I Kor 8:1 - Sơ̆p Hlabơar Nơ̆r 'Bok Kei-Dei

^1-2 Gah tơdrong sa tơmam đe sơmah kơ yang, iĕm khan iĕm băt tôm boih gah tơdrong noh. Mă-lei inh khan kơ iĕm, bơngai bu pơm sa pơjĭp tơmam đe sơmah kơ yang 'bơ̆t anăp đe 'nhŏng oh sư 'nao lui, lu bơngai 'noh sư ưh kơ hlôh tôm ôh gah tơdrong sa tơmam đe sơmah. Sư wă pơang akâu sư kơdih đĕch khan hlôh tôm boih. Dah sư tơchĕng mơnat kơ bôl sư 'nao lui ưh tam băt tôm tơdrong lei sư ưh kơ sa ôh tơmam đe sơmah noh, wă kơ bôl sư huay kơ jrok.

I Kor 8:1 Referans Kwoze

I Kor 8:7

Bơ̆n băt kơ rup yang ưh kơ yang tơpă ôh, mă-lei ưh kơ sĭ đĭ-đăng kơ bơngai lui ôh băt. Đei lu bơngai mơ'nah sư ưh kơ băt; hơtai sư tam mă lui sơ̆ sư kơkuh kơ rup yang, sư tơchĕng khan 'noh yang tơpă. Na dang ei sư lui kơ Yêsu Krist boih, dah sư sa 'bơm tơmam đe sơmah, jơhngơ̆m sư hli yua kơ sư juăt juăi tơdrong lui sư thoi noh boih; sư tơchĕng đe sơmah kơ yang tơpă, dah sư sa, sư khan sư pơm yoch boih.

Rom 14:3

Na bơngai mă gơh sa tôm tơdrong 'nhĕm 'nhot noh 'nĕ kơ pơjăm bơngai mă giĕng kơ sa. Bơngai mă giĕng kơ sa kư̆m 'nĕ kơ pơjăm bơngai mă gơh sa, yua kơ bơngai mă gơh sa noh 'Bok Kei-Dei kư̆m jô̆ khan kon Sư mơ̆n.

Êsai 5:21

Răm-'băm dêh kơ bơngai bu lăng kơdih akâu sư khan hơgei, pôk kơdih akâu sư khan bơngai hlôh wao!

Tơdrông Tơ'bôh 2:14

Mă-lei Inh ưh kơ lăp đon kơ iĕm 'bar pêng tơdrong âu: Yua kơ đei lăm lu iĕm mơ'nah kiơ̆ tơdrong 'bok 'Balam. 'Bok 'Balam sơ̆ sư pơchŭt 'bok 'Balăk pơhlŭ lu bơngai Isơrael sa tơmam đe soi sơmah kơ rup yang păng wă kơ lu sư pơm pơyô kư̆ kă.

I Kor 8:4

Thoi noh na gah tơdrong sa tơmam đe sơmah kơ yang bơ̆n băt mơ̆n rup yang ưh kơ sĭ yang tơpă ôh. Mă tơpă bơ̆n băt kơ minh 'nu đĕch Kră Yang Tih Hloh.

Rom 15:14

Ơ 'nhŏng oh bơngai Rôm, inh băt mơ̆n iĕm đei đon lui tơpăt na iĕm băt tơgŭm dih băl păng inh băt kơ iĕm hlôh tôm tơdrong 'Bok Kei-Dei na gơh bơtho dih băl tơduă iĕm.

Êphêsô 4:16

na lu bơ̆n thoi lĕ kơ akâu hăm jơ̆ng ti Sư. Yua kơ Sư na đĭ kơ lơ̆m trôm akâu bơ̆n jing pơgơ̆p băl, na mưh akâu bơ̆n sư wă jang na sư jang hrơ̆p hơdai hloi. Na lơ̆m trôm akâu bơ̆n rai đunh rai wơ̆ băt 'mêm mơnat dih băl.

I Kor 15:34

Iĕm athei tơbral tơdrong yoch na jing 'lơ̆ng 'nĕ pă pơm tơdrong yoch đơ̆ng âu tơ anăp. Lu iĕm mơ'nah ưh kơ hlôh wao tơdrong 'Bok Kei-Dei thoi yơ na iĕm mơlâu ưh?

