I Tim 2:3 - Sơ̆p Hlabơar Nơ̆r 'Bok Kei-Dei

³ Bơ̆n krao khan thoi noh 'lơ̆ng tơpă păng Kră Yang 'Bok Kei-Dei lăp đon tơpă. Sư pơklaih bơ̆n đơ̆ng tơdrong yoch.

I Tim 2:3 Referans Kwoze

Hêbrơ 13:16

Iĕm 'nĕ hiơt kơ tơdrong pơm 'lơ̆ng kơ đe, iĕm athei ra tơmam iĕm kơdih wă tơgŭm lu 'nhŏng oh dơnuh. Tơdrong noh kư̆m dang ra tơmam soi mơ̆n, wă pơhiôk kơ 'Bok Kei-Dei.

I Tim 1:1

Inh Pôl jơ̆ng 'bang Yêsu Krist chih hơpong kơ Timôthê. Hmach kơ ih, dăm. Ih kon inh tơpă kơlih kơ ih lui kơ Kră Yang Yêsu Krist đơ̆ng inh bơtho ih sơ̆. Kră Yang 'Bok Kei-Dei hăm Kon Sư Yêsu Krist athei inh pơm jơ̆ng 'bang Sư. 'Bok Kei-Dei dŏng pơklaih bơ̆n đơ̆ng tơdrong yoch. Bơ̆n lui kơ Yêsu Krist bơ̆n băt kơ Sư gô ăn kơ bơ̆n oei hơdai hăm Sư ning-mônh. Inh krao khan apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng ih tôm tơdrong. Apinh Sư mơnat kơ ih, hăm ăn kơ ih hiôk-hian ling-lang.

I Pet 2:20

Pơtih gia, dah bơ̆n pơm kơnê̆ kơ sư hơdrol, na sư tôn teh bơ̆n, mă bơ̆n thĕng đĕch, noh kư̆m ưh kơ yua kiơ ôh, ưh kơ đei bu khan bơ̆n bơngai 'lơ̆ng dơ̆ng. Dah bơ̆n 'nĕ chă pơm kơnê̆ kơ sư, gô mơ̆ng kơ sư chă areh kơ bơ̆n đĕch, noh 'Bok Kei-Dei lăp đon.

Rom 14:18

Bơngai mă lui yom kơ Yêsu thoi noh, bơngai noh 'Bok Kei-Dei lăp đon, mă tơduă kon bơngai kư̆m lăp đon mơ̆n.

I Pet 2:5

Sư ăn kơ bơ̆n arih, na tơdrong arih lu bơ̆n kư̆m thoi lĕ kơ tơmo noh mơ̆n, bơ̆n thoi tơmo 'Bok Kei-Dei yua wă pơjing hnam Sư. Păng bơ̆n kư̆m thoi lu bơngai soi kơ 'Bok Kei-Dei sơ̆, lu sư pơyơ̆r kơ 'Bok Kei-Dei tơmam. Gah lu bơ̆n dang ei, bơ̆n gơnang kơ Yêsu Krist bơ̆n kư̆m pơyơ̆r kơ 'Bok Kei-Dei tơdrong mă Sư lăp đon mơ̆n.

I Tes 4:1

Ơ 'nhŏng oh, âu dơ̆ng: Hơtai ki nhôn bơtho iĕm khan bơ̆n athei kiơ̆ tôm tơdrong 'Bok Kei-Dei wă kơ Sư lăp đon. Mă-lei dang ei iĕm kư̆m kiơ̆ thoi noh boih. Bơ̆n 'nhŏng oh yua kơ bơ̆n lui kơ Kră Yang Yêsu, na nhôn bơtho khan kơ iĕm, wă kơ iĕm pơm kiơ̆ tôm tơdrong 'Bok Kei-Dei khŏm khŏm, na tơdrong lui bơ̆n rai đunh rai kơjăp.

Kôlôsê 1:10

Thoi noh na iĕm gơh pơm trŏ thoi Sư wă, trŏ thoi Sư lăp đon. Iĕm gô pơm dôm tơdrong 'lơ̆ng dôm tơdrong tơpăt, rai đunh rai hlôh băt tơdrong 'Bok Kei-Dei.

Luka 1:47

jơhngơ̆m inh hiôk yua kơ 'Bok Kei-Dei pơklaih inh.

Philip 1:11

Yua kơ iĕm pơm tôm tơdrong 'lơ̆ng tơpăt păng gơnang kơ Yêsu Krist đơ̆ng dang ei, na đĭ-đăng bơngai gô ư-ang kơ 'Bok Kei-Dei tơpă.

I Tim 5:4

Mă-lei lu bơngai drŏ-kăn adro đei kon dah sâu sư, noh lê̆ lu kon sâu lu sư 'noh 'me sa sư. 'Bok Kei-Dei wă kơ bơ̆n wei-lăng 'me sa mĕ 'bă, yă 'bok bơ̆n kơdih. Bơ̆n athei 'me plơ̆ sư dơ̆ng.

Philip 4:18

Iĕm tơgŭm mơnat kơ inh tôm tơdrong tơmam tơpă. Iĕm wơh minh 'nu Êpaphôdit năm ba kơ inh tơmam noh, na dang ei inh đei tôm tơdrong tơmam rơkah rơkai boih đơ̆ng iĕm tơgŭm inh. Tơmam noh dang tơmam 'bâu phu đe pơyơ̆r kơ 'Bok Kei-Dei, na Sư lăp đon kơ iĕm tơpă.

Êsai 45:21

Lê̆ lu sư năm pơđâu băl Ră roi bĕ, pơdah bĕ khan bĕ. Đơ̆ng chăl adrol sơ̆ bu ră roi pơdah tơdrong âu? Bu pơdah tơdrong âu đơ̆ng blŭng-a sơ̆? Hăm trŏ kơ Inh Kră Yang ưh? 'Nguaih kơ Inh ưh kơ đei 'Bok Kei-Dei nai ôh! Ưh kơ đei 'Bok Kei-Dei 'lơ̆ng tơpăt nai păng ưh kơ đei Kră Yang dŏng pơklaih nai yua kơ Inh bơih Kră Yang 'Bok Kei-Dei, ưh kơ đei yang nai dơ̆ng.

II Tim 1:9

'Bok Kei-Dei pơklaih bơ̆n đơ̆ng tơdrong yoch. Sư krao iŏk bơ̆n wă kơ bơ̆n jing kon 'lơ̆ng tơpăt Sư. Sư krao bơ̆n ưh kơ sĭ bơ̆n pơm tơdrong 'lơ̆ng na Sư krao ôh, Sư krao bơ̆n yua kơ Sư 'mêm mơnat kơ bơ̆n. Đơ̆ng blŭng-a sơ̆ Sư tam mă pơjing plĕnh păng teh, đơ̆ng noh boih Sư 'mêm mơnat kơ bơ̆n wă ăn Yêsu Krist pơklaih bơ̆n.

I Tim 4:10

Thoi noh na bơ̆n athei adrin tơpă jang tơdrong 'Bok Kei-Dei yua kơ bơ̆n băt tơpă boih Sư arih ling-lang păng dŏng pơklaih đĭ-đăng bơngai đơ̆ng tơdrong yoch, dôm lu bơngai lui kơ Sư.