Philip 2:20 - Sơ̆p Hlabơar Nơ̆r 'Bok Kei-Dei

²⁰ Lu buăl nhôn tơ âu ưh kơ đei bu 'mêm kơ iĕm dang Timôthê 'mêm kơ iĕm. Gah sư inh 'bôh sư 'mêm kơ iĕm tơpă, na inh 'bôh sư lăp đon kơ tơgŭm iĕm.

Philip 2:20 Referans Kwoze

Philip 2:2

Thoi noh na inh wă kơ iĕm iŏk dôm nơ̆r inh akhan kơ iĕm, wă kơ iĕm đei đon 'mêm mơnat dih băl; păng wă kơ iĕm pôm đon lăm tôm tơdrong, na jơhngơ̆m inh kư̆m chhơp rai loi.

Philip 2:22

Mă-lei iĕm băt boih kơ Timôthê sư bơngai 'lơ̆ng tơpă; sư jang tơgŭm inh bơtho tơdrong Yêsu Krist, thoi lĕ kơ kon jang tơgŭm 'bă.

I Kor 16:10

Lăp Timôthê năm tơ iĕm, iĕm athei sơng iŏk sư tơpă hŏ, wă kơ sư huay kơ hli dah mơlâu, yua kơ sư jang tơdrong Kră Yang Yêsu Krist kư̆m lei-lăi thoi inh mơ̆n.

Yo 12:6

Juđa khan thoi noh ưh kơ sĭ sư mơnat kơ lu bơngai dơnuh hin tơpă ôh. Sư bơngai wei kơdŭng jên tơpôl lu sư păng sư bơngai tơtông mơ̆n. Phŏ phŏ sư tơtông iŏk jên đơ̆ng kơdŭng ei.

Yo 10:13

Bơngai ei kơdâu jăk yua kơ sư bơngai jang đĕch, sư ưh kơ 'mêm kơ triu ôh.

I Sam 18:3

Jônathan pơgơ̆p hăm Đawit, yua kơ sư 'mêm kơ Đawit nhen thoi akâu sư kơdih.

II Tim 1:5

Inh băt kơ ih lui kơjăp tơpă, kư̆m lei-lăi thoi yă ih Lôih păng mĕ ih Eunik lui sơ̆ mơ̆n. Na dang ei inh băt kơ ih lui kơjăp thoi sư sơ̆ tơpă.

Kôlôsê 4:11

Jôsuê mă đe anăn Jutu, sư kư̆m jet gia iĕm. Dôm lu bơngai jang hơdai hăm inh bơtho tơdrong 'Bok Kei-Dei lăp pêng 'nu lu đe âu đĕch bơngai Juđê. Lu sư tơgŭm inh dêh na inh hiôk lăm jơhngơ̆m tơpă.

Tơdrông Pơđơk 31:29

Đei lơ drŏ-kăn jang pơnam. Mă-lei ih 'lơ̆ng hloh gloh loi kơ đĭ-đăng.

Horiso 55:13

Mă-lei Ih boih lei-lăi kơ inh, bôl hăm inh, buăl juăt inh.

I Sam 18:1

Đawit pơma dơnuh hăm Sôl đang boih, Jônathan păng Đawit pơm buăl juăt yua, kơ Jônathan 'mêm kơ Đawit dêh thoi akâu sư kơdih.

Rom 15:5

'Bok Kei-Dei ăn kơ bơ̆n đei đon lui kơjăp păng ăn kơ bơ̆n oei hiôk, na inh apinh Sư ăn kơ iĕm oei hiôk gơh găt dih băl, kư̆m thoi Yêsu Krist bơngai gơh găt păng bơ̆n.

I Tim 4:6

Dah ih bơtho lu bơngai lui tơdrong Yêsu Krist kiơ̆ thoi inh pơkă, lei đe băt kơ tơdrong jang ih âu 'lơ̆ng dêh păng đe băt kơ ih lui kơjăp tơdrong 'Bok Kei-Dei khŏm khŏm kư̆m thoi ih lui đơ̆ng blŭng sơ̆ khơ̆ dang ei.

II Tim 3:10

Inh tơchĕng ih kư̆m băt mơ̆n dôm tơdrong inh bơtho ih đơ̆ng sơ̆ khơ̆ dang ei. Păng ih băt boih inh bơngai thoi yơ. Ih băt kơ inh năm jơ̆p-jang kơ teh đak wă bơtho tơdrong 'nao 'lơ̆ng kơ đĭ-đăng bơngai păng ih kư̆m băt inh lui kơ Kră Yang lơliơ. Ih kư̆m băt tơdrong inh pơmat-tat mă-lei inh oei adrin ưh kơ tŭk ôh tơdrong jang inh. Ih kư̆m băt inh 'mêm kơ 'Bok Kei-Dei hăm bôl buăl.