Jang 15:29

Iĕm 'nĕ kơ sa tơmam đe sơmah kơ yang kơnê̆ yua kơ bơ̆n rơgoh boih. 'Nĕ kơ sa pham dôm sem bơ̆n rong dah sem bri. Hơdrol kơ wă pơm tơmam sa bơ̆n athei kăt dah 'bet tŭk lê̆ pham sư 'noh; păng 'nĕ ngôi pơyô kư̆ kă. Yah iĕm pơm kiơ̆ kơ nơ̆r pơkă lăm kơthơ âu lei trŏ tơpă. Oei kơ iĕm mă 'lơ̆ng.”

Êsai 47:10

Ih gơnang tơdrong ih pơm kơnê̆ ih Ih khan: ‘Ưh kơ đei bu 'bôh inh.’ Tơdrong gơh hơgei hlôh wao ih gô pơm kơ ih wơ̆l jrok. Ih pơma lăm jơhngơ̆m: ‘Inh âu, 'nguaih kơ inh ưh kơ đei bơngai bu.’

Jo 25:2

Lu kon drŏ-kăn 'nâu pơtơm kon pơlei Isơrael et sa pơm yang hơdai lu sư; kon pơlei Isơrael et sa păng drap kơkuh kơ yang lu sư.

I Kor 10:28

Mă-lei dah đei bơngai lui 'bơ̆t noh sư khan: “'Nhĕm 'noh 'nhĕm sư sơmah kơ yang.” Dah iĕm kơtơ̆ng thoi noh lei iĕm 'nĕ pă sa, yua kơ bôl bơ̆n tơchĕng yoch dah bơ̆n sa.

Jang 21:25

Gah lu khŭl tơmoi nai lui kơ Kră Yang Yêsu, nhôn chih bơtho kơ lu sư boih khan kơ lu sư kơ̆m kơ sa tơmam đe pơyơ̆r kơ yang kơnê̆, kơ̆m kơ sa pham dôm sem bơ̆n rong dah sem bri; hơdrol kơ bơ̆n wă pơm tơmam sa bơ̆n athei kăt dah 'bet tŭk lê̆ pham sư; păng 'nĕ kơ ngôi pơyô kư̆ kă.”

Jang 15:10

Kơlih kơ kiơ iĕm wă pơlong 'Bok Kei-Dei? Iĕm wă kơ lu bơngai tơmoi mă lui ei pŭ tơdrong anat kơ răk dôm lu tơdrong Môis pơkă. Mă-lei tơdrong 'noh lu 'bok kơdră bơ̆n pŭ ưh kơ kĕ ôh păng bơ̆n kư̆m ưh kơ kĕ mơ̆n.

Tơdrông Tơ'bôh 2:20

Mă-lei minh tơdrong âu Inh ưh kơ lăp đon kơ iĕm, minh tơdrong iĕm kuă kơ pơpuh yă Jesebel bơngai kơnê̆ dêh. Sư khan sư bơngai pơtruh nơ̆r 'Bok Kei-Dei, mă-lei sư oei pơhlŭ lu đĭch đam Inh pơm pơyô ngôi kư̆ kă, sa tơmam đe soi sơmah kơ rup yang.

Kôlôsê 2:18

Lu bơngai 'noh, lu sư athei bơ̆n kiơ̆ sư iŏk đon ala kơ đe. Lu sư khan lu sư đei tơdrong apo tơ'bôh kơ lu sư đơ̆ng plĕnh wă kơ bơ̆n kiơ̆ lu sư kơkuh kơ linh jang kiơ̆ tơdrong giĕng lu sư, na mưh lu sư 'bôh bơ̆n ưh kơ kiơ̆ lu sư, lu sư khan bơ̆n yoch boih. Mă-lei iĕm 'nĕ kơ lui kơ tơdrong lu sư pơhlŭ noh hŏ. Lu sư pơm kiơ̆ kơ đon kon bơngai tơchĕng đĕch păng wă pơang akâu lu sư kơ đe.

I Kor 14:20

Ơ 'nhŏng oh, gah tơdrong iĕm 'maih pơma nơ̆r hlĭch, iĕm athei tơchĕng kiơ̆ đon kră, 'nĕ pă kiơ̆ thoi đon bơngai nge. Bơ̆n băt kơ lu bơngai nge ưh kơ gơh pơm kơnê̆ kơ đe, dah bơ̆n kiơ̆ thoi noh 'lơ̆ng mơ̆n, mă-lei bơ̆n 'nĕ kơ kiơ̆ kơ đon sư tơchĕng, yua kơ sư ưh kơ hlôh ôh.

I Kor 5:6

Tơdrong iĕm pơang akâu kơdih ưh kơ 'lơ̆ng ôh. Iĕm ưh kơ băt ôh hă, tơdrong yoch thoi lĕ kơ 'buih pông? Bơ̆n pơjrâu kơ bre sư 'bĕng tơpŭng lăp tŏ sĕt đĕch mă-lei sư pông đĭ kơ 'bĕng tơpŭng.

