1 Vafumeli 19:10 - Bhiblia Yo Sawuleka

¹⁰ Se ene a to khene: Ni xambanyile kuthumela ngutu Mkoma, Txizimu txa Mabutho a Tiyimbi, nguko vanana va ka Israyeli va lekile txitumelelano txako, va khundumusete siluvelo sako, ve dayela vaprofeti vako ngu ditxhari; se ngani nokha ni nga sala, se va xota kuthavisa wutomi wangu.

1 Vafumeli 19:10 Referans Kwoze

1 Vafumeli 18:4

nguko ku mahekile tito, mbimo yile Jezabheli a nga ti dayela vaprofeti va Mkoma, Obhadhiya a to teka 100 wa vaprofeti, se e sisa mtxhanu wa magumi kheno, ni vamwani va mtxhanu wa magumi kheya, amu ka diphala, e va dyisa ngu mapawu ni mati).

1 Vafumeli 18:22

Sekoko Elija a to khene ka vathu: Ngani nokha mprofeti wa Mkoma ni nga sala, kuve vaprofeti va Bhahali i 400 wa vavamna.

Eksodha 34:14

Khu na mbi khozela simwani sizimu, nguko Mkoma a dhanwa ku mbwa txiluse, i Txizimu txa txiluse.

Eksodha 20:5

U nga si khizamele, u txi si khozela; nguko ani Mkoma, Txizimu txako, ni Txizimu txa txiluse, ni tsayisako vanana ngu mhaka ya sionho sa vatate vawe, kala ka liveleko la wuraru ni la wumune, la vale va ni vengako.

1 Vafumeli 18:30

Sekoko, Elija a to khene ka votshe vathu: Tshuketani ngutu hafuhi kwangu. Votshe va to tshuketela hafuhi kwakwe; se a to longisa txiluvelo txa Mkoma, txi nga ti khundumusilwe.

Mitengo 25:13

Ku nava kwakwe ni ka liveleko lakwe, msana kwakwe ku nava ni txitumelelano txa wuphaxeli wa kala kupinduka, nguko a khutate ka Txizimu txakwe, e mahela vanana va ka Israyeli, mphaxo wo va tekisa.

Mitengo 25:11

Finiyasi, mwana Eleyazari, mwana mphaxeli Aroni, a vayilelisile dikhulo dangu txitimwi ka vanana va ka Israyeli, nguko a to ti ningela hagari kwawe. Se kha na nga va lovisa vanana va ka Israyeli, ngu kuhenya kwangu.

Johani 2:17

Se vagondiswa vakwe va to alakanya ati ti nga ti bhatwe, taku: “Kupandisekela nyumba yako ku na ni dya.”

Mika 7:2

Vathu vavanene va nyamalate ha mafuni, kambe kuwalo ni wammweyo wo lulama hagari ka vathu; votshe va ti longisela kutheketa mnoha; mmwani ni mmwani a riyela mwanawe ngu likoka.

Mika 6:16

Nguko mi txi xayisa sileleto sa Omiri, ni yotshe mithumo ya nyumba ya Akabhi, ni nanu mi tsimbila ka milayo yawe; kasiku ani ni kumaha dirumbi, ni vahanyi vako ve va mloti; ngu kumaha keto mi na wuyisa txiruko txa vathu vangu txitimwi kwanu.

Hoseya 5:11

Efrayime a ha kuxanisekani, ni kukarala ka mialakanyo, nguko a lavile kutsimbila ngu nzila yo biha.

Jeremiya 2:30

Ni pekile walo vanana vanu, kha va tumela kukawukwa. Ditxhari danu di date vaprofeti vanu nga ngonyamo yi hasamulako.

Masalmo 119:139

Txiviti txangu txa ni hisa nga mndilo, nguko valala vangu kha va khatali ngu mapswi ako.

Masalmo 69:9

Kukhatalela nyumba yako ka ni dya; siruko sa vale va ku ruketelako si wete txitimwi kwangu.

1 Vafumeli 22:8

Sekoko Akabe i ku mfumeli wa Israyeli a to khene ka Josafati: A nga diho wamwamna waku a nga hi wotisela ka Mkoma; aniko ani na mnyenya nguko kha zivi ku nga profeta ta tinene ngu ngani, ndo biha dwe; i Mikaya, mwana Inila. A to khene kha Josafati: U nga wombise eto awe mfumeli.

