1 Makronika 11:3 - Bhiblia Yo Sawuleka

³ Se otshe madhota a ka Israyeli ma to ta ka mfumeli, kona Hebroni, aniko Dhavhidha a to maha navo txitumelelano kona Hebroni, masoni ka Mkoma; se vona va to tota Dhavhidha kuva mfumeli txitimwi ka Israyeli, madingano ni dipswi da Mkoma, ngu kuwomba ka Samuwele.

1 Makronika 11:3 Referans Kwoze

1 Samuwele 16:1

Sekoko Mkoma a to khene ka Samuwele: U na dilela Sawule kala yihi mbimo, akule ani ni nga mlamba, kasi ku asi fumi txitimwi ka Israyeli kani? Tata litxheho lako ngu mafura se wuta; ni ta kuruma ka Jese, wa Bhetlehema; nguko ni ti sawulete mfumeli hagari ka vanana vakwe.

2 Samuwele 5:3

Ngu kumaha keto, otshe madhota a ka Israyeli ma to ta ka mfumeli, kona Hebroni; se mfumeli Dhavhidha a to maha navo txitumelelano kona Hebroni, masoni ka Mkoma; va to tota Dhavhidha kuva mfumeli txitimwi ka Israyeli.

2 Samuwele 2:4

Sekoko vavamna va ka Judha va to ta koneho ve ta tota Dhavhidha kuva mfumeli, txitimwi ka nyumba ya ka Judha. Se va to zivisa Dhavhidha va txi kha vona: Vavamna va Jebhesi-Gileyadhi ngu vona va nga tshotsha Sawule.

1 Samuwele 16:3

Se ka mphaxo wa kona u na ramba Jese; se ani ni na kugela ti u felako kumaha tona, aniko u na tota mafura awule ani ni no kugela ene.

2 Makronika 23:3

Se wotshe msengeletano wule wu to maha txitumelelano ni mfumeli Nyumbani ka Txizimu; se Joyadha a to khene kwawe: Wonani, mwanana wa mfumeli a na fuma, nga ha Mkoma a nga womba madingano ni vanana va Dhavhidha.

2 Vafumeli 23:30

Madhota akwe ma to mteka ngu Megidhu a di fite, ve mtisa Jerusalema, ve mtshotsha hadithithani kwakwe. Se vathu va ditiko va to teka Jowakazi, mwana Josiya, ve mtota, ve mmaha mfumeli ka wukhalo wa tate wakwe.

2 Vafumeli 11:17

Se Joyadha a to maha txitumelelano hagari ka Mkoma, ni mfumeli ni vathu, ati taku va nave vathu va Mkoma. Ni txitumelelano hagari ka mfumeli ni vathu.

1 Samuwele 28:17

Nguko Mkoma a mahile kwako madingano ni tile a nga kugela ngu txisofu txangu, ni ku Mkoma a vharute mfumo manzani kwako, se a wu ningete ka mungana wako Dhavhidha.

1 Samuwele 23:18

Se va to maha txitumelelano ngu wumbidi wawe masoni ka Mkoma. Dhavhidha a to zumba txitingani, kambe Jonatani a to tshumela e tsula m'tini kwakwe.

1 Samuwele 15:28

Sekoko Samuwele a to m'gela ku khene: Nyamsi Mkoma a vharute mfumo wa ka Israyeli manzani kwako, se wu ningela ka mwakelani wako, wa tshuko kupinda awe.

1 Samuwele 11:15

Se vathu votshe va to khukha veya Giligali, veya simeka Sawule ku va mfumeli masoni ka Mkoma kona Giligali, kambe va to ningela mningelo wa kudikha masoni ka Mkoma; Sawule ni votshe vavamna va ka Israyeli va to tsaka ngutu koneyo.

Valamuli 11:11

Ngu kumaha keto, Jefta a to tsula ni madhota a Gileyadhi. Se vathu va to m'veka kuva msungo ni mthangeli wawe; kambe Jefta a to womba otshe mapswi akwe masoni ka Mkoma, kona Misipa.

2 Samuwele 5:5

Kona Hebroni a to fuma Judha mtxhanu wa malembe ni mambidi ni mtxhanu wa mtxima ni wumwewo; se kona Jerusalema a to fumela votshe va ka Israyeli ni va ka Judha magumi mararu a malembe ni mararu.

1 Makronika 11:10

Avava ngu vona vathangeli va tindena, vale Dhavhidha a nga ti navo, vale va nga m'vhunetela ngutu ka mfumo wakwe, ni votshe va ka Israyeli, kasi ku mmaha mfumeli, madingano ni dipswi da Mkoma, ngu Israyeli.