Je 51:11 - Sơ̆p Hlabơar Nơ̆r 'Bok Kei-Dei

¹¹ Maih bĕ 'brơ̆m tah 'bĕnh kơ jŏ chĕp bĕ khêl, Kră Yang pơdrŭt jơhngơ̆m lu pơtao char Mêđi, Iung blah dêh char Babilôn, Trŏ kơ Kră Yang pơlôch pơrăm sư. 'Nâu boih Kră Yang pơm tơwih. Sư pơm 'mong kơ hnam Sư.

Je 51:11 Referans Kwoze

Je 46:4

Ơ lu linh hao aseh, tah bĕ an, hao bĕ! Yơ̆l bĕ môk bơsei, năm săp pơrĕng; pat bĕ tơju, hrŭk ao mam!

Je 50:45

Thoi noh, mơ̆ng bĕ tơdă Kră Yang đei hơmet boih wă pơrăm dêh char Babilôn, păng tơdrong sư pơkă wă pơm kơ dêh char bơngai Kalđê. Mă lu kon triu iĕ đe kư̆m rôp ba đĭ đe gô pơrăm đĭ tơmăn 'nhĕt jing bri.

Je 50:9

'Nâu, Inh gô tơiung lơ dêh char pơgơ̆p băl đơ̆ng gah yă-nơ̆m, lu sư gô mơ̆t blah dêh char Babilôn, Lu sư dă linh wă blah iŏk; 'brơ̆m lu sư prah thoi 'brơ̆m lu linh tơblah hơgei, ưh kơ đei brŏk hoh.”

Je 46:9

Drong tơ anăp bĕ, ơ aseh! Puh mă tĕnh bĕ ơ lu bơngai hao gre aseh! Lu linh năm tơblah yak năm tơ anăp: Lu linh char Êthiôpi păng lu linh char Phut chĕp khêl. Lu linh char Liđi prah hră đam.

Sa 14:12

Đơ̆ng noh, 'nâu mă Kră Yang wă phak lu bơngai mă tơblah hăm Jêrusalem: Sư pơm ăn kơ jơ̆ng rim 'nu lu sư bluch kơplah lu sư oei dang dơ̆ng, klong măt lu sư gô ôm lăm măt, đơ̆ng noh hơpiĕt lu sư gô ôm lăm 'bơ̆r lu sư.

Sa 14:2

Thoi noh Inh gô akŭm đĭ-đăng dêh char gô tơblah hăm Jêrusalem păng pơlei tih đe gô iŏk, hnam akŭm đe gô tơgar iŏk, đe gô rôp pơgŏ, lăm minh puăt kon pơlei đe rôp pơm bơnă, mă-lei kon pơlei mă oei đei noh đe huay kơ pơrăm đơ̆ng lăm pơlei tih.

Je 51:35

Kon pơlei Siôn khan: ‘Rŏ kơ tơdrong mă đe pơm kơnê̆ kơ inh păng adrĕch adrung inh tuh kơ Babilôn.’ Kon pơlei Jêrusalem khan: ‘Rŏ kơ pham inh tuh tơ kon pơlei Kalđê!’ ”

Je 51:24

Inh gô pơm tơwih kơ dêh char Babilôn păng đĭ-đăng bơngai oei lăm char Kalđê 'bơ̆t anăp lu iĕm yua kơ đĭ-đăng tơdrong yoch lu sư pơm boih lăm pơlei Siôn.” Noh Kră Yang khan.

Je 51:12

Hơtŏk hla-kơ iung blah dur pơlei tih Babilôn. Ăn thim bĕ linh gak tơ rim anih gak Ăn bĕ kơ lu linh răp! Kră Yang pơkă boih wă pơm, Sư gô pơm tơdrong kiơ Sư khan boih kơ koh char Babilôn.

Je 50:25

Kră Yang pơih boih hnam tah tơmam tơblah Sư, Klơ̆m tơ 'nguaih boih tơmam tơblah Sư hil mĭl; Yua kơ Kră Yang Tih Hloh đei minh tơdrong athei pơm, Lăm teh đak bơngai Kalđê.

Êsai 46:11

Inh gô krao sem klang đơ̆ng gah hơlĕch; păng krao bơngai đơ̆ng dêh ataih pơm tơdrong inh wă. Tơdrong Inh pơma bơih, Inh gô pơm keh, dôm tơdrong Inh pơkă bơih, Inh gô pơm.

Êsai 45:5

Inh bơih Kră Yang, ưh kơ đei yang nai dơ̆ng ôh, 'nguaih kơ Inh ưh kơ đei Yang nai dơ̆ng. Mă đơ̆ng ih ưh kơ băt kơ inh, Inh gô ăn kơ ih pran kơtang.

Êsai 45:1

Kră Yang khan kơ Sirus bơngai Sư rơih tuh đak pơgang 'bâu phu. Inh rôp ti 'ma sư bơih wă pơm kơ lu dêh char chu kơ sư, na Inh iŏk lê̆ tơmam tơblah lu pơtao, wă pơih 'măng Jang pơlei, 'bơ̆t anăp sư, na đe ưh kơ gơh tang dơ̆ng!

Êsai 41:25

Inh tơiung minh 'nu bơngai đơ̆ng gah yă-nơ̆m păng sư năm bơih; Minh 'nu đơ̆ng gah 'năr lĕch sư krao apinh hăm Anăn Inh Sư pơjuă kơpal lu 'bok pơgơ̆r nhen pơjuă teh hlŭt, nhen thoi bơngai man gŏ pơjuă teh lơ̆n.

Êsai 21:5

Đe hơmet gơ'bang sa et, đe lơ̆k che, đe sa păng et. Ơ lu yŏng pơgơ̆r iung bĕ tuh đak rơmă kơ khêl iĕm.

Êsai 21:2

Đei tơ'bôh kơ inh tơdrong hli krưp dêh. Lu bơngai chă tơgar oei chă tơgar, lu bơngai pơrăm, oei chă pơrăm, ơ bơngai Êlam tŏk bĕ, ơ bơngai Mêđi! Wang bĕ, Inh gô pơtôch lê̆ dôm nơ̆r ôr ơh sư.

Êsai 10:26

Kră Yang Tih Hloh gô chĕp sơnguĕt teh lu sư. Thoi Sư đei pơm kơ kon pơlei Midian 'bơ̆t tơmo Ôrep; păng Sư kư̆m yơ̆r 'long jra tơ kơpal đak dơsĭ, thoi Sư đei pơm tơ Êyiptơ sơ̆.

Esơra 1:1

Sơnăm blŭng-a lăm chăl Sirus, pơtao pơgơ̆r dêh char Phersia, Kră Yang wă pơsĭt nơ̆r Sư đei yua 'bơ̆r Jêrêmi đei khan, na Sư pơm ăn kơ jơhngơ̆m Sirus, pơtao Phersia ră roi jơ̆p-jang kơ teh đak sư kơdih păng kư̆m đei chih hla bơar tơjur nơ̆r sư thoi âu:

II Ho 36:22

Lăm sơnăm blŭng-a chăl Sirus pơm pơtao Persia, Kră Yang wă pơsĭt nơ̆r Sư mă Jêrêmi đei khan adrol boih, Kră Yang pơm ăn kơ jơhngơ̆m Sirus pơtao Persia, wă kơ sư roi tơbăt tơ jơ̆p-jang teh đak sư, hăm chih hla bơar roi tơbăt khan:

I Ho 5:26

Na Kră Yang 'Bok Kei-Dei Isơrael, pơtrŭt jơhngơ̆m Pul, pơtao dêh char Asiri păng Tiglat Phileser pơtao dêh char Asiri, rôp lu kon pơlei bơngai Rubên, bơngai Gat păng minh puăt bơngai Manase anhăk ba lu sư tơ pơlei Hala, Habôr, Hara, păng tơ tơring đak Krong Gôsan, dĭng truh tơ dang ei.

I Pot 11:23

Kră Yang 'Bok Kei-Dei ăn minh 'nu ayăt hăm sư, bơngai nai dơ̆ng anăn sư Rêson kon drŏ-nglo Êliađa, kơdâu klĕnh đơ̆ng yŏng sư Hadadêser pơtao char Sôba.

I Pot 11:14

Kră Yang atŏk minh 'nu bơngai ayăt tơblah hăm Sôlômôn, 'noh Hađat bơngai Eđôm; sư bơngai adrĕch adrung pơtao Eđôm.

Lêwi 26:25

Inh gô ăn đao hơlă pơm kơ lu iĕm. Wă pơm 'mong đêl iĕm pơm glăi tơdrong pơgơ̆p Inh; tơdah lu iĕm akŭm băl lăm pơlei tih lu iĕm, Inh gô ăn tơdrong jĭ hơbuh 'bơm tơ lu iĕm păng jao iĕm lăm ti lu bơngai ayăt kơ iĕm.

Je 25:25

Ăn đĭ kơ rim pơtao Simri, đĭ-đăng pơtao char Êlam, ăn kơ lu pơtao char Mêđi.

Je 46:3

“Hơmet bĕ khêl tih iĕ, năm tơblah!

Je 50:3

Đei dêh char đơ̆ng yă-nơ̆m blah sư, Pơm kơ dêh char noh jing juơ tơtŭng. Tơ noh pă đei bơngai oei, Mă kon bơngai păng lu kon sem brem kơdâu jăk đĭ.”

Je 51:36

Lei na Kră Yang khan: “'Nâu Inh gô dŏng ih, Inh pơm tơwih kơ lu ayăt kơ ih. Inh gô pơhrơ̆ lê̆ đak dơsĭ sư, Ăn kơ rim tu đak sư hrơ̆ kro.

Da 5:30

Lăm măng noh hloi pơtao Belsatsar bơngai Kalđê đe pơlôch.

Jôel 3:9

Ră roi bĕ tơdrong âu jơ̆p kơ teh đak đe. Hơmet bĕ tơdrong tơblah, pơdrŭt jơhngơ̆m lu linh pran kơtang iung blah. Ăn kơ đĭ-đăng lu linh gơh tơblah năm tơ anăp bĕ, ăn kơ lu sư blah!

Jôel 3:10

Iŏk bĕ pla 'nhik pơm đao gưm, iŏk săng kô pơm tơbăk. Lu bơngai tơrăn athei khan bĕ thoi âu: ‘Inh âu pran kơtang!’