I Pet 5:9 - Sơ̆p Hlabơar Nơ̆r 'Bok Kei-Dei

⁹ Thoi noh na bơ̆n athei lui mă kơjăp wă kơ bơ̆n gơh puh sư mă ataih. Iĕm kư̆m băt boih đĭ-đăng 'nhŏng oh bơngai lui oei jơ̆p-jang kơ teh đak tă đei tơdrong gleh thoi iĕm mơ̆n.

I Pet 5:9 Referans Kwoze

Ya 4:7

Thoi noh na iĕm athei chu yom kơ 'Bok Kei-Dei, apinh 'Bok Kei-Dei pơpuh yang Satan yŏng pơgơ̆r yang kơnê̆, 'nĕ ăn oei jê̆ iĕm, na yang Satan ưh kơ pơ̆n oei jê̆ iĕm, jăk hloi tơ nai.

Jang 14:22

Tơ rim pơlei ei bre sư bơtho khan kơ lu bơngai lui, wă kơ lu sư lui mă kơjăp. Bre sư khan bơ̆n athei đei lơ tơdrong pơmat-tat adrol 'mơ̆i na gơh mơ̆t tơ dêh char 'Bok Kei-Dei.

I Pet 2:21

'Bok Kei-Dei krao iŏk bơ̆n wă kơ bơ̆n iŏk jơhngơ̆m đon dim gơh găt kuă ăn pơm kơnê̆ kơ đe mă khan đe pơm kơnê̆ kơ bơ̆n. Yêsu Krist đei tơdrong gleh pơmat-tat thoi noh mơ̆n sơ̆ yua wă tơgŭm bơ̆n. Mă-lei Sư ưh kơ đei pơm kơnê̆ kơ đe ôh, Sư pơm trong wă kơ bơ̆n rok kiơ̆ Sư.

I Kor 10:13

Gah tơdrong đe pơhlŭ wă kơ iĕm kiơ̆ sư pơm yoch, lu 'nhŏng oh bơ̆n nai đe kư̆m pơhlŭ mơ̆n. Mă-lei 'Bok Kei-Dei wei-lăng bơ̆n, Sư ưh kơ ăn đe pơhlŭ bơ̆n truh tơ bơ̆n pơm tơdrong yoch ôh, Sư gô tơgŭm bơ̆n tơpă wă kơ bơ̆n huay kơ lui kơ đe pơhlŭ.

II Tim 3:12

Dôm lu bơngai mă gơnang kơ Kră Yang Yêsu Krist wă pơm đon 'lơ̆ng tơpăt, lu sư gô đei tơdrong đe areh pơm kơnê̆ kơ lu sư.

Êphêsô 6:16

Athei chĕp khêl ling-lang wă tang akâu bơ̆n hli kơ 'brơ̆m ŭnh yang kơnê̆ prah 'bơm bơ̆n; 'noh wă pơtih gia kơ bơ̆n athei kơchăng hli kơ bơ̆n đei tơdrong pơhlŭ wă kơ bơ̆n oei kơjăp lăm tơdrong lui.

I Pet 3:14

Dah đe pơm kơnê̆ kơ bơ̆n yua kơ bơ̆n pơm 'lơ̆ng, noh bơ̆n rai hiôk hloh. Iĕm 'nĕ kơ hli kơ tơdrong lu sư pơm, iĕm 'nĕ kơ tơrơ kơ tơdrong lu sư ngơ̆r.

Hêbrơ 11:33

Lu sư đei đon lui tơpă, na lu sư kĕ blah iŏk lơ teh đak noh nai. Lu sư bơngai pơgơ̆r tơpăt ling-lang, lu sư 'bôh tơpă boih tơdrong 'Bok Kei-Dei pơkă wă ăn kơ lu sư noh. Lăm lu sư kư̆m đei gơh pơŏm 'bơ̆r kiĕk.

I Tim 6:12

Pơtih gia lu bơngai kơdâu pơjei, bơngai bu mă kơdâu adrin tơpă jei sư, bơngai 'noh sư gô đei apah. Mă ih kư̆m lei-lăi athei adrin mă tơpă, lui mă kơjăp na jei ih, na ih gô đei iŏk tơdrong arih tơ plĕnh ling-lang. Hơtai ih lui tơm hmơm sơ̆, đe krao khan kơ ih đang boih, na ih pơma 'bơ̆t anăp đe tơpôl lơ khan ih wă tơpă lui kơ Yêsu Krist. Đơ̆ng noh sơ̆ boih 'Bok Kei-Dei ăn kơ ih arih ling-lang.

I Tes 3:3

Iĕm đei tơdrong gleh pơmat-tat đe areh kơ iĕm, na kơplah noh ki inh wơh Timôthê năm bơtho iĕm, wă kơ iĕm huay kơ achăng lê̆ tơdrong lui bơ̆n. Iĕm băt boih dôm lu bơ̆n bơngai lui gô đei tơdrong pơmat-tat đe areh kơ bơ̆n.

Êphêsô 4:27

hli kơ yang kơnê̆ pơhlŭ iĕm.

Tơdrông Tơ'bôh 6:11

Đơ̆ng noh đe ăn rim 'nu kơ lu sư ao tai kok păng khan kơ lu sư thoi âu: “Gô 'biơ̆, gô tôm kơ lu bơngai mă trŏ kơ lôch thoi iĕm năm ră roi tơdrong 'Bok Kei-Dei, lu sư lôch 'mơ̆i, na phak lu bơngai mă pơlôch iĕm noh.”

I Pet 4:13

Na iĕm athei gơ̆t lê̆ tơdrong sơ'ngon, iŏk tơdrong hiôk chơt đĕch, yua kơ Yêsu Krist sơ̆ Sư kư̆m đei tơdrong gleh truh boih. Na bơ̆n dang ei kư̆m đei tơdrong truh thoi noh mơ̆n. Thoi noh na truh năr bơ̆n tơ'bơ̆p Yêsu Krist mơsêh mơyang jur ning-mônh bơ̆n gô hiôk chơt hăm Sư.

I Pet 1:6

Iĕm băt thoi noh boih na mă iĕm đei tơdrong gleh pơmat hang nuih dang ei, iĕm athei iŏk jơhngơ̆m hiôk bĕ. Păng tơdrong gleh sư ưh kơ ling-lang ôh.

Kôlôsê 2:5

Akâu inh ataih đơ̆ng iĕm ră, mă-lei lăm jơhngơ̆m đon inh oei hơdai hăm iĕm, na inh hiôk yua kơ inh băt kơ iĕm pôm đon hăm lui kơjăp kơ Yêsu Krist.

Yo 16:33

Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm 'nĕ kơ sơ'ngon hŏ yua kơ tôm tơdrong ala teh âu thuơ kơ Inh ngăl boih.”

Tơdrông Tơ'bôh 7:14

Na inh tơl sư thoi âu: “Ơ 'bok, ih băt boih tơdrong 'noh.” Na sư roi kơ inh thoi âu: “Lu bơngai 'noh sơ̆ lu sư đei tơdrong truh đe pơm kơnê̆ kơ lu sư dêh, lu sư adrin lui truh lôch. Lu sư pih ao tơ pham Kon Triu, kok 'lơ̆ng boih.

Luka 22:32

Mă-lei Inh krao khan kơ 'Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu 'nhŏng oh ih âu wă kơ lu sư kư̆m lui kơjăp dơ̆ng.”

Tơdrông Tơ'bôh 1:9

Mă gah inh âu, anăn inh Yôhan 'nhŏng oh iĕm. Đĭ-đăng kơ bơ̆n pôm đon hăm Yêsu Krist, đĭ-đăng kơ bơ̆n mă iĕm mă inh tă ngăl đei tơdrong gleh truh, đĭ-đăng kơ bơ̆n đei minh 'nu Yêsu Krist pơgơ̆r wei-lăng. Bơ̆n adrin lui kơjăp mă khan đe areh kơ bơ̆n, thoi lĕ kơ inh đe phak oei tơ bŏl đak mă đe anăn bŏl đak Patmôs, yua kơ inh ră roi kơ đe nơ̆r 'Bok Kei-Dei păng tơdrong Yêsu.

II Tim 4:7

Thoi lĕ bơngai pơm linh tơblah sư adrin tơpă, na inh kư̆m adrin thoi noh mơ̆n đơ̆ng sơ̆ khơ̆ dang ei. Inh chu jang kơ 'Bok Kei-Dei truh tơ inh lôch, kư̆m thoi bơngai pơjei băl kơdâu sư adrin tôch kơ trong đêl đe pơkă 'mơ̆i na gơh pơdơh. Na inh kư̆m lei-lăi, inh kư̆m ưh kơ achăng lê̆ tơdrong lui inh.

Hêbrơ 12:8

Đĭ-đăng bơngai đei mĕ 'bă bơtho pơjĭ ngăl. Na dah 'Bok Kei-Dei ưh kơ đei bơtho pơjĭ iĕm, noh iĕm ưh kơ trŏ kơ kon Sư tơpă ôh.