1 Samuwele 5:3 - Bhiblia Yo Sawuleka

³ Kambe magwanani ka kona, va ka Asidhodhe va to wuka ni mabimbi-kutxa, ve wona Dhagoni a di wite hahatshi ngu khohe, masoni ka dibhokiso da Mkoma; se va to teka Dhagoni ve mtshumeta ka wukhalo kwakwe.

1 Samuwele 5:3 Referans Kwoze

Isaya 19:1

Mahungu a Egipta. Wonani, Mkoma a gadhile direfu do hehuka, se a nata kona Egipta; sithombe sa Egipta si na dhudhumela masoni kwakwe, ni timbilu ta Vaegipta ti na nyunguluka hagari kwawe.

Isaya 46:7

Va txi pakata, ve tsula veya txi veka ka wukhalo wa txona; txi zumba kona hale, kha txi khukhi; se ngako va txi dila ka txona, kha txi na xamulo ni ya yimweyo, hambi kutxhatxhisa ni wammweyo kuxanisekani kwakwe.

Zefaniya 2:11

Mkoma a na va karata ngutu, nguko a na hoxota sotshe sizimu sa mafu; se votshe va nata mkhozela, mmwani ni mmwani a txi khukhela ka wukhalo wakwe, ka sotshe sitondolo sa matiko.

Marku 3:11

Ni mimoya ya nzambwa, ngako yi txi mu wona, yi ti ti khizama masoni kwakwe, yi huwelela yi txi kha yona: “Awe u Mwanana wa Txizimu.”

Jeremiya 10:8

Votshe va bharukile ni kwa mba ziva, gondo ya sifananiso njo tanda.

Isaya 41:7

Se mthumi a tsanisa mtshuli, ni wu a thumako ngu hamela, ka wule a khandako txithombe, a txi khene ngu txile txi nga tshulwa: Njinene. Sekoko e txi tsanisa ngu sipikiri, kasi ku txi si dekadeki.

Isaya 40:20

Txisiwana txi sisikotiko kuninga so tala, txi sawula dipulango di di si siniko; se mthumi wo txhariha e di teka, kasi ku ta m'vatela txithombe txi txi si zinginikiko.

Masalmo 97:7

Va na wiswa tingana votshe vale va khozelako sithombe, votshe vale va ti guletako ngu sizimu so mbi vhuna txilo; ni sotshe sizimu si na khizamele Mkoma Txizimu!

Eksodha 12:12

Ka wusiku wonewo ni na pinda ditikoni ka Egipta kambe ni na daya otshe matiwula a vanana va ditikoni ka Egipta, kukhukhela ka vathu kala ka sifuyo; kambe ni na lamula sizimu sotshe sa Egipta, nguko ani ngani Mkoma.

1 Samuwele 6:5

Mahani koko, sifananiso sa sithunye sanu ni sifananiso sa makonzo anu, ale maxaselako ditiko, se mi dhumisa Txizimu txa ka Israyeli; mwendo Txizimu txi na hehukisa dianza da txona txitimwi kwanu, ni txitimwi ka txizimu txanu, ni txitimwi ka ditiko danu.

1 Samuwele 6:1

Ngako koko, dibhokiso da Mkoma di di zumbile ditikoni ka Vafilista mtxhanu wa mtxima ni yimbidi,

1 Vafumeli 18:26

Se va to teka dirole dile va nga ningwa, ve di lulamisela; se va to khongela ditinani ka Bhahali, kukhukhela ni mixo kala ni hagari ka mitshikari, va txi kha vona: Awe Bhahali, hi xamule! Aniko kha ka pfala dipswi, hambi ni wo xamula; na va txi ndaka-ndaka txitimwi ka txiluvelo txile txi nga ti mahilwe.

Masalmo 115:7

si na ni manza, aniko kha si gwesi txilo; si na ni mikondo, aniko kha si tsimbili, ngu mkanani ka sona kha ku humi dipswi!