Lêwi 25:17 - Sơ̆p Hlabơar Nơ̆r 'Bok Kei-Dei

¹⁷ Lăm lu iĕm 'nĕ kơ pơgâm sa rông 'bôt iĕm kơdih. Sơmă athei băt hli yom kơ Kră Yang 'Bok Kei-Dei yua kơ Inh boih Kră Yang 'Bok Kei-Dei lu iĕm.

Lêwi 25:17 Referans Kwoze

Lêwi 19:32

Lu iĕm athei iung dơ̆ng 'bơ̆t anăp bơngai sŏk ko, lu iĕm athei pơyom kơ bơngai kră păng hli yom kơ 'Bok Kei-Dei Inh boih Kră Yang.

Lêwi 19:14

'Nĕ kơ hiap bơngai klĭk, kư̆m 'nĕ kơ dan lê̆ tơmam kiơ 'bơ̆t anăp bơngai măt tol, wă pơm kơ sư kơtơih pơ̆k, ih athei hli yom kơ Kră Yang 'Bok Kei-Dei ih, Inh bơih Kră Yang.

Lêwi 25:43

Pơgơ̆r sư 'nĕ kơ pơjuă pơđep dêh, sơmă athei hli yom kơ Kră Yang 'Bok Kei-Dei ih.

Le 20:20

Môis tơl khan: Lê̆ kơ hli, yua kơ Kră Yang 'Bok Kei-Dei jur wă pơlong lăng lu iĕm, wă kơ iĕm đei jơhngơ̆m hli yom kơ sư, na huay kơ pơm yoch hăm sư.

Bl 42:18

Truh năr mă pêng; Jôsep khan kơ lu sư thoi âu: Inh hli kơ Kră Yang 'Bok Kei-Dei; athei pơm thoi âu, na gơh arih.

I Tes 4:6

Sư wă kơ bơ̆n gơ̆t tơdrong pơ'brơh kơ klo đe, dah akăn đe. Hơtai ki nhôn bơtho iĕm boih tơdrong 'noh khan 'Bok Kei-Dei wă phak dôm lu bơngai mă pơm kư̆ kă thoi noh.

Rom 11:20

Iĕm khan thoi noh trŏ mơ̆n mă-lei yua kơ kiơ 'Bok Kei-Dei chre hŭt dơng noh? Yua kơ sư ưh kơ chu lui. Na iĕm kư̆m lei-lăi, yua kơ iĕm lui na Sư klop tơ noh. 'Noh na iĕm 'nĕ pơang kơ đe, kơnh 'Bok Kei-Dei chre hŭt iĕm dơ̆ng.

Rom 3:18

Lu sư ưh kơ băt hli kơ 'Bok Kei-Dei.”

Jang 10:35

Lăm rim khŭl bơngai, bơngai bu lui kơkuh kơ 'Bok Kei-Dei păng pơm trŏ thoi Sư wă, 'Bok Kei-Dei kư̆m lăp đon kơ lu sư lei-lăi ngăl.

Jang 10:2

Sư ưh kơ sĭ bơngai Juđê mơ̆n mă-lei sư păng đĭ hnam dơnŏ sư lui kơkuh kơ 'Bok Kei-Dei. Sư kư̆m hơlăng kơ đe Juđê tơmam păng krao khan ling-lang kơ 'Bok Kei-Dei.

Jang 9:31

Yua kơ Sôl lui boih na lu bơngai lui kơ Yêsu oei jơ̆p-jang dêh Juđê păng dêh Galilê, dêh Samri hiôk-hian huay pă đei tơdrong truh tơ lu sư. Lu sư kư̆m rai đunh rai pran. Lu sư lui tơpă kơ Kră Yang păng Yang Bơhngol 'Lơ̆ng tơgŭm lu sư ling-lang, na lu sư rai đunh rai lơ.

Luka 12:5

Iĕm athei hli kơ 'Bok Kei-Dei mă gơh pơlôch akâu iĕm păng gơh hơtat iĕm tơ dơnâu ŭnh. Minh 'nu 'Bok Kei-Dei đĕch iĕm athei hli yom.

Malachi 3:5

“Inh gô năm jê̆ lu iĕm wă kơ sek tơlang păng Inh gô pơm tơ'bôh wă blơ̆ lu bơngai pơm kơnê̆, lu bơngai pơm pơyô kư̆ kă, lu bơngai hơlĕnh pơdăr, lu bơngai pơgâm sa jên lu bơngai jang mưng, pơjuă lu bơngai hơdro-po păng lu bơngai mơti, lu bơngai mă pơrăm lu bơngai tơmoi păng lu bơngai mă kuă kơkuh păng hli yom kơ Inh,” mă Kră Yang Tih Hloh khan thoi noh.

Je 22:16

Sư sek tơdrong tơpăt kơ lu bơngai dơnuh hin hăm lu bơngai pơmat-tat, na sư đei tơdrong pŭn hiôk. Hăm trŏ sư pơm thoi noh wă khan sư băt kơ Inh? Noh Kră Yang khan:

Tơdrông Pơđơk 22:22

'Nĕ pơgŏ iŏk tơmam lu bơngai dơnuh hoh; Noh yua kơ sư dơnuh hin răm boih. Kŭm 'nĕ pơjuă pơđep lu bơngai pơmat-tat 'bơ̆t 'măng jang pơlei.

