1 Vafumeli 8:16 - Bhiblia Yo Sawuleka

¹⁶ Kukhukhela ka ditshiku dile ni nga thavisa vathu vangu va ka Israyeli ngu Egipta, kha na sawula didhoropa ni da dimwedo ka tihunzu ta ka Israyeli kasi kuaka nyumba, kasi ni veka kona ditina dangu; aniko ni sawute Dhavhidha, kasi e fumela vathu vangu va Israyeli.

1 Vafumeli 8:16 Referans Kwoze

1 Samuwele 16:1

Sekoko Mkoma a to khene ka Samuwele: U na dilela Sawule kala yihi mbimo, akule ani ni nga mlamba, kasi ku asi fumi txitimwi ka Israyeli kani? Tata litxheho lako ngu mafura se wuta; ni ta kuruma ka Jese, wa Bhetlehema; nguko ni ti sawulete mfumeli hagari ka vanana vakwe.

1 Makronika 28:4

Se Mkoma, Txizimu txa Israyeli, a ni sawute hagari ka yotshe nyumba ya tate wangu, kuva ni fumela kala kupinduka txitimwi ka va ka Israyeli; nguko a sawute Judha kuva mthangeli, ni nyumba ya tate wangu, ka nyumba ya ka Judha; hagari ka vanana va tate wangu a tsakisilwe ngu ngani, kasi ku e ni maha mfumeli txitimwi ka votshe va ka Israyeli.

1 Vafumeli 8:29

Kasi ku maso ako me wonelela txitimwi ka nyumba yiya wusiku ni mitshikari, txitimwi ka wukhalo wuwa, aha u nga womba ngu yona ku khawe: Ditina dangu di nave hale; kasi u engisa mkombelo wu txithumi txako txi no maha ka wukhalo wuwa.

Dhewuteronome 12:11

Sekoko ku nava ni wukhalo wule a no wu sawula Mkoma, Txizimu txanu, kasi ku ditina dakwe di zumba kona; mi na tisa koneho sotshe si ni mi leletako: Miningelo yanu yo hiswa, ni miphaxo yanu, ni sa wugumi sanu, ni mningelo wo ndiwitelwa wa manzani kwanu, ni sotshe si mi nova mi di xambanyile ka Mkoma.

Masalmo 132:13

Ngu toneto, Mkoma a sawute mmango wa Siyoni, na a txi xuva ku wu maha nyumba yakwe, a txi khene:

Jeremiya 7:12

Tsulani koko ka wukhalo wangu wu nga ti manekela Silo, aho di nga ti zumbile kona ditina dangu kukhatani, mi txi ya wona ti ni nga maha, ngu mhaka ya wubihi wa vathu vangu va ka Israyeli.

Masalmo 78:70

A sawute kambe Dhavhidha txithumi txakwe, awu i nga ti m'dyisi wa tinvuta;

Nehemiya 1:9

Se anu mi na hundulukela kwangu mi xayisa milayo yangu, mi txi yi maha; sekoko, hambi ngako avale va nga lekwa va txo va magwito ka nzuma, ni na va sengeleta koneyo, ni va wuyisa ka wukhalo wule ni nga wu sawula, kuva ditina dangu di txi zumba ka wona.

2 Vafumeli 23:27

Se Mkoma a to khene: Kambe Judha ni na mthavisa masoni kwangu, ku nga kule ni nga thavisa Israyeli, ni na tsukula didhoropa diya da Jerusalema ni ngadi sawula, kumweko ni nyumba yile ni nga khani: Di nava konemo ditina dangu.

1 Vafumeli 11:36

Se mwanana wakwe ni na mninga lihunzu limwelo, kasiku txithumi txangu Dhavhidha a na va ni dilambu masoni kwangu kona Jerusalema, didhoropa di ni ngadi sawula kasi kuveka kona ditina dangu.

Dhewuteronome 12:5

aniko mi na ya khozela Mkoma, Txizimu txanu, ka wukhalo wule a no wu sawula hagari ka totshe tihunzu tanu, kasi kuveka kona ditina dakwe, ni kuva a txi zumba kona; se mi na va koneho.

1 Makronika 17:3

Kambe ka wusiku wonewo ku to maheka ti to dipswi da Mkoma di ta ka Nathani, di txi ta kha dona:

Masalmo 89:3

Awe u ti khawe: “Ni mahile txitumelelano ni msawuleki wangu, ni thembisile ka txithumi txangu Dhavhidha: