1 Vafumeli 21:13 - Bhiblia Yo Sawuleka

¹³ Sekoko kutota vavamna vambidi, i ku vanana va Bheliyali, va txi ta ema masoni kwakwe; se vavamna vale, vananevo va Bheliyali, va to wukela Nabhote, masoni ka vathu va txi kha vona: Nabhote a ruketete Txizimu, ni mfumeli. Se va to tsula nayo hahanze ka didhoropa va txi ya m'balisela ngu marigwi, a txi fa.

1 Vafumeli 21:13 Referans Kwoze

2 Vafumeli 9:26

Ngu ditshuri, i tiku ni sa wona nyamnova ni mitshikari mnoha wa Nabhote ni mnoha wa vanana vakwe, kuwomba Mkoma, nga ni si ku dihi wukhalo wu wa wudotho wa thembwe, kuwomba Mkoma. Konkuwa mteke u txi mtshotsha ka wukhalo wu wa wudotho wa thembwe, madingano ni dipswi da Mkoma.

Mithumo 24:5

Hi mani m'thu wuwa i ku mtungu a wusako mazunga hagari ka votshe Vajudha va ditiko. Ene i mthangeli wa mtxawa wa Vanazareta.

Mithumo 6:11

Sekoko va to xavelela vathu kasiku ve womba ku kha vona: “Hi mu pfite a txi womba mapswi a kuruka Mosi ni Txizimu.”

Johani 19:12

Kukhukhela ka yona yile mbimo, Pilato a ti zama ku mu thukunyula, kambe Vajudha va so kwangula, va txi kha vona: “Ngako u txi mu thukunyula, khu engisani ni Khezari, nguko wuhi ni wuhi a ti mahako mfumeli, a kanyisa Khezari.”

Luka 23:2

va txi khata ku mu mangalela, va txi kha vona: “Hi mani m'thu wuwa a txi kujetela ditiko dathu, a txi tsimba resa ka Khezari, a txi khene Ene ngene Mkoma Mesiya.”

Matewu 9:3

Konaho, vamwani vabhali va to alakanya timbiluni kwawe va txi kha vona: “Awu m'thu wa ruka.”

Malakiya 3:5

Se ni nata hafuhi kwanu, ku ta mi lamula, kambe ni na va fakazi ya livilo yo lwa ni valoyi, ni kuwukela vale va mahako wugango, ni vale va xambanyako ta makuhu, ni vale va kanganyisako mthumi, ve honyola madingano a tinoni, ni vo felwa ngu vaveleki, ni vawuyi, kambe kha va ni thavi, kuwomba Mkoma wa Mabutho a Tiyimbi.

Amosi 7:10

Sekoko Amaziya, mphaxeli wa Bheteli, a rumisa kugela Jerobhowamu, mfumeli wa ka Israyeli: Amosi a womba-womba kubiha ngu ngawe hagari ka vathu va ka Israyeli; mafu ma na mbi xaniswa ngu mapswi otshe ya a ma wombako.

Isaya 8:21

Se va na rendelekela ditiko, ve xaniseka, ni kupfa nzala; ni mbimo yi va pfako nzala, va na henya, ve ruketela mfumeli wawe, ni Txizimu txawe, ve wonetela txitimwi.

Ekleziyaste 10:20

U nga ruketele mfumeli, hambi ngu mapimo ako, nikakudotho u nga ruketele nyatithombe, hambi u di nyumbani kwako; nguko sinyana sa nzumani si nga rwala mhaka ya kona, se sile si ku ni tibhapi si nga ya hangalasa mhaka.

Ekleziyaste 4:1

Msana keto, ni to engeta ni wona sotshe sixaniso si si mahekako hahatshi ka ditambo; se ni to wona mirongo ya vale va xaniswako, ni ya vale va pwatako mthaveleli; kambe mtamo wu ti ti ka didhawa da vaxanisi vawe; aniko vona va si nga ni mthaveleli ni wammweyo.

Mavingu 25:18

M'thu wu a fakazako makuhu, e wukela mwakelani wakwe, txibando, ni ditxhari ni lingove lo hinda.

Mavingu 19:9

Fakazi ya makuhu kha yi na mbi huluka kutsayiswa; se ni wule a wombawombako makuhu, a na lova.

Mavingu 19:5

Fakazi ya makuhu kha yi na mbi va ni ditshuri; ni wule a wombawombako makuhu, kha na mbi huluka.

Mavingu 6:19

wufakazi wa walo wo womba-womba makuhu, ni wule a phayako mazunga ka vanawe.

Masalmo 35:11

Tifakazi ta makuhu ti ni wukete, ti ni wotisile ngu timhaka ti ani ni nga mbi ti maha.

Masalmo 27:12

U nga ni ningele ka valala vangu, avale va ni wukelako ngu makuhu ve phika ku ni mahela tshofu.

Jobe 2:9

Sekoko msikati wakwe, a to khene: U ngadi tsani ka wunene wako kani? Ruketela Txizimu, u txi fa.

Jobe 1:11

Aniko hi nga nawuluta dianza dako u txi m'gwesa ngu ka sotshe sile a ku naso, u txi na wona ku mwendo kha na mbi kuruketela u txi muwona!

Jobe 1:5

Ku ti ti maheka ti to, ma di pindile masiku ale a mibuso yawe, Jobe a ti ko rumisa ti to, ve sawulekiswa, se e wuka ngu mabimbi-kutxa, e ningela miphaxo, madingano ni mtengo wawe votshe; nguko Jobe a ti ti khene: Va nga nda dhuka va di onhile vanana vangu se ve ruketela Txizimu timbiluni kwawe. Jobe a ti ti mahisa toneto yotshe mbimo.

Dhewuteronome 22:24

sekoko ngu wumbidi wawe, va na yiswa ha txikeni ka didhoropa, va txi ya baliselwa ngu marigwi, kala va txi fa; nguko dihorana kha da peka huwa, di kombela kulamulelwa, ni wule wa dijaha nguko a bihisile muwutwa wa muakelani wakwe. Ngu toneto, u na fuvisa wubihi hagari kwanu.

Dhewuteronome 22:21

sekoko va na teka wule wa dihorana ve tsula nayo ha txikeni ka nyumba ya tate wakwe, se majaha a didhoropani kwawe, ma na m'balisela ngu marigwi kala a txi fa; nguko a mahile to biha ka va ka Israyeli, ngu kumaha wugango nyumbani ka tate wakwe; ngu toneto u na va u txi fuvisa wubihi hagari kwanu.

Dhewuteronome 21:21

Sekoko vavamna votshe va didhoropa va na m'balisela ngu marigwi kala a txi fa. Ngu kumaha keto, u na heta wubihi hagari kwako, se votshe va ka Israyeli, ngako va txi tiengisa va na thava.

Dhewuteronome 13:10

Se u na m'balisela ngu marigwi kala a txi fa, nguko a duketile ku ku hambukisa ka Mkoma, Txizimu txako, awu a nga kuhumisa ditikoni ka Egipta, amu ka nyumba ya wukhumbi.

Dhewuteronome 5:20

U nga lumbete muakelani wako, ngu wufakazi wa makuhu.

Eksodha 20:16

U nga lumbete mwakelani wako ngu wufakazi wa makuhu.

Vahebheru 11:37

Va fayetetwe ngu marigwi, ve sahwa ngu masaho. Va datwe ngu kubhayetelwa ngu matxhari, va pengisilwe va di ambate madhowo a tinvuta ni a tiphongo, ve xaniswa ni kutsotsorolwa, ve khotelwa mikorani.

1 Vafumeli 21:14

Sekoko va to rumela m'biko ka Jezabheli wa ku kha vona: Nabhote a balisetwe ngu marigwi, a txi fa.

2 Vafumeli 6:32

Sekoko Elixa a ti ti khalahatshile kumweko ni madhota nyumbani kwakwe. Mfumeli a to rumela wamwamna masoni kwakwe; aniko asi se hoka m'thu wule, Elixa a to khene ka madhota ale: Mi ti woni ati mwanana wa txidayi a nga rumelisa tona ku ta wila msungo wangu kani? Wonisisani, a txi bwaka wu wo rumwa, msekeleni ditimba; ina kha ku na ku maheto i ti sigingo sa nyamne wakwe si pfalako ngu msana kwakwe kani?

2 Makronika 24:21

Va to sunga txikungo txo m'daya, ve m'balisela ngu marigwi, ka mtendela wa Nyumba ya Mkoma, madingano ni kuruma ka mfumeli.

Jobe 31:39

Ngako ni ti dyite mihando ya mafu ni si nga ni male, ni daya vanyamne va kona,

Mavingu 19:28

Fakazi ya Bheliyali yi tseketsela wululamo, se txisofu txa muonhi txi mita wubihi.