I Pot 21:7 - Sơ̆p Hlabơar Nơ̆r 'Bok Kei-Dei

⁷ Jêsebel akăn sư khan kơ sư: “Dang ei hăm trŏ kơ ih pơgơ̆r lu bơngai Isơrael ưh? Jah iung păng sŏng bĕ, chơt hiôk bĕ, Inh gô ăn kơ ih mir hơmu Nabôt, bơngai Jêsreel.”

I Pot 21:7 Referans Kwoze

Mi 7:3

Ti lu sư hrăn nŏng kơ pơm kơnê̆. Yŏng pơgơ̆r chă apinh mŭk tơmam, 'bok sek tơlang kư̆m hrăn chă sa pơgâm, gah bơngai pran kơtang 'maih pơm kơnê̆ kiơ̆ kơ jơhngơ̆m kơdih; thoi noh na lu sư pơđâu hơdai.

Bôk Bơthô 8:4

Mă loi, nơ̆r pơtao pơma đei tơdrong gơh kĕ; hăm đei bu pơ̆n pơma plơ̆ kơ sư khan: Ih pơm kiơ?

Bôk Bơthô 4:1

Inh lăng tơ rŏng, 'bôh dôm tơdrong pơjuă pơđep băl tơ ala teh; to bơngai mă đe pơjuă pơđep nhơ̆m ơh sơ'ngon, ưh kơ đei bu pơlung lu sư! Lu bơngai gơh chă pơjuă pơđep, mă-lei ưh kơ đei bu dŏng pơlung lu bơngai mă đe pơjuă pơđep noh!

Tơdrông Pơđơk 30:31

Iĕr tơmông bơbe bram yak nơnăm hăm pơrŏ jơ'nguơ̆ng; Păng thoi pơtao tơdah lu linh sư oei tăp dăr kơ sư.

II Sam 13:4

Jônadap jet Amnôn: “Ơ kon pơtao, lơliơ rai đunh rai rơmơ̆n rơmok thoi noh? Hăm gơh roi ăn kơ inh?” Amnôn tơl: “Inh hưch kơ Tamar, oh drŏ-kăn Apsalôm, Apsalôm oh drŏ-nglo inh.”

I Sam 8:14

Sư gô iŏk mir chŭn, pơgar hơmu păng mir 'long ôliwơ mă 'lơ̆ng hloh đơ̆ng lu iĕm, na ăn kơ đĭch đam sư.

I Sam 8:4

Na đĭ-đăng lu yŏng kră pơgơ̆r bơngai Isơrael akŭm băl, năm chă Samuel tơ hnam Sư tơ pơlei Rama,

Lu 19:6

Thoi noh klo kăn bre sư hơ-oei sŏng sa hơdai, na 'bă bơngai drŏ-kăn noh khan dơ̆ng: Ơ dăm, apinh ih oei tơ âu pă minh măng âu dơ̆ng wă kơ jơhngơ̆m ih hiôk chơt.

Ru 3:7

Đang kơ sŏng sa boih 'Bôô jơhngơ̆m sư hiôk dêh, sư năm 'bĭch tep tơ cheng pôi 'ba, Rut năm chơlon hơdar hơdar pơih khăn 'bơ̆t jơ̆ng sư na 'bĭch hloi.

I Pot 21:6

Sư tơl: “Yua kơ inh khan kơ Nabôt bơngai Jêsreel: ‘Tĕch ăn kơ inh mir hơmu ih 'noh inh gô ăn jên dah mă tơplih băl hăm mir hơmu inh nai kư̆m bưh, mă-lei sư khan: ‘Inh ưh kơ gơh ăn kơ ih mir hơmu inh.’ ”

Am 6:12

Iĕm hăm lah ăn kơ aseh kơdâu kơpal tơmo tih? Đe hăm choh rơmo tơ kơpal tơmo? Mă-lei lu iĕm tơplih tơdrong tơpăt jing tơdrong chhŭr nuih păng tơplih plei 'lơ̆ng tơpăt jing plei tăng.