1 Vafumeli 19:14

Se Elija a to khene: Ni xambanyile kuthumela ngutu Mkoma, Txizimu txa Mabutho a Tiyimbi, nguko vanana va ka Israyeli va lekile txitumelelano txako, va khundumusete siluvelo sako, ve dayela vaprofeti vako ngu ditxhari; se ngani nokha ni nga sala, se va xota kuthavisa wutomi wangu.

1 Vafumeli 19:2

Sekoko Jezabheli a to ruma mtumi ka Elija, kuya khene: Si na ni tsayise ngutu sizimu ngako kala ka mbimo yo nga yona yiya, ni si ku dayi nga ti u nga va dayisa tona.

1 Vafumeli 18:20

Sekoko Akabe a to rumela mitumi ka votshe vanana va ka Israyeli, e sengeletana ni vaprofeti ka mmango wa Karmeli.

1 Vafumeli 18:17

Se ku to maheka ti to mbimo yile Akabe a nga wona Elija, a to khene kha Akabe: Ngawe mkhulumeteli wa Israyeli kani?

1 Vafumeli 18:10

Ni xambanya ngu Mkoma, Txizimu txako, a hanyako, kha ka nga vaho ditiko mwendo mfumo, emo nyamne wangu, a nga mba rumela vo tsimbila ve kulava; se vona va txi kha vona: A walo hawa, sekoko a txi xambanyisa mifumo ni matiko ku mwendo kha va kumana.

1 Vafumeli 20:35

Sekoko mmweyo ka vavamna vale i ku vanana va vaprofeti, a to khene ka mkwawe madingano ni dipswi da Mkoma: Ni peke. Se wamwamna wule a to lamba ku mpeka.

1 Vafumeli 20:22

Sekoko mprofeti a to tshuketa hafuhi ka mfumeli wa Israyeli a txi ta khene: Tsula u ya ti lulamisela, ni kupimisa ati u no maha; nguko mndani ka dilembe, mfumeli wa Siriya a na kuwukela.

1 Vafumeli 20:13

Se ku to ta woneka mprofeti ka Akabe, mfumeli wa Israyeli, a txi ta khene: Mkoma a khene: U di woni dotshe dibutho diya da hombe kani? Nyamsi ni na di ningela manzani kwako, kasi u txi na tiziva ti to ani ngani Mkoma.

Vahebheru 11:37

Va fayetetwe ngu marigwi, ve sahwa ngu masaho. Va datwe ngu kubhayetelwa ngu matxhari, va pengisilwe va di ambate madhowo a tinvuta ni a tiphongo, ve xaniswa ni kutsotsorolwa, ve khotelwa mikorani.

Dhewuteronome 31:16

Se Mkoma a wombile ka Mosi a txi khene: Wona, u hafuhi ni kutsula u txi ya humula kumweko ni vatate vako; se vathu vava, va na khukha va txi ya maha wugango ni simwani sizimu sa ditiko dile u lavako kuwulela ka dona. Vona va na ni leka va txi ndaka mlayo wa txitumelelano, txi ni nga txi sunga navo.

2 Vafumeli 10:16

Se Jehu a to khene: Tsimbila ni nani, u na wona ku ti ningela kwangu ka Mkoma. Se Jehu a to mteka mu ka txikotxikani txakwe.

Jeremiya 36:26

Se mfumeli a to laya tito, Bharuke, m'bhali, ni mprofeti Jeremiya va txi ñolwa ngu Jerameyeli, mwanana wa mfumeli, ni Seraya, mwana Aziriyeli, ni Xelemiya mwana Abdheeli, aniko Mkoma a to va sisa.

Nehemiya 9:26

Hambi keto, kha va kuengisa, va to kuwukela, ve tshuralela mlayo wako, ve daya vaprofeti vako, va va nga ti ti womba-womba kwawe, ti to ve tshumelela kwako; se va to maha wubihi wa hombe.

Masalmo 78:37

Timbilu tawe ti sa thembeka ka Txizimu hambi ni ka txitumelelano txa Txizimu, ti sa thembeka.

Masalmo 119:26

Ni ti tshanzile kwako totshe ti ni nga ti maha, se awe u ni xamute; ni gondise milayo yako!

Masalmo 119:126

Mkoma, njikhati txako txa kuthuma; vona va nyenyile mlayo wako.

Isaya 49:4

Aniko ani ni ti khani: Ni thumile walo, ni sakani ngu mtamo wangu, ngu so mbi vhuna txilo; hambi keto, fanelo yangu yi masoni ka Mkoma, ni hakhelo yangu yi masoni ka Txizimu txangu.