I Kor 5:2

Sư pơm thoi noh, liơ lu iĕm mơ'nah oei pơma pơang kơ đe khan iĕm oei lui kơjăp? Sư pơm thoi noh trŏ kơ iĕm ơh klai tơpă. Wă kơ mă trŏ iĕm athei pơpuh sư weh tơ nai đĕch 'lơ̆ng hloh.

I Kor 4:18

Đei lăm lu iĕm mơ'nah pơma pơang akâu kơdih kơ đe yua kơ lu sư ngêh kơ inh ưh pă đei năm tơ iĕm boih.

I Kor 4:10

Đe lăng nhôn jang tơdrong Yêsu Krist thoi bơngai kơtul, đe lăng iĕm thoi lĕ bơngai hơgei tôm tơdrong Yêsu Krist. Nhôn bơngai tơrăn, iĕm bơngai pran. Đe pơjĭp pơjăm nhôn, gah iĕm đe ư-ang.

I Kor 1:5

Yua kơ đơ̆ng tơdrong iĕm lui na iĕm jing băt tôm tơdrong, iĕm hơgei kơ bơtho, iĕm kư̆m hlôh tơdrong Sư mơ̆n.

Rom 14:22

Mă tơdrong sa et, mă tơdrong kiơ, bơ̆n tơchĕng gơh, mă bơ̆n 'nĕ roi kơ đe, gô mơ̆ng kơ 'Bok Kei-Dei đĕch bơtho bơ̆n. Dah bơ̆n tơchĕng trŏ lei lăm jơhngơ̆m bơ̆n mơn kơ hiôk ưh kơ hli kơ yoch ôh.

Rom 14:14

Yua kơ inh lui kơ Yêsu Krist păng inh gơnang kơ Sư tơpă, na inh băt tôm tơdrong tơmam sa, ưh kơ đei tơmam sa ayơ bơ̆n sa khan yoch. Đơ̆ng đon bơ̆n tơchĕng khan yoch đĕch na jing yoch.

Rom 14:10

Yua kơ thoi noh na lơliơ iĕm gơh sek tơlang 'nhŏng oh khan bơngai yoch bơngai ưh? Lơliơ iĕm gơh pơjăm sư lĕ? Ning-mônh đĭ-đăng bơ̆n gô dơ̆ng 'bơ̆t anăp 'Bok Kei-Dei sek tơlang ngăl.

Rom 12:16

Bơ̆n athei kiơ̆ kơ jơhngơ̆m đon bôl buăl lăp đon, 'nĕ pơang akâu bơ̆n kơ sư; mă loi bơ̆n athei tơbôl hăm lu bơngai dơnuh, pơma dơnuh pơlung sư mă hiôk.

Rom 11:25

Ơ 'nhŏng oh, inh ưh kơ wă kơ iĕm pơang kơ đe khan iĕm bơngai hơgei hloh kơ bơngai Isơrael ôh. Na dang ei inh wă tơbăt ăn kơ iĕm minh tơdrong âu mă 'Bok Kei-Dei tam mă tơbăt ăn kơ bơ̆n đơ̆ng sơ̆, tơdrong noh thoi âu: Lu bơngai Isơrael mơ'nah kuă tơpă boih lui kơ 'Bok Kei-Dei, noh na Sư ăn kơ lu bơngai mă kuă noh jing arăng kơ̆l khŏm khŏm truh tơ Sư krao tôm kơ lu khŭl nai bu mă Sư rơih iŏk lui kơ Sư.

Rom 14:19

Yua kơ thoi noh na bơ̆n athei adrin 'biơ̆ tơdrong pơm hiôk kơ bôl buăl hăm 'nhŏng oh bơ̆n kơdih, rai băt tơgŭm băl lui kơjăp.

I Kor 4:6

Ơ 'nhŏng oh, dôm tơdrong inh bơtho pơtih gia hei, inh pơma 'bơm anăn inh păng anăn Apôlê đĕch, inh wă kơ iĕm huay kơ pơang kơ kon bơngai mă bu bu kư̆m thoi sơ̆p hla bơar 'Bok Kei-Dei khan. Thoi noh iĕm 'nĕ pơư bơngai âu pơchê bơngai to.

I Kor 10:15

Inh băt kơ iĕm bơngai hlôh wao, na dang ei iĕm gô mơ̆ng păng tơchĕng tơdrong inh pơma: