konkuwa koko, ani Nebhukodhonosori, na bonga, na guleta ni kudhumisa Mfumeli wa nzumani; nguko mithumo yakwe yotshe di ditshuri, ni tinzila takwe do lulama, kambe wa sikota kuveka hahatshi a vale va tikulisako.

Dhaniyeli 3:28

Se Nebhukodhonosori a to womba, a txi khene: Ku na bongwe Txizimu txa Xadreke, ni Mixake, ni Abhedhi-Nego, txile txi nga rumela Ngelozi ya txona ku ta hulukisa sithumi sa txona, sile si nga themba ka txona, nguko kha va lava kulondisa dipswi da mfumeli, ve tumela kuningela mmidi yawe, kasiku va si thumeli hambi kukhozela tximwani txizimu txokari, hahanze ka Txizimu txawe.

Dhaniyeli 2:47

Mfumeli a to xamula ka Dhaniyeli, a txi khene: Ngu ditshuri, Txizimu txanu, Njizimu txa sizimu, kambe Mkoma wa vafumeli, ngene m'zivisi wa sihunja, nguko u sikoti kuwonekisa txihunja txiya.

Ezekhiyele 20:9

Ati ni nga maha koko, i mhaka ya kuranda ditina dangu, kasi di si ruketelwi masoni ka vamatiko, vale va ku hagari ka vona, avo ni nga ti wonekisa ka vona, kasi ku va humisa Egipta.

Jeremiya 32:17

O! Mkoma Txizimu! Ngawe u nga maha nzuma ni mafu ngu mtamo wako wa hombe ni diwoko dako di nga nawulutwa; kha ku na txilo txi tandako kwako:

Jeremiya 31:11

Nguko Mkoma a txhatxhisile Jakobe, a txi mtirula ka dianza di ku ni mtamo kupinda ene.

Jeremiya 3:19

Se ani ni txi khani: Ni na kuvekisa kutxani hagari ka vanana, ni na kuninga ditiko da kunaveleka, i kuthomba ya mabutho a matiko kani? Ni txi khani: Mi na ni dhana mi txi khanu: Tata. Kha mi na mbiswa mi phawuka mi txi ni siya.

Isaya 63:12

wule diwoko dakwe do dhundeka, a nga maha ti to di tsimbila ka dianza da txinene da Mosi kani? A nga abanisa mati masoni kwawe, kasi ku ti mahela ditina da kwa mbi gwita kani?

Isaya 51:9

Vhumuka, vhumuka, ti ambeke mtamo, awe diwoko da Mkoma; vhumuka kufana ni masiku ale ma nga pinda, kufana ni ka tiveleko ta kale; ina hi ngawe u nga wilela Rahabhi ngu sitxuwu, ni kudaya mwamilambo kani?

Masalmo 136:12

Ngu dianza da mtamo ni diwoko do nawulutwa; nguko lirando lakwe nda kala kupinduka!

Masalmo 89:13

Diwoko dako di ni mtamo, dianza dako di tsani, dianza dako da txinene di ni wurena!

2 Makronika 32:31

Vathangeli va Bhabhilona va to rumela mitumi ka Ezekhiya, kuya wotisa ngu timhaka ta txidiwukiso a txi txi nga maheka ditikoni, Txizimu txi to mleka ve m'duka, kasi ku txi ziva totshe ti tiku mbiluni kwakwe.

2 Vafumeli 17:36

Aniko ka Mkoma, a nga mi humisa ngu mtamo wa hombe ditikoni ka Egipta, ni diwoko do nawulutwa, mi na thava enewu, ni ku mkhizamela, mi phaxela kwakwe.

Joxuwa 7:9

Va txo tiengisa eto Vakanana, ni votshe vaaki va ditiko, va na hi ranganyeta, va txi fuvisa ditina dathu ha mafuni; sekoko u na maha txani ngu ditina dako da hombe kani?”

Dhewuteronome 4:34

Mwendo njizimu txokari txi nga duketa kuya teka vathu hagari ka vamwani vathu, ngu mithumo ni sikombiso, ni sixamaliso, ni kulwa ngu dianza do tsana, di nga guleka ni mithumo ya hombe yo thisa ku nga totshe tile Mkoma, Txizimu txako, a nga ti maha ditikoni ka Egipta, na anu mi txi ti wona kani?

Dhewuteronome 4:6

Yi xayiseni mi txi yi maha milayo yiya, nguko ewo wu na va i di wona wuzivi wanu ni mapimo anu, kuwonani ka vathu votshe. Ngako va txi engisa yotshe milayo yiya, vona va na womba va txi kha vona: “Adiya ditiko da hombe da vathu va kuziva ni kupima!”

Eksodha 15:14

Vathu va na tipfa, va na dhudhumela; Vazumbi va ditiko da Vafilista va ñolwa ngu kuthava.

Eksodha 13:14

Ngako mangwana wa ditshiku vanana vanu va txi mi wotisa va txi kha vona: “Toneto ti womba txani kani?” Mi na xamula mi txi khanu: Mkoma a hi humisile ditikoni ka Egipta, nyumbani ka wukhumbi, ngu dianza da mtamo.

Eksodha 9:15

Nguko, i ti ku ani ni ti guletile dianza dangu ni txi kupeka awe ni vathu vako ngu mtungu wa lifo, nga u di fuvile ha mafuni;

Eksodha 3:19

Ani na tiziva ti to Faro, mfumeli wa Egipta, kha na mbi mi leka mi txi tsula, hahanze ko kurumetwa ngu dianza da mtamo.

Eksodha 13:3

Se Mosi a to khene ka vathu: Di alakanyeni ditshiku diya, adi mi nga huma ngu dona ditikoni ka Egipta, nyumbani ka wukhumbi, nguko Mkoma a mi humisile kona ngu dianza da mtamo; se ngu mhaka yeto, kha mi na mbi dya dipawu do tshumbelwa ka ditshiku donedo.

Joxuwa 4:24

Kasi ku votshe vathu va ha mafuni, va txi ziva tito, dianza da Mkoma nda mtamo, kasi ku mi txi thava Mkoma, Txizimu txanu, otshe masiku.

1 Vafumeli 8:41

Mu engise nene mluveli wule i singako wa vathu vako va ka Israyeli, wa kuva a tako ngu ka matiko a kule, ngu kuranda ditina dako

2 Vafumeli 19:19

Konkuwa koko, awe Mkoma, Txizimu txathu, thumelwa ngu kuva u di hi txhatxhisile, ngu kumaha keto, yotshe mifumo ya ha mafuni yi na tiziva ti to ngawe wekha u Mkoma Txizimu.

Eksodha 6:6

Ngu mhaka yeto, u na womba ka vanana va ka Israyeli u txi khawe: Ani ngani Mkoma, kambe ni na mi humisa ka mithumo yo nemela ya ditikoni ka Egipta, ni na mi thusa wukhumbini kwanu, kambe ni na mi tirula ngu dianza dangu da mtamo ni mthumo wa hombe wa kulamula.

Mitengo 15:14

Mluveli a hanyako hagari kwanu, mwendo m'thu wuhi ni wuhi mi nga aka nayo, ngako a txi lava kusenga mningelo wa mphaxo wo hiswa, kasi kubhumulisa ka Mkoma, a na ningela kufana ni nanu.

Jeremiya 27:5

Ngani ni nga va nga ditiko, ni vathu, ni sihari si si kuho ha mafuni, ngu mtamo wangu wa hombe ni diwoko dangu di nga nawuluka, na si ninga ka wu ni randako ku mninga.

Ezekhiyele 20:33

Na hanya ani, kuwomba Mkoma Txizimu, nguko ngu dianza da mtamo, ni diwoko do nawuluka, ni kuhenya ku nga theketwa, ni na fuma txitimwi kwanu.