Yo 20:16 - Sơ̆p Hlabơar Nơ̆r 'Bok Kei-Dei

¹⁶ Klaih kơ noh Yêsu khan kơ sư dơ̆ng: “Ơ Mari.” Mari hue 'bôh hloi păng khan hăm nơ̆r Juđê: “Rabôni.” Rabôni wă khan 'bok thây.

Yo 20:16 Referans Kwoze

Yo 10:3

Na bơngai gak 'măng pơih ăn kơ tơ'ngla sư 'măng hloi. Mă triu kư̆m kơnăl kơ 'bơ̆r tơ'ngla sư mơ̆n. Na tơ'ngla sư krao tôm kơ anăn lu sư, na tơlĕch lu sư kiơ̆ tơ'ngla sư lĕch tơ 'ngoaih.

Yo 1:38

Yêsu hue tơ rŏng 'bôh bre ei kiơ̆ Sư, na Sư jet: “Biĕm chă kiơ?” Bre sư khan: “Ơ 'Bok Thây, Ih oei tơ yơ?”

Jang 10:3

Minh năr ei dang pêng jơ kơsơ̆, 'bok Kôrnei 'bôh linh jang 'lơ̆ng đơ̆ng 'Bok Kei-Dei năm mơ̆t tơ hnam sư. Linh jang 'lơ̆ng khan kơ sư: “Ơ Kôrnei.”

Jang 9:4

Sư huŏng hơtat hloi đơ̆ng kơdŭ aseh. Na Sôl sư kơtơ̆ng nơ̆r pơma kơ sư khan thoi âu: “Ơ Sôl, Inh pơm kiơ kơ ih, na ih pơm kơnê̆ kơ Inh?”

Yo 6:25

Lu sư tŏk hloh pah âu dơsĭ boih, na lu sư 'bôh hloi Yêsu na jet hloi: “Ơ 'Bok Thây, Ih năm tơ âu layơ?”

Êsai 43:1

Dang ei Kră Yang khan thoi âu: Ơ Jakôp Sư Tơ'ngla pơjing iĕm, ơ Isơrael! Sư bơih Tơ'ngla pơjing iĕm, 'nĕ kơ hli yua kơ Inh huai iŏk iĕm bơih. Inh bơih krao iĕm hăm anăn iĕm păng iĕm gah Inh.

Bl 22:11

Linh jang Kră Yang đơ̆ng kơpal plĕnh krao. “Ơ Abraham, Abraham!” Sư tơl, “đei inh âu.”

Yo 20:28

Klaih kơ noh Thôm khan: “Ơ Kră Yang inh, 'Bok Kei-Dei.”

Yo 13:13

Iĕm krao Inh 'Bok Thây iĕm păng Yŏng iĕm. Iĕm krao Inh thoi noh bưh mơ̆n yua kơ Inh 'Bok Thây iĕm păng Yŏng iĕm tơpă.

Yo 11:28

Đang kơ pơma thoi noh Mathê năm krao oh sư Mari. Sư khan kơ oh sư kơdrô̆ bre sư thoi âu: “'Bok Thây truh tơ âu boih păng Sư wă kơ e.”

Yo 5:2

Tơ Pơlei Jêrusalem đei minh tŭm dơnâu đak 'bơ̆t jê̆ 'măng tơm pơlei mă đe anăn 'Măng Triu. Đak dơnâu ei lăm nơ̆r Juđê anăn khan dơnâu Betsatha. Tơ noh đei pơđăm tŏ prơng hnam.

Yo 3:2

Sư năm ngôi tơ Yêsu kơmăng, na sư khan kơ Yêsu: “Ơ 'Bok Thây, nhôn băt kơ Ih 'Bok Thây đơ̆ng 'Bok Kei-Dei wơh. Dah 'Bok Kei-Dei ưh kơ tơgŭm Ih, lei Ih ưh kơ gơh pơm tơdrong mơsêh mơyang thoi Ih pơm ahrei ôh.”

Yo 1:49

Nathanel khan kơ Sư dơ̆ng: “Ơ 'Bok Thây, lei Ih boih Kon Kră Yang 'Bok Kei-Dei, Ih Pơtao bơngai Isơrael tơpă.”

Luka 10:41

Na Kră Yang Yêsu khan thoi âu: “Ơ Mathê, ih mah tơchĕng kiơ kơ dôm tơdrong jang noh dêh?

Mathiơ 14:27

Mă-lei Yêsu thar khan kơ lu sư: “Iĕm 'nĕ pă hli, Inh âu lah.”

Hơri Hiôk 5:2

Măt inh tep, mă-lei đon inh oei hơđơ̆r. Noh jơ̆! Nơ̆r pơyô inh sư dơdŭ păng krao thoi âu:

Hơri Hiôk 3:4

Lăp inh weh ataih đơ̆ng lu sư, Blư 'bôh hloi bơngai mă inh hơyuh. Inh thar rôp kuăr hloi, ưh pă achăng sư bơih, Chông ba sư dĭng truh tơ hnam mĕ inh. Mơ̆t lăm anih bơngai mă anăp kơ inh.

I Sam 3:10

Kră Yang năm tơ noh, Sư krao dơ̆ng thoi adrol ki: Ơ Samuel! Ơ Samuel! Samuel drơ̆ng Apinh Ih bơtho khan bĕ, đĭch đam ih oei mơ̆ng!

I Sam 3:6

Kră Yang krao dơ̆ng: Ơ Samuel! Samuel gruih iung, năm tơ Hêli khan: Đei inh tơ âu, ih krao inh ah. Hêli tơl, ơ dăm, inh ưh kơ đei krao ih ôh, năm tep dơ̆ng wăi.

Le 33:17

Kră Yang khan kơ Môis: Inh gô pơm thoi ih đei apinh Inh noh, yua kơ ih đei tơdrong mơnat bơih 'bơ̆t anăp Inh, Inh băt kơ ih; păng băt kơ anăn ih.

Le 3:4

Kră Yang 'bôh sư năm lăng rai jê̆, Kră Yang pơma đơ̆ng lăm jơla noh krao: Ơ Môis, Ơ Môis! Sư tơl khan: Đei inh tơ âu!

Bl 45:12

'Nâu lu đe 'nhŏng păng Bênjamin oh inh, đei 'bôh păng măt păng kơtơ̆ng đơ̆ng nơ̆r inh pơma dơnuh păng 'nhŏng oh.

Bl 22:1

Đang kơ dôm tơdrong noh keh boih, na Kră Yang 'Bok Kei-Dei pơlong lăng Abraham. Sư khan thoi âu: “Ơ Abraham!” Abraham tơl: “Inh tơ âu.”

Markôs 10:51

Yêsu khan kơ sư: “Ih wă kơ Inh pơm kiơ?” Bơngai măt tol ei khan: “Ơ 'Bok Thây, inh wă kơ Ih pơklaih măt inh gơh 'bôh hơdah.”