Malachi 3:10 - Sơ̆p Hlabơar Nơ̆r 'Bok Kei-Dei

¹⁰ Lu iĕm athei pơyơ̆r iŏk minh lăm mơjĭt tah tơ lăm pơk Inh, wă kơ đei tơmam sa lăm hnam Inh; păng đơ̆ng năr âu lu iĕm athei pơlong lăng Inh, Kră Yang Tih Hloh khan, lăng Inh hăm pơih lu 'măng-'mŏk tơ kơpal plĕnh ti tuh ăn tơdrong pŭn hiôk kơ lu iĕm dĭng truh anih mong pă đei!

Malachi 3:10 Referans Kwoze

Mathiơ 6:33

Thoi noh na iĕm athei ăn kơ Sư pơgơ̆r iĕm, hăm adrin pơm 'lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua.

Horiso 37:3

Gơnang bĕ kơ Kră Yang păng pơm 'lơ̆ng. Oei bĕ lăm dêh char păng oei arih lăm tơdrong 'lơ̆ng tơpăt Sư.

Both 28:12

Kră Yang gô pơih anih 'mong tơmam gĭt đơ̆ng plĕnh, ăn đak 'mi jur tơ teh trŏ bơyan păng ăn pŭn hiôk dôm tơdrong jang đơ̆ng tơpang ti iĕm pơm. Iĕm gô ăn kơ lơ teh đak tŏk iŏk, mă-lei gah iĕm ưh kơ đei tŏk iŏk đơ̆ng bơngai bu.

Lêwi 27:30

Dôm tơmam minh lăm mơjĭt đơ̆ng chŭn mir, 'ba hơ'bo dah plei 'long noh tơmam Kră Yang ngăl tơmam 'lơ̆ng rơgoh pơyơ̆r kơ Kră Yang.

Ne 12:44

Lăm năr noh, đe rơih chă bơngai wei-lăng lu hnam mong tơmam pơyơ̆r plei blŭng-a lăm bơyan iŏk minh lăm mơjĭt, wă tah mong lăm noh, đei pơkă boih kiơ̆ kơ lu 'bok soi păng bơngai Lêwi, kư̆m đei pơkă kiơ̆ kơ đei chŭn mir tăp dăr kơ pơlei; yua kơ lu bơngai Juđa hiôk chơt yua kơ lu 'bok soi păng bơngai Lêwi oei bơ̆jang awih awăn.

Jo 18:21

Bĕ gah lu kon sâu Lêwi, Inh ăn kơ lu sư yua iŏk đơ̆ng tơmam lu adrĕch Isơrael pơyơ̆r minh lăm mơjĭt apah lu sư jang lăm Bơsŭn Anih Akŭm.

Lêwi 26:10

Lu iĕm oei sa tơmam lu iĕm 'măn lê̆ sơ̆. Đơ̆ng noh tuh hŭt lê̆ tơmam so noh wă 'măn mong tơmam 'nao.

II Pot 7:2

Yŏng linh mă jê̆ pơtao, sư tơl nơ̆r Êlisê bơngai mă Kră Yang 'Bok Kei-Dei yua: “Mă khan Kră Yang pơih dôm lu 'măng-'mŏk tơ plĕnh ti, tơdrong noh gơh đei hă?” Êlisê tơl: “Măt ih gô 'bôh tơdrong noh, mă-lei ih ưh kơ đei sa ôh.”

II Pot 7:19

Yŏng linh kư̆m tơl Êlisê bơngai mă Kră Yang 'Bok Kei-Dei yua: “Mă khan Kră Yang pơih dôm lu 'măng-'mŏk tơ plĕnh ti ră, tơdrong 'nei gơh đei hă?” Na Êlisê khan dơ̆ng: “Măt ih gô 'bôh tơdrong 'noh, mă-lei ih ưh kơ đei sa ôh.”

Hagai 2:19

lu iĕm hăm pă đei găr adrĕch hơmet lê̆ lăm pơk ưh? Mă khan truh tơ tơm hơmu 'long hơra, 'long ôliwơ, 'long gărnăt, kư̆m ưh kơ đei tơm 'long ayơ mă đei plei. Mă-lei iŏk đơ̆ng năr âu inh gô ăn pŭn hiôk kơ iĕm.”

Ne 13:5

Păng hơmet boih kơ Tôbia, đei minh anih să, tơ anih đêl sư yua tah tơmam pơyơ̆r phe 'ba păng tơmam 'bâu phu, lu pơnhan kơchŏk, ra minh lăm mơjĭt gah lu 'ba mi, sik hơmu 'nao păng đak rơmă ôliwơ, wă khan tơmam đe ăn tơgŭm kơ lu bơngai Lêwi, lu bơngai hơri păng lu bơngai gak 'măng jang; hăm tơmam pơyơ̆r kơ 'bok soi.

