I Pot 8:23 - Sơ̆p Hlabơar Nơ̆r 'Bok Kei-Dei

²³ Păng khan; “Ơ Kră Yang lu bơngai Isơrael, mă oei tơ kơpal plĕnh ti dah tơ anih âu, ưh kơ đei yang nai thoi Ih, Ih 'mêm mơnat kơ lu đĭch đam Ih păng wei răk dôm nơ̆r Ih đei pơkă pơkăm hăm lu sư. Bu mă đĭ jơhngơ̆m năm păng oei hăm Ih.

I Pot 8:23 Referans Kwoze

II Sam 7:22

Ơ Kră Yang, Kră Yang inh, Ih boih Kră Yang Tih Hloh ưh kơ đei bu hơtŏ kơ Ih, păng ưh kơ đei Kră Yang 'Bok Kei-Dei nai hloh kơ Ih, thoi kơ đon nhôn đei kơtơ̆ng boih.

Both 7:9

Thoi noh na iĕm athei băt kơnăl kơ Kră Yang 'Bok Kei-Dei iĕm, 'noh boih Kră Yang 'Bok Kei-Dei, wă khan Kră Yang 'Bok Kei-Dei tơpăt, wei tơdrong pơgơ̆p păng 'mêm truh tơ rơbâu jơhnơr kơ lu bơngai bu mă 'mêm kơ Sư păng wei răk dôm nơ̆r sư tơtă.

Da 9:4

Thoi noh, na inh krao khan kơ Kră Yang 'Bok Kei-Dei inh păng inh tơbral yoch inh hăm Sư. Thoi âu: Ơ! Kră Yang 'Bok Kei-Dei Tih hloh, trŏ kơ hli krưp! Ih mă oei răk dôm nơ̆r đêl pơkă păng tơdrong 'mêm mơnat kơ lu bơngai mă 'mêm kơ Ih păng lu bơngai oei răk khôi juăt Ih.

Ne 1:5

Ơ Kră Yang 'Bok Kei-Dei kơ hơtăl plĕnh, wă khan Kră Yang 'Bok Kei-Dei tih hloh păng trŏ kơkuh tơ'ngla wei nơ̆r pơgơ̆p păng jơhngơ̆m 'mêm mơnat kơ lu bơngai mă kơkuh 'mêm kơ Sư păng wei răk dôm nơ̆r tơtă đơ̆ng Sư!

Ne 9:32

Yua kơ thoi noh na dang ei. Ơ Kră Yang 'Bok Kei-Dei lu nhôn Ih boih Kră Yang 'Bok Kei-Dei tih hloh mơsêh mơyang trŏ kơ hli yom, bơwei tơdrong pơgơ̆p păng tơdrong pơm 'lơ̆ng, 'nĕ lăng tơdrong âu thoi iĕ đĕch 'bơ̆t anăp Ih dôm lu tơdrong jĭ jăn pơmat-tat đei truh boih kơ lu nhôn, tơ lu pơtao păng lu kră pơgơ̆r, tơ lu 'bok soi păng lu 'bok khan lê̆ adrol, kơ 'bok yă lu nhôn păng tơ kon pơlei Kră Yang, đơ̆ng chăl lu pơtao Asiri truh tơ dang ei.

I Sam 2:2

Ưh kơ đei bu 'lơ̆ng rơgoh thoi Kră Yang ôh, Ưh kơ đei bu nai thoi Ih; ưh kơ đei tơmo ayơ pĕng lu nhôn thoi Kră Yang 'Bok Kei-Dei.

Le 15:11

Ơ Kră Yang! Lăm lu yang bu yang, thoi Ih? 'Lơ̆ng rơgoh, mơsêh mơyang, mă đei ư-ang, Trŏ kơ hli, trŏ kơ pơyom, gơh pơm dôm tơdrong hlĭch chrơp.

Luka 1:72

Sư pơm tơdrong noh wă kiơ̆ kơ tơdrong Sư pơkă kơ 'bok kơdră bơ̆n sơ̆, khan gô wă tơgŭm bơ̆n tơpă.

Je 10:16

Tơmam Kră Yang 'Bok Kei-Dei 'măn kơ Jakôp ưh kơ trŏ thoi noh ôh, yua kơ Sư boih pơjing kơ đĭ-đăng tôm tơmam, mă bơngai Isơrael kư̆m adrĕch adrung Sư; Kră Yang Tih Hloh noh anăn Sư.

Je 10:6

Ưh kơ đei yang kiơ thoi Ih ơ Kră Yang. Ih boih Kră Yang Tih Dêh, Ih mơsêh mơyang pran kơtang hloh.

Êsai 40:25

Tơ'ngla 'Lơ̆ng Rơgoh khan: “Lu iĕm wă pơting Inh hăm bu?” Bu hơtŏ hăm Inh?