Tơdrông Pơđơk 1:7

Hli yom kơ Kră Yang jing tơm tơdrong hlôh wao. Lu bơngai kơtul areh kơ tơdrong gơh hơgei păng nơ̆r bơtho pơhrăm.

Horiso 19:9

Hli yom kơ Kră Yang jơ̆ 'lơ̆ng rơgoh, oei oei truh tơ ning-mônh, Dôm tơdrong Kră Yang pơkă jơ̆ sĭt tơpă, đĭ-đăng trŏ ngăl.

Ne 5:15

Mă-lei lu kră wei-lăng adrol kơ inh pơgŏ kon pơlei tơgŭm tơmam sa păng sik, 'nguaih kơ puăn-jĭt sêikơl jên hu; lu bơngai đĭch đam kiơ̆ wei-lăng sư kư̆m wang chă apinh đơ̆ng kon pơlei đơ̆ng, mă-lei gah inh ưh kơ pơm thoi noh ôh; yua kơ hli yom kơ Kră Yang 'Bok Kei-Dei.

Ne 5:9

Inh khan dơ̆ng: “Tơdrong mă lu iĕm pơm noh ưh kơ 'lơ̆ng ôh hăm trŏ lu iĕm arih sa kiơ̆ trong băt hli yom kơ Kră Yang 'Bok Kei-Dei hli kơ lu bơngai ayăt che bơle hiĕk ăr kơ bơ̆n.

II Ho 19:7

Thoi noh, na hli yom bĕ kơ Kră Yang athei sek tơlang mă 'lơ̆ng, yua kơ Kră Yang lu bơ̆n Sư tơpăt, ưh kơ mơ̆t minh pah, ưh kơ đei pơdê bu kư̆m ưh kơ đei iŏk jên đe răt.”

I Sam 12:24

Athei băt hli yom kơ Kră Yang đĕch, đĭ jơhngơ̆m bơ̆jang kơ Sư; lu iĕm athei 'blŏk dôm tơdrong Sư pơm tih dêh kơ lu iĕm ưh kơ băt dang yơ!

Both 25:18

Lu sư ưh kơ băt hli yom kơ Kră Yang 'Bok Kei-Dei, na druh blah pơlôch đĭ lu bơngai yak đơ̆ng rŏng, kơplah iĕm rok trong, 'bơ̆t lu iĕm oei lap gleh rơmơ̆n rơmok.

Lêwi 25:14

Tơdah lu iĕm tĕch dah răt kiơ đơ̆ng rông 'bôt iĕm, iĕm 'nĕ kơ pơgâm sa dih băl.

Bl 39:9

Lăm hnam 'nâu ưh kơ đei bu tih hloh kơ inh păng kư̆m ưh kơ pơkơ̆m inh tơdrong kiơ, mă-lei gah ih, ưh kơ gơh ôh, yua kơ ih akăn yŏng tơ'ngla inh. Thoi yơ inh gơh pơm tơdrong kơnê̆ 'mê̆-'mach dêh thoi noh, na kư̆m pơm yoch păng Kră Yang 'Bok Kei-Dei mơ̆n.

Bl 22:12

Linh jang 'lơ̆ng khan thoi âu: “Lê̆ kơ hơ-ô ti ih tơ akâu kon hơ'lơ̆p âu păng kư̆m 'nĕ kơ pơrăm sư yua kơ dang ei Inh băt boih ih hli yom kơ Inh, na huay mah kơeng kơ kon ih wă pơyơ̆r kơ Inh.”

Bl 20:11

Abraham tơl: “Inh tơchĕng lăm dêh char âu ưh kơ đei bu băt hli yom kơ Kră Yang 'Bok Kei-Dei; na lu sư gô pơlôch inh, yua kơ 'ngeng kơ akăn inh.

Tơdrông Pơđơk 14:31

Bơngai bu pơjăm pơjuă bơngai dơnuh hoh noh pơjăm kơ Tơ'ngla pơjing sư; Bu mă 'mêm mơnat kơ bơngai dơnuh hoh noh ư-ang kơ Kră Yang.

Lêwi 19:13

'Nĕ kơ pơjăm pơjuă bơngai oei cheng pleh kơ ih, 'nĕ kơ tơtông tơgar tơmam lu sư. Tơmam apah bơngai jang kơ iĕm, 'nĕ kơ wei lê̆ tơ hnam iĕm truh tơnăr dơning.

Lêwi 25:36

'Nĕ kơ sa lơi kư̆m 'nĕ kơ iŏk yua đơ̆ng sưa sơmă athei hli yom kơ Kră Yang 'Bok Kei-Dei ih, na 'nhŏng oh ih gô oei hơdai ih.

Tơdrông Pơđơk 16:6

Đơ̆ng 'mêm băt sĭt tơdrong yoch gơh klaih; Đơ̆ng hli yom kơ Kră Yang na gơh weh đơ̆ng tơdrong kơnê̆.

Êsai 3:14

Kră Yang sek tơlang lu bơngai kră păng lu kră pơgơ̆r kon pơlei Sư khan: “Lu iĕm luăn sa bơih pơgar hơmu. Tơtông iŏk tơmam lu bơngai dơnuh oei tơ lăm hnam lu iĕm.