Ne 12:47

Lăm chăl Serubabel păng Nêhêmi, lu bơngai Isơrael athei asong ăn tơmam sa kơ lu bơngai hơri păng lu bơngai gak 'măng jang, kiơ̆ kơ lu sư yua rim năr; akŭm klah asong 'măn phe 'ba kơ lu bơngai Lêwi păng lu bơngai Lêwi klah asong ăn dơ̆ng phe 'ba kơ lu kon sâu 'bok Arôn.

Bl 7:11

Kơplah noh Nôê tơdrâu-hrĕng sơnăm, khei 'bar năr mơjĭt-tơpơh, trŏ kơ năr noh, dôm lu tu đak đôh pơchah đak bluh đơ̆ng teh, đơ̆ng kơpal plĕnh kư̆m pơih tơjur đak.

Bôk Bơthô 11:3

Mưh đei hơmơ̆l găm noh wă đei 'mi jur; mưh 'long păk tơ gah gơal dah păk tơ gah yă-nơ̆m, mă păk 'bơ̆t yơ, 'bơ̆t yơ sư oei 'bơ̆t dei.

I Ho 26:20

Lăm lu bơngai Lêwi mơ'nah wei-lăng hnam 'măn tơmam, hnam Kră Yang 'Bok Kei-Dei păng anih tah lu tơmam rơgoh.

Lêwi 26:3

Tơdah iĕm yak rok kiơ̆ khôi juăt Inh, wei răk păng pơm kiơ̆ nơ̆r Inh tơtă,

Both 12:6

Chĕp ba tơmam soi 'buh pơyơ̆r tơ noh, lu tơmam soi iŏk minh lăm mơjĭt, tơmam soi pha, lu tơmam soi pơsĭt đêl nơ̆r pơkă, tơmam soi hăm jơhngơ̆m lăp păng lu kon kơdră rơmo triu bơbe tuh blŭng-a.

Both 14:22

Lu iĕm 'nĕ kơ hiơt kơ pơyơ̆r minh lăm mơjĭt gah tơmam bơ̆n đêl rei bơih, mă đơ̆ng lăm mir chŭn bơ̆n đei lăm rim sơnăm.

Both 14:29

Lu bơngai Lêwi, yua kơ lu ưh kơ đei mŭk tơmam teh jang sa tơ lăm lu iĕm ôh păng lu bơngai tơmoi, lu bơngai mơti păng lu bơngai yă adro mă oei hơdai lăm pơlei iĕm, kư̆m gô năm sa phĭ mah; thoi ei Kră Yang 'Bok Kei-Dei iĕm ăn pŭn kơ dôm tơdrong jang đơ̆ng tơpang ti iĕm kơdih pơm.

Horiso 78:23

Mă-lei ră, Sư kư̆m athei lu tăl plĕnh tơ kơpal ti, Păng Sư pơih 'măng plĕnh,

Êsêkiên 34:26

Inh gô ăn dơ̆ng kơ lu sư tơring jum dăr kơ kông inh. Inh gô ăn đak 'mi trŏ kơ bơyan, đak 'mi pŭn hiôk.

Êsêkiên 44:30

Lu plei 'long blŭng-a 'lơ̆ng hloh lăm tôm tơmam, lăm đĭ-đăng tơmam soi mă lu sư pơyơ̆r, noh gah lu 'bok soi ngăl. Lu iĕm kư̆m pơyơ̆r ăn kơ lu 'bok soi tơpŭng bơlah blŭng-a mă 'lơ̆ng hloh; wă kơ đei tơdrong pŭn hiôk pơdơh tơ hnam lu iĕm.

Hôsia 2:21

Kră Yang khan: “Lăm năr noh, Inh gô tơl tơwih kơ lu tăl plĕnh ăn hơmơ̆l, lu tăl plĕnh gô tơl tơwih kơ teh ăn 'mi.

Jôel 2:19

Kră Yang đei tơl tơwih kơ kon pơlei Sư: 'Nâu Inh gô ăn kơ iĕm 'ba, sik 'nao, đak rơmă, iĕm gô phĭ jơnap. Inh pă ăn kơ lu iĕm mơlâu kơ đe dơ̆ng tơ lăm lu kon pơlei đe.

Jôel 2:24

Dôm lu anih preh 'ba gô 'bĕnh kơ 'ba. Dôm lu kơthŭng gô blai kơ sik hơmu păng 'bĕnh kơ đak rơmă ôliwơ.

Bl 28:22

Tơmo mă đêl inh pơdơ̆ng 'nâu jing jrăng hnam Kră Yang 'Bok Kei-Dei păng inh gô pơyơ̆r kơ Ih minh lăm mơjĭt đơ̆ng dôm mŭk tơmam mă inh đei đơ̆ng Ih ăn.