1 Pedro 4:14 - Bhiblia Yo Sawuleka

¹⁴ Ngako mi txi xaniswa ngu ditina da Kristu, mi katekile, nguko moya wa kupfaliswa, Moya wa Txizimu, wu zumbile hagari kwanu.

1 Pedro 4:14 Referans Kwoze

1 Pedro 3:14

Kambe ngako mi txi xaniswa ngu mhaka ya kululama, mi katekile. Mi nga thaveni kudhukisela kwawe, kambe mi nga karatekeni.

Luka 6:22

Mi katekile anu, ngako vathu va txi mi venga, va txi mi tovela, va txi mi ruketela, va txi nyenya ditina danu nga do va ni nduma yo biha, ngu mhaka ya Mwanana wa M'thu.

Jakobe 1:12

A katekile m'thu wu a amukelako txiduko ngu kutimisela; nguko, a di gwitile kudukwa, a na amukela m'bhoti wa wutomi, awu Mkoma a nga wu thembisa ka vale va mrandako.

Matewu 5:11

Mi katekile, ngako va txi mi ruketela ni ku mi xanisa, ni ku mi hembela, ve mi lumbeta makuhu ngu mhaka yangu.

1 Pedro 3:16

Mi fanete kumaha tiya ngu mbilu ya kululama, kasiku, hambi ka tile va wombako kubiha ngu nganu, ve thelwa tingana, avale va wombako kubiha ngu dihanyo danu ka Kristu.

Masalmo 146:5

A katekile wule Txizimu txa Jakobe i ku m'vhuni wakwe, awule themba yakwe yi ku ka Mkoma, Txizimu txakwe,

2 Vakorinto 12:10

Ani na tsaka kutandekani kwangu, kurukwani kwangu, kupwatani kwangu, kunyenywani kwangu, kuxanisekani kwangu, ngu mhaka ya Kristu. Nguko, mbimo yi ni pfako kutandeka, nguyo mbimo ni ku ni mtamo.

Johani 15:21

Ngu toneto, va na mi maha totshe tiya, ngu mhaka ya ditina dangu, nguko kha va mu zivi awu a nga ni ruma.

Jakobe 5:11

Wonani, athu hi va bala ti to va katekile avale va nga tsanisela amu ka sixaniso. Mi ti engisile ti txi wombwa ta kutimisela ka Jobe, kambe mi ma woni magwito awa Mkoma a nga mninga ona, nguko Mkoma ana ni wumbilu ni divalelo.

Mithumo 13:45

Sekoko ngu kuwona dibutho da vathu, Vajudha va to tala ngu kubavela, se va txi angula ngu siruko ka timhaka tiya Paulo a nga ti womba-womba ngu tona.

Isaya 51:7

Ni engiseni anu mi zivako wululamo, anu vathunu mlayo wangu wu ku timbiluni kwanu; mi nga thaveni kutseketselwa ngu vathu, hambi kukarateka ngu siruko sawe.

Masalmo 89:51

asi valala vako va hi onhelako ngu sona, Mkoma! Hani ni hani a yako kona msawulwa wako, va mruka!

2 Vafumeli 2:15

Mbimo yile va nga mu wona vanana va vaprofeti, na va di rendekelani ni Jeriko, va to kha vona: Moya wa Elija wu khandamile ka Elixa. Se va to mu hingeta ve ta mu khizamela.

1 Pedro 2:12

Wutomi wanu hagari ka va va si kholwiko, wu nave wa wunene ngutu, kasi ku ngako va txi mi lumbeta, kuva mi di vabihi, vona va na yi ziva mithumo yanu ya yinene, se ve dhumisa Txizimu ka ditshiku da kuta ka txona.

Vahebheru 11:26

Ene a woni kuxaniswa ka Kristu ku di ni lisima ngutu, kupinda tithomba ta Egipta, nguko, ene a ti rinzela kuamukela hakhelo.

Vagalatiya 1:24

Se vona va ti dhumisa Txizimu ngu kota yangu.

Johani 9:34

Se vona va txi mu angula, va txi kha vona: “U veleketwe txionhoni, ngu wutumbu wako wotshe, se u lava ku hi gondisa kani?” Konaho va to mu humisa hahanze.

Johani 9:28

Sekoko va to khata ku mruketela, va txi kha vona: “Mgondiswa wakwe ngawe wekha, athu hi vagondiswa va Mosi.

Johani 8:48

Vajudha va to xamula, va txi kha vona kwakwe: “Ina kha hi wombi tona ti to khathu, awe u Msamariya, ni ti to khathu u na ni didhimoni kani?”

Matewu 5:16

Ngu toneto, kwanu ku na woninge masoni ka vathu, kasiku, ngako va txi wona mithumo yanu ya yinene, va na dhumisa Tate wanu a ku nzumani.”

Masalmo 49:9

nga yi si eneli kutirula wutomi wa m'thu, kasiku e hanya kala kupinduka.

1 Vafumeli 10:8

Va katekile vavamna va u ku navo, va katekile vathumi vako avale yotshe mbimo va ku masoni kwako, va pfisisako wutxhari wako!

2 Pedro 2:2

Vathu vavangi va na londeta tigondo tawe ta manyala, se ngu mhaka yawe, nzila ya ditshuri yi na nyetwa.

Mithumo 18:6

Kambe ngako a txi wona kukaneta kwawe, ni kuruka kwawe, Paulo a to zuza tinguwo takwe, a txi khene kwawe: “Mnoha wanu wu nave txitimwi ka misungo yanu. I di ani ni basile: Kukhukhela konkuwa ni na tsula ka vamatiko.”

Isaya 11:2

Se Moya wa Mkoma wu na zumba txitimwi kwakwe Moya wa wuzivi ni wutxhari, Moya wawudhota ni mtamo, Moya wa kualakanya ni kuthava Mkoma.

Isaya 25:8

A na fuvisa lifo ngu ha ku si gwitiko, ngu kumaha keto, Mkoma Txizimu, a na bahula mirongo ka totshe tikhohe, kambe a na thavisa tingana ta vathu vakwe kotshe ha mafuni, nguko Mkoma a wombile.

Mithumo 5:41

Vona va to huma ngu banzani ka wukoma, na va txi tsaka ngu kumaneka va di ha mtengoni ka vale va ku ni fanelo yo xupheka ngu mhaka ya ditina da Jesu.

Mithumo 28:22

Se hi lava kupfa ngu ngawe ati u pimisako tona, nguko i di gondo yiya, ha tiziva ti to ya lambwa ngu votshe vathu.”

2 Vakorinto 4:10

txotshe txikhati hi rwate lifo la Jesu ha mmidi kwathu, kasiku wutomi wa Kristu ni wona wu txi tikomba ha mmidi kwathu.

2 Vakorinto 4:16

Ngu toneto, kha hi gumi mtamo. Hambi mmidi wathu ngu ha hanze wu txi maha wo onheka, kambe ngu mndani wu hinduka wu txi maha wa wuphya ditshiku ni ditshiku.

1 Pedro 4:16

Aniko, ngako a txi xaniswa ngu mhaka ya kuva i di dikholwa, a nga telwe ngu tingana, aniko a na pfalise Txizimu ngu mhaka ya ditina donedo.