1 Vafumeli 21:3 - Bhiblia Yo Sawuleka

³ Sekoko Nabhote a to khene ka Akabe: Mkoma a na ni xayise ni si ku ningi thomba ya vatate vangu.

1 Vafumeli 21:3 Referans Kwoze

Mitengo 36:7

Ngu toneto, thomba ya vanana va ka Israyeli, kha yi na mbi pinda yiya ka lihunzu ni lihunzu; nguko vanana va ka Israyeli va na mana thomba ya lihunzu la vatate vawe.

Levhi 25:23

Mi nga xaviseni thembwe da magwito, nguko mafu ma lumba ani, anu mi valuveli, mi vapfhumba ka ditiko di mi nga aka ka dona, i ku dangu.

Ezekhiyele 46:18

Kambe mthangeli kha na mbi teka txilo ka thomba ya vathu, kha na mbi va kanganyisa ka sile si va lumbako; ka thomba yakwe apune, a na siyela thomba vanana vakwe, kasi ku vathu vangu va si tekelwi, m'thu ni m'thu ni thomba yakwe.

Varoma 6:15

Hi na txani kani? Ina hi na onha, akuwa hi ku si nga hahatshi ka mlayo, kambe hi ku hahatshi ka kateko kani?

Vagalatiya 6:14

I di ani, ti nave kule ni nani ku ti dhumisa ngu txilo tximwani, hahanze ka txihambano txa Mkoma Wathu Jesu Kristu. Kunene, ngu mhaka ya txihambano, kwangu, ditiko di bethetwe ha txihambanoni.

1 Vakorinto 6:15

Ina kha mi tizivi ti to mimidi yanu nzihango sa Kristu kani? Ina ni na teka txihango txa Kristu ni txi ningela ka digelegele kani? Lambi!

Varoma 7:13

Se, atxi i ku txa txinene, ina txa sikota ku ni vangela lifo kani? Lambi! Txionho ngu txona txi nga ni vangela kufa: Ngu kutiwonekisa nga txilo txa txinene, txi ni date kasiku txi ti kombisa ku njionho, na txi txi ti humelelisa ngu wotshe mtamo wa txona ngu mhaka ya mthetho.

Varoma 7:7

Hi na txani kani? Ina mlayo njionho kani? Lambi! Kambe idiku ku ti si nga ni mlayo, nga ni sa txi ziva txionho. Nguko ani nga ni sa ziva ti to kuho kunavela, idiku mlayo wu ti sa womba tito: “U nga navele to biha.”

Varoma 6:2

Lambi! Akuwa athu hi nga fa ngu didhawa da txionho, se hi nga hanyela txani kambe txionhoni kani?

Varoma 3:31

Se ina ho fuvisa mlayo ngu mhaka ya kukholwa kani? Lambi! Aniko ho tsanisa mlayo.

Varoma 3:6

Txima hi nga tona! Nguko, ngako i di toneto, Txizimu txi ndi na lamulisa kutxani ditiko kani?

Varoma 3:4

Lambi! Txizimu txi fanete kumaneka i di txa ditshuri, hambi votshe vathu ve maneka i di va makuhu, nga hawa ku nga bhalwa, va txi kha vona: “U fanete kuziwa ti to u lulamile ka mapswi ako, ni kumaneka u si nga ni mnandu, mbimo yi u no yiswa kulamulwani.”

Jobe 27:5

Ti nave kule ni nani taku, ni mi emela; kala kuza nifa, kha ni na mbi dhuka ni leka ditshuri dangu.

1 Makronika 11:19

Se a txi khene: Txizimu txangu u nga tumele ti to ni maha to nga tiya! Ina ani ni nga sela mnoha wa vavamna vava ni wutomi wawe kani? Nguko va ni tisete mati awa ngu kuningela wutomi wawe. Se ene kha tumela ku ma sela. Atiya ngu ti ti nga mahwa ngu tindena tile tatiraru.

1 Samuwele 24:6

se a to khene ka vathu vakwe: Mkoma a na ni xayise ku ni si maheli nyamne wangu mhaka yiya, ka wule a nga totwa wa Mkoma, ngu kuguleta dianza dangu ni mwukela, nguko mbwo totwa wa Mkoma.

1 Samuwele 12:23

Se ti nave kule ni nani kuonhela Mkoma, ngu kuleka ku mi kombelela; kambe ni na mi gondisa nzila ya yi nene ni yo lulama.

Joxuwa 24:16

Sekoko konako vathu votshe va to xamula va txi kha vona: “Ti nave kule ni nathu ta kuleka kukhozela Mkoma, hi txi ya khozela simwani sizimu!

Joxuwa 22:29

Ma nave kule ni nathu mapimo o wukela Mkoma, mwendo mapimo o leka ku mkhozela, a ha koza hi txi ti akela txiluvelo txa ku mahela kona timhamba to hiswa, mningelo wa sakudya, mwendo timhamba to hambana ni ti ti mahwako ha txiluveloni ka Mkoma, Txizimu txathu, atxi txi ku masoni ka dibhokiso dakwe.

Genesisi 44:17

Aniko Josefa a ti khene: “Ani ni kule ni kumahisa eto! M'thu wu di nga ya manekela kona digombe, eyo ngene a no va khumbi yangu; aniko anu motshenu, tshumelani ngu kuthutha mi tsula m'tini ka tate wanu.”

Genesisi 44:7

Aniko vona va to xamula va txi kha vona: “Awe nyamne wangu, ngu kutxani u txi wombiseto kani? Sithumi sako si kule ni kumaha wubihi wo ngeto!

Mitengo 36:9

Ngu mamahelo eyo, thomba kha yi na mbi pinda ka lihunzu limwelo yiya ka limwani; nguko tihunzu ta vanana va ka Israyeli, ti na mana tithomba ta tona.