Horiso 113:5

Bu đei thoi Kră Yang 'Bok Kei-Dei lu bơ̆n? Tơ'ngla oei lăm anih kơpal hloh;

Êsai 40:18

Lu iĕm hăm gơh pơting Kră Yang 'Bok Kei-Dei hăm bu? Iĕm iŏk hơbŏ kiơ wă pơtih hăm Sư?

Horiso 86:8

Ơ Kră Yang, lăm lu yang ưh kơ đei bu thoi Ih; Dôm tơdrong jang lu sư kư̆m ưh kơ đei thoi tơdrong jang Ih.

Horiso 35:10

Lu kơting inh khan: “Ơ Kră Yang. Bu thoi Ih, Ih pơklaih lu bơngai tơrăn đơ̆ng lu bơngai pran hloh kơ sư. Tơgŭm lu bơngai pơmat păng lu bơngai dơnuh hoh kơđei đơ̆ng ti lu bơngai tơtông tơgar.”

II Pot 20:3

“Ơ Kră Yang! Apinh Ih 'blŏk kơ inh, đêl inh yak kiơ̆ Ih tơnăp tơpăt păng đĭ jơhngơ̆m pơm 'lơ̆ng 'bơ̆t anăp Ih.” Đơ̆ng noh Hesekia nhơ̆m hơdrĭ hơdrôi đĭ jơhngơ̆m.

I Pot 6:12

“Gah Hnam akŭm mă ih oei pơm dang ei 'nâu, tơdah ih chu pơm kiơ̆ nơ̆r Inh tơtă păng chĕp răk dôm tơdrong juăt Inh bơtho khan, wei răk nơ̆r Inh tơtă păng pơm kiơ̆, lei inh gô pơsĭt lu nơ̆r inh đei pơkă kơ 'bă ih Đawit lăm chăl arih ih.

I Pot 3:6

Sôlômôn tơl: “Ih đei tơ'bôh bơih tơdrong 'mêm mơnat tih kơ đĭch đam ih Đawit, 'bă inh, yua kơ sư đei đon lui păng jơhngơ̆m đon tơpăt 'bơ̆t anăp Ih: Ih oei tơ'bôh tơdrong 'mêm mơnat tih, na ăn kơ sư đei minh 'nu kon drŏ-nglo hơ-oei kơpal tang-dŏ pơtao sư truh năr 'nâu.

I Pot 2:4

păng wă kơ Kră Yang gô pơsĭt nơ̆r Sư pơkă hăm inh khan: ‘Tơdah lu kon sâu ih kơchăng arih sa, tơdah lu sư wă yak năm 'bơ̆t anăp Inh, pơm kiơ̆ tơdrong juăt Inh hăm đĭ jơhngơ̆m klơm klak, lei ih ưh kơ'bah ôh bơngai hơ-oei kơpal tang-dŏ pơtao Isơrael pơtrơp ih.’

Le 3:15

Kră Yang 'Bok Kei-Dei khan kơ Môis dơ̆ng. Ih khan kơ kon pơlei Isơrael thoi âu: Kră Yang 'Bok Kei-Dei 'bok lu iĕm, Kră Yang 'Bok Kei-Dei Abraham, Kră Yang 'Bok Kei-Dei Isăk, Kră Yang 'Bok Kei-Dei Jakôp wơh inh năm tơ lu iĕm, Kră Yang khan: 'Noh jơ̆ anăn Inh oei oei ling-lang, 'noh boih wă kơ đe 'blŏk kơ Inh rim jơhnơr.

Bl 33:20

Tơ anih noh sư pơm chơnang soi, sư anăn Êl Êlôhe Isơraelc

Bl 17:1

Kơplah Abram tơsĭn-jĭt tơsĭn sơnăm, na Kră Yang tơ'bôh kơ Abram păng khan thoi âu: “Inh boih Kră Yang 'Bok Kei-Dei mơsêh mơyang, ih athei oei 'bơ̆t anăp Inh na ih jing minh 'nu bơngai 'lơ̆ng tơpăt.

I Pot 8:24

Ih kư̆m wei răk nơ̆r pơkă Ih hăm đĭch đam Ih Đawit 'bă inh trŏ tơpă tơdrong kiơ mă ti mơsêh mơyang Ih pơm keh hloi dang ei.

Esơra 1:3

Bơngai bu lăm lu iĕm, mă kon pơlei Sư, athei wih brŏka tơ pơlei Jêrusalem dêh Juđa, wă pơm ming dơ̆ng hnam akŭm Kră Yang, Sư boih Kră Yang 'Bok Kei-Dei lu bơngai Isơrael, mă oei lăm pơlei Jêrusalem. Hơpơi kơ Kră Yang 'Bok Kei-Dei bơngai noh oei hơdai hăm sư!

Both 7:12

Tơdah iĕm mơ̆ng păng pơm kiơ̆ dôm lu tơdrong juăt âu, Kră Yang 'Bok Kei-Dei iĕm gô wei nơ̆r pơgơ̆p păng tơdrong 'mêm mơnat mă Sư đei pơkă hăm lu 'bok iĕm sơ̆.