Luka 9:20 - Sơ̆p Hlabơar Nơ̆r 'Bok Kei-Dei

²⁰ Na Yêsu jet lu sư dơ̆ng: “Bĭ iĕm khan Inh bu?” Pêtrôs khan: “Ih 'Bok Krist mă 'Bok Kei-Dei wơh pơgơ̆r kon bơngai.”

Luka 9:20 Referans Kwoze

Yo 7:41

Lu mơ'nah dơ̆ng khan: “'Bok âu boih 'Bok Krist tơpă.” Đei lu mơ'nah dơ̆ng khan: “Ưh ôh. 'Bok âu sư lĕch đơ̆ng dêh Galilê mă-lei 'Bok Krist Sư ưh kơ lĕch đơ̆ng dêh Galilê ôh,

Yo 4:29

“Bĕ bơ̆n năm lăng bĕ. Bơngai ei hlĭch dêh roi 'blep dôm tơdrong inh pơm tơpă. Na iĕm tơchĕng bơngai 'noh hăm trŏ kơ 'Bok Krist tơpă dah ưh?”

Jang 17:3

Sư tơblang tơdrong lu bơngai khan lê̆ hơdrol gah 'Bok Krist khan 'Bok Krist kơplah Sư oei ala teh Sư wă lôch iung arih dơ̆ng. Sư khan: “Inh bơtho ăn kơ iĕm tơdrong Yêsu. Yêsu boih 'Bok Krist mă 'Bok Kei-Dei ăn wă pơgơ̆r bơ̆n.”

Jang 9:22

Sôl bơtho rai đunh rai hơgei na lu bơngai Juđê oei tơ Pơlei Đamas ưh pă gơh pơjah ôh. Sư bơtho khan Yêsu boih 'Bok Krist mă 'Bok Kei-Dei ăn wă kơ pơgơ̆r bơ̆n.

Yo 20:31

Lu tơdrong chih lăm hla bơar 'nâu wă kơ lu iĕm lui kơ Yêsu Krist, Sư 'Bok Dŏng Pơklaih bơ̆n, Sư Kon 'Bok Kei-Dei. Dah lu iĕm lui lei lu iĕm gơh arih ling-lang yua kơ Sư.

Yo 11:27

Mathê drơ̆ng: “Ơ 'Bok, inh lui tơpă. Inh lui kơ Ih 'Bok Krist, Kon 'Bok Kei-Dei mă nhôn chang gô jur tơ ala teh âu wă dŏng pơklaih nhôn.”

Yo 4:42

Lu bơngai lui đơ̆ng rŏng khan kơ duch ei thoi âu: “Nhôn lui kơ Sư dang ei ưh kơ sĭ nhôn băt đơ̆ng ih ôh. Nhôn lui kơ Sư dang ei yua kơ nhôn kơtơ̆ng Sư bơtho na nhôn băt hloi kơ Sư 'Bok Dŏng Pơklaih kon bơngai tơpă.”

Yo 1:49

Nathanel khan kơ Sư dơ̆ng: “Ơ 'Bok Thây, lei Ih boih Kon Kră Yang 'Bok Kei-Dei, Ih Pơtao bơngai Isơrael tơpă.”

Yo 1:41

Na Andrê năm chă 'nhŏng sư Simôn, roi kơ 'nhŏng sư khan: “Nhôn 'bôh boih 'Bok Mêsi.” 'Bok Mêsi wă khan 'Bok Krist mă 'Bok Kei-Dei wơh wă pơgơ̆r kon bơngai.

Markôs 8:29

Klaih kơ noh Yêsu khan kơ lu sư: “Bĭ iĕm khan Inh bu?” Na Pêtrôs khan: “Ih 'Bok Krist mă 'Bok Kei-Dei wơh pơgơ̆r kon bơngai.”

I Yo 5:1

Bơngai bu lui kơ Yêsu 'Bok Krist mă 'Bok Kei-Dei wơh wă dŏng pơklaih bơ̆n, bơngai 'noh kon 'Bok Kei-Dei. Bơngai bu 'mêm kơ 'bă đe, bơngai 'noh kư̆m 'mêm kơ kon đe mơ̆n.

Jang 8:36

Kơplah bre sư oei yak rok trong ei, bre sư 'bôh đak. Na bơngai ei khan kơ Philip: “Ih lăng 'bơ̆t âu đei đak glung. Ih hăm gơh pơm kơ inh 'batem dang ei dah ưh?”

Luka 22:67

“Dah Ih 'Bok Krist tơpă, Ih jah roi kơ nhôn bĕ.” Na Yêsu khan kơ lu sư thoi âu: “Mă Inh roi kơ iĕm, iĕm kư̆m kuă kơ lui kơ Inh.

Markôs 14:61

Mă-lei Yêsu oei thĕng ưh kơ đei tơl sư thoi yơ ôh. 'Bok soi tơm jet Sư dơ̆ng: “Hăm trŏ kơ Ih 'Bok Krist Kon 'Bok Kei-Dei mă bơ̆n ư-ang dah ưh?”

Mathiơ 22:42

“'Bok Krist mă 'Bok Kei-Dei wơh pơm Pơtao, Sư bơngai thoi yơ? Sư kon sâu bu?” Lu sư khan: “Sư kon sâu pơtao Đawit.”

Mathiơ 5:47

Dah iĕm bôl tơduă lu 'nhŏng oh iĕm đĕch, lei 'Bok Kei-Dei lăng iĕm ưh kơ đei pha kiơ ôh. Lei lu bơngai mă ưh kơ lui kư̆m pơm thoi noh mơ̆n.

Mathiơ 26:63

Mă-lei Yêsu oei thĕng ưh kơ đei tơl sư thoi yơ ôh. 'Bok soi tơm jet Sư dơ̆ng: “Đei 'Bok Kei-Dei arih tơpă păng Sư 'bôh tôm tơdrong Ih pơm, na Ih athei roi kơ nhôn mă tơpăt, hăm trŏ kơ Ih 'Bok Krist, Kon 'Bok Kei-Dei tơpă dah ưh?”

Luka 9:19

Lu sư khan: “Mơ'nah đe krao Ih Yôhan, bơngai pơm kơ đe 'batem. Mơ'nah khan Ih Êli, bơngai mă pơtruh nơ̆r 'Bok Kei-Dei sơ̆. Mơ'nah dơ̆ng kư̆m khan Ih minh 'nu bơngai pơtruh nơ̆r 'Bok Kei-Dei nai sơ̆ iung arih dơ̆ng.”