II Sam 17:23 - Sơ̆p Hlabơar Nơ̆r 'Bok Kei-Dei

²³ Ahithôphel 'bôh đe ưh kơ wă kiơ̆ tơdrong sư pơđâu, na hao hloi aseh iĕ sư brŏk tơ hnam pơlei sư kơdih tơ Gilô. Đang kơ sư hơmet dôm tơdrong jang lăm hnam dơnŏ sư keh boih, sư hrek hơlŏng kơdih lôch. Đe 'bŭ sư hơdai tơ lăm bơsat 'bă sư.

II Sam 17:23 Referans Kwoze

Mathiơ 27:5

Na Juđa năm klơ̆m lê̆ jên noh tơ hnam akŭm 'Bok Kei-Dei tơm, brŏk hrek hơlŏng pơlôch akâu sư kơdih.

II Pot 20:1

Lăm kơplah chăl noh, Hesekia jĭ dêh wă jê̆ lôch. Êsai bơngai khan lê̆ adrol kon drŏ-nglo Amôt năm ngôi lăng Hesekia păng khan: “Kră Yang khan thoi âu: Ih hơmet bĕ tơdrong jang hnam ih, yua kơ ih gô lôch, ih ưh kơ klaih đơ̆ng tơdrong jĭ 'nâu ôh.”

II Sam 15:12

Kơplah Apsalôm wă pơyơ̆r tơmam soi, wơh đe năm krao Ahithôphel sư bơngai hơgei tơgŭm chă pơđâu kơ Đawit oei tơ pơlei Gilô, pơlei sư hơdai. Lu bơngai chă đon pơm plơ̆ rai pran, păng khŭl kon pơlei năm kiơ̆ Apsalôm rai đunh rai lơ.

Horiso 5:10

Ơ Kră Yang, phak lu sư bĕ; Ăn kơ lu sư pơ̆k huŏng tơ lăm tơdrong lu sư pơđâu; Pơpuh bĕ lu sư yua kơ tơdrong yoch kơnê̆ lu sư lơ tơpă, Yua kơ lu sư blah Ih.

I Pot 16:18

Lăp Simri 'bôh đe wang tăp dăr kơ pơlei bơih na sư mơ̆t tơ lăm kơđông hnam pơtao mă kơjăp dêh, na sư soh hnam pơtao păng akâu sư lôch hloi lăm noh.

II Sam 15:31

Đe roi ăn kơ Đawit: “Ahithôphel kư̆m minh khŭl iung blah hơdai hăm Apsalôm.” Đawit krao apinh: “Ơ Kră Yang! Apinh Ih pơm ăn lu tơdrong tơchĕng Ahithôphel wă pơm jing kơtul kơwao.”

Tơdrông Pơđơk 19:3

Bơngai kơwao kư̆m gô tơhiong trong sư. Mă-lei đei jơhngơ̆m sư hil kơ Kră Yang.

Tơdrông Pơđơk 16:18

Pơang năm adrol, hor ba tơdrong răm; Pơang pơrŏ năm adrol, pơ̆k huŏng đơ̆ng rŏng.

Horiso 55:23

Ơ Kră Yang 'Bok Kei-Dei ih boih gô. Klơ̆m lu bơngai pơm kơnê̆ chă pơhlŭ đe. Lu sư ưh pă đei arih truh minh puăt chăl đêl pơkă. Gah inh gô lui gơnang kơ Ih.

Jop 31:3

Hăm trŏ lu bơngai pơm kơnê̆ tơ'bơ̆p tơdrong gleh truh? Lu bơngai pơm kơnê̆ đei pơmat-tat?

II Sam 16:23

Lăm kơplah noh đe lăng tơdrong tơchĕng Ahithôphel nhen thoi nơ̆r pơma đơ̆ng tơ'ngla Kră Yang 'Bok Kei-Dei. Lu tơdrong tơchĕng Ahithôphel, mă pơtao Đawit, păng Apsalôm, tă kơ mơ̆ng kiơ̆ nơ̆r Ahithôphel thoi noh ngăl.

II Sam 17:22

Đawit păng đĭ-đăng lu bơngai kiơ̆ sư tŏk hlôi kơ đak Krong Jôrđăn. Lăp 'brưch hơdah pơgê ưh pă đei minh