1 Vafumeli 21:19 - Bhiblia Yo Sawuleka

¹⁹ Se tsula u txi ya m'gela ku khawe: Mkoma a womba tiya: Ina mwendo khu ngo m'daya u txi teka thomba kani? U na m'gela kambe ku khawe: Mkoma a womba tiya: Ka wukhalo wule timbwa ti nga danzela mnoha wa Nabhote, timbwa ti na danzela ni wako mnoha, ina mnoha wako kha ditshuri.

1 Vafumeli 21:19 Referans Kwoze

1 Vafumeli 22:38

Mbimo yile va nga ti kuwula txikotxikani dizivani ka Samariya, timbwa ti txo danzela mnoha wa Akabe (ma ti samba kona emo magelegele), madingano ni dipswi di a nga ti di wombile Mkoma.

2 Samuwele 12:9

Ngu kutxani koko, u nga eyisa dipswi da Mkoma ngu kumaha to biha masoni kwakwe kani? U date Uriya, Muheti ngu ditxhari, u tshumela u teka msikati wakwe wu mmaha wako; kambe u mdate ngu ditxhari da vanana va ka Amoni.

Matewu 7:2

Nguko mi na lamulwa nga ti mi lamulisako tona vamwani; ni mpimo wu mi pimako ngu wona vamwani, mi na pimwa ngu wona nanu.

Habhakuki 2:12

Dikhombo ka wule a akako didhoropa ngu mnoha, kambe a tsanisako didhoropa ngu wubihi.

Habhakuki 2:9

Dikhombo ka wule a sengeletako tithomba to ti mana ngu mamahelo awalo, kasi kuveka txisaka txakwe txitimwi, a txi mahela ku ti txhatxhisa ka dianza do biha.

Masalmo 9:16

Mkoma a ti wonekisile, kambe a lamute; nene m'bihi a bzwetilwe ngu mithumo yakwe yo biha.

Esteri 7:10

Hamani koko va to mtxikita ka phande yile ene a nga ti yi longisete Mordhekayi. Sekoko kuhenya ka mfumeli ku to boxa.

2 Samuwele 12:11

A womba tiya Mkoma: Wona taku ni na kuwusela dikhombo nyumbani kwako, ni na thavisa vasikati vako masoni kwako, ni va ningela ka mwakelani wako, awule a no otela ni vasikati vako ni mitshikari.

Valamuli 1:7

Sekoko, Adhoni-Bhezeki a to khene: Mtxhanu wa magumi ni mambidi a vafumeli, va nga ti wiletwe titiho ta vanyagotwe, ta manzani ni ta mikondoni, va ti ti rolela maruru hahatshi ka meza yangu; ngu kumaha keto, Txizimu txi ni tshumetete madingano ni ti ni nga va mahela. Se va to tsula nayo Jerusalema, eyo a nga ya fela kona.

Genesisi 3:11

Se Txizimu txi ti kha txona: “I mani a nga kugela ti to u tximbwiri kani? U to dya sa mndonga wule ni nga kutsimba kudya sa wona kani?”

2 Vafumeli 10:10

Ti ziveni koko konkuwa taku, ngu ka dipswi da Mkoma, adi Mkoma a ngadi womba madingano ni nyumba ya ka Akabe, kha di na kuwa walo hahatshi, nguko Mkoma wa maha tile a nga womba ngu txithumi txakwe Elija.

Jobe 31:39

Ngako ni ti dyite mihando ya mafu ni si nga ni male, ni daya vanyamne va kona,

Masalmo 68:23

Ngu toneto, u na nakanisa mikondo mu ka mnoha wawe se sirumbi sawe si na va i di sakudya sa timbwa tako.”

Ezekhiyele 46:18

Kambe mthangeli kha na mbi teka txilo ka thomba ya vathu, kha na mbi va kanganyisa ka sile si va lumbako; ka thomba yakwe apune, a na siyela thomba vanana vakwe, kasi ku vathu vangu va si tekelwi, m'thu ni m'thu ni thomba yakwe.

2 Vafumeli 6:32

Sekoko Elixa a ti ti khalahatshile kumweko ni madhota nyumbani kwakwe. Mfumeli a to rumela wamwamna masoni kwakwe; aniko asi se hoka m'thu wule, Elixa a to khene ka madhota ale: Mi ti woni ati mwanana wa txidayi a nga rumelisa tona ku ta wila msungo wangu kani? Wonisisani, a txi bwaka wu wo rumwa, msekeleni ditimba; ina kha ku na ku maheto i ti sigingo sa nyamne wakwe si pfalako ngu msana kwakwe kani?

2 Vafumeli 10:7

Ku to maheka koko taku, di ti hokile dipapilo, va to ñolela vanana va mfumeli, va mtxhanu wa magumi ni magumi mambidi, ve va dayela, ve betela misungo yawe ka tithavangu to kari, ve yi rumela Jezireyeli.

Masalmo 9:13

Telwa ngu wumbilu ngu ngani, Mkoma! Wona kuxaniswa kwangu ngu vale va ni nyenyako. Ni khukhise ha ka matimba ya lifo,

Jeremiya 34:6

Se mprofeti Jeremiya a to gela Zedhekiya, mfumeli wa ka Judha, totshe timhaka tiya, va di Jerusalema,