1 Samuwele 10:6 - Bhiblia Yo Sawuleka

⁶ Se Moya wa Mkoma wu na wulela kwako, kambe u na profeta kumweko navo, u hunduka u va mmwani m'thu.

1 Samuwele 10:6 Referans Kwoze

1 Samuwele 10:10

Se mbimo yile va nga hoka mmangoni, mtxawa wa vaprofeti wu to huma u va hingeta; aniko Moya wa Txizimu wu to wulela kwakwe, se e profeta hagari kwawe.

Mitengo 11:25

Mkoma a to txhika ngu mu ka direfu, e ta womba-womba ni Mosi; se e teka moya wakwe e wu thela ka madhota ale a mtxhanu wa magumi ni mambidi. Se mbimo si moya wu nga wulela ka vathu, vona va to profeta; hambi keto, kha va nga engeta ve profeta kambe.

1 Samuwele 16:13

Sekoko Samuwele a to teka litxheho la mafura, e mu tota hagari ka vanawe; se kukhukhela ka donedo ditshiku ni kuya masoni, Moya wa Mkoma wu to wulela ka Dhavhidha. Sekoko Samuwele a to khukha e tshumela e tsula Rama.

Valamuli 14:6

Sekoko Moya wa Mkoma wu to wulela ngu mtamo, a txi txi bhanda kukhukhela txitimwi kala hahatshi, ku nga o bhanda phongo, na asi nga ni txilo manzani kwakwe; aniko kha womba txilo ka tate wakwe ni ka mame wakwe, ngu tile a nga ti ti mahile.

Valamuli 3:10

Se Moya wa Mkoma wu to ta txitimwi kwakwe, se a to maha mlamuli wa Israyeli, a txi huma eya yimbini; se Mkoma a to ningela Kuzani-Rezatayimi, mfumeli wa Siriya, manzani kwakwe; se dianza dakwe di to simama di wukela Kuzani-Rezatayimi.

Matewu 7:22

“Ka edo ditshiku vavangi va nata womba kwangu va txi kha vona: Mkoma, Mkoma, ina athu kha ha profeta ngu ditina dako kani? Ina kha ha tovela madhimoni ngu ditina dako kani?’

Mitengo 11:17

Sekoko ani, ni na kwitima ni ta womba-womba ni nawe konaho; se ni nata hungula moya wu wu ku nemelako wekha, ni wu veka kwawe, kasi ve kuvhuna; se moya wu na kuvhuna kurwala vathu, na i si ngawe wekha u rwalako.

Mitengo 11:26

Kambe wugoveloni ku to sala vavamna vambidi, mmweyo wawe a ti dhanwa ku i Eldhadhe, awu mmwani i Medhadhe. Moya wu to ya khandama txitimwi kwakwe (ngako i ngadi vamwevo va vale va ngadi bhatwe, hambiko va nga si ngaho ditendani), se va to profeta kona wugoveloni.

Mitengo 11:29

Kambe Mosi a to khene kwawe: “Ngu kutxani uva ni txiluse masoni kwangu kani? Ani ni khani i di tinene nga ti votshe vathu va Mkoma va txi profeta, Mkoma e va ninga moya wakwe!”

1 Samuwele 10:9

Ku to maheka koko taku, mbimo yi a nga tshembereka e hambana ni Samuwele, Txizimu txo to txitxa mbilu yakwe ngu yimwani, se sotshe sikombiso sile si to maheka ka dona ditshiku dile.

1 Samuwele 19:20

Sekoko Sawule a to rumela mitumi yo londeta Dhavhidha, avale va nga wona mtxawa wa vaprofeti va txi profeta, eho a nga ti kona Samuwele a txi vathangela; se Moya wa Txizimu wu tota txitimwi ka mitumi ya Sawule, ni vona va to profeta.

Valamuli 15:14

Se ngako a di hokile Leki, Vafilista va to m'hingeta, va txi giya ngu litsako; aniko Moya wa Mkoma wu to ta kwakwe ngu mtamo, se majoke ale va nga ti msungile ngu ona mawoko, ma to nyivilika nga tihinza ta linyu ti nga hiswa, se ni sifundo sa majoke si to thukunyuka mawokoni kwakwe, si txi wa.

1 Samuwele 11:6

Sekoko mbimo yile Sawule a nga pfa timhaka eto, Moya wa Txizimu wu to wulela kwakwe, se kuhenya kwakwe ku to tura ngutu.