Je 46:27 - Sơ̆p Hlabơar Nơ̆r 'Bok Kei-Dei

²⁷ “Ơ Jakôp đĭch đam Inh, 'nĕ kơ hli! Ơ Isơrael 'nĕ tơrơ tăr wăr! Inh gô pơklaih ih đơ̆ng anih ataih hơtŏ, dŏng pơklaih adrĕch adrung ih đơ̆ng dêh char mă oei pơm đĭch. Jakôp gô wih brŏk arih jang sa hiôk-hian, ưh pă đei hli kơ bu dơ̆ng.”

Je 46:27 Referans Kwoze

Êsai 43:5

'Nĕ kơ hli ôh, yua kơ Inh oei hơdai iĕm. Inh gô chông adrĕch adrung iĕm đơ̆ng gah hơlĕch păng akŭm lu iĕm đơ̆ng gah bơmơ̆t.

Êsai 43:1

Dang ei Kră Yang khan thoi âu: Ơ Jakôp Sư Tơ'ngla pơjing iĕm, ơ Isơrael! Sư bơih Tơ'ngla pơjing iĕm, 'nĕ kơ hli yua kơ Inh huai iŏk iĕm bơih. Inh bơih krao iĕm hăm anăn iĕm păng iĕm gah Inh.

Je 50:19

Mă-lei Inh gô chông bơngai Isơrael brŏk tơ anih 'nhĕt sư. Lu sư gô sa 'nhĕt tơ kông Karmel păng lăm groi Basan, lu sư gô sa phĭ hrăp tơ groi Êphraim păng lăm char Gileat.”

Je 29:14

Kră Yang khan: “Inh gô ăn kơ lu iĕm tơ'bơ̆p Inh păng Inh gô iŏk chông anhăk pơdrâu lu iĕm brŏk đơ̆ng pơm bơnă.” Kră Yang khan: “Inh gô akŭm pơđĭ lu iĕm đơ̆ng jơ̆p kơ dêh char, đơ̆ng rim pơlei pơla mă Inh đei puh lu iĕm tơ noh păng gô iŏk anhăk lu iĕm wih brŏk tơ teh đak mă đêl Inh puh iĕm đơ̆ng noh sơ̆.”

Am 9:14

Inh gô chông lu bơngai Isơrael brŏk đơ̆ng pơm bơnă, lu sư gô pơjing pơdơ̆ng dơ̆ng lu pơlei tih mă đêl đe pơrăm păng oei hloi tơ noh. Lu sư gô choh pơtăm mir hơmu păng huch đak sư, gô choh pơtăm war mir pơgar hla 'nhot, plei 'long păng gô sa plei sư.

Je 33:16

Lăm lu năr noh; adrĕch Juđa gô đei dŏng pơklaih; Jêrusalem gô oei hiôk-hian păng gô krao anăn Kră Yang boih tơpăt hơnơ̆ng lu nhôn.’ ”

Je 23:6

Lăm chăl Sư pơgơ̆r khŭl bơngai Juđa gô đei dŏng pơklaih; păng bơngai Isơrael đei arih hiôk hơđơ̆ng. 'Nâu anăn đe gô krao Sư: ‘Kră Yang boih 'lơ̆ng tơpăt lu nhôn.’ ”

Êsai 44:2

Kră Yang khan thoi âu: Inh Tơ'ngla pơjing lu iĕm, man lu iĕm oei đơ̆ng lăm klak mĕ, păng gô tơgŭm lu iĕm: Ơ Jakôp đam Inh păng Jêsurun mă Inh rơih iŏk bơih 'nĕ kơ hli.

Je 32:37

“'Nâu, Inh gô hơrui akŭm lu sư đơ̆ng jơ̆p kơ dêh char mă đơ̆ng Inh hil mĭl dêh na mă Inh pơpuh lê̆ lu sư tơ noh; Inh gô chông tơwih lu sư brŏk tơ anih 'nâu, wă kơ lu sư oei jang sa rơnŭk rơnua.

Êsêkiên 39:25

Na, Kră Yang khan thoi âu: Âu Inh gô ăn kơ lu adrĕch Jakôp wih brŏk; hiôk-hian păng 'mêm mơnat kơ đĭ-đăng lu adrĕch Isơrael, păng gô gar anăn 'lơ̆ng rơgoh Inh.

Êsêkiên 36:24

Inh gô dui iŏk lu iĕm đơ̆ng lăm lu dêh char akŭm pơpôi lu iĕm đơ̆ng jơ̆p kơ teh đak, ba lu iĕm wih brŏk oei tơ char lu iĕm kơdih.

Êsai 14:3

Truh năr Kră Yang ăn kơ iĕm pơdơh pơklaih iĕm đơ̆ng tơdrong ơh sơ'ngon hli tơrơ păng đơ̆ng tơdrong jang gleh trăp mă đêl đe rôp pơgŏ iĕm,

Êsai 44:1

“Dang ei mơ̆ng bĕ, ơ Jakôp đam Inh, ơ Isơrael mă Inh rơih iŏk bơih.

Je 51:46

'Nĕ kơ ơh klai, kư̆m 'nĕ kơ hli tơrơ mă kơtơ̆ng đe roi lăm teh đak âu. Sơnăm âu, đe roi thoi âu sơnăm đơ̆ng rŏng kơtơ̆ng đe roi thoi to. Tơdrong pơm tơwih băl lăm teh đak, lu yŏng pơgơ̆r gô tơgar băl pơm yŏng pơgơ̆r tơ'bet pơlôch băl.

Êsêkiên 16:53

Inh gô ba brŏk Sôđôm hăm lu kon drŏ-kăn sư, păng Samari hăm lu kon drŏ-kăn sư ăn rơngei dơ̆ng păng ih hăm lu sư wih brŏk ăn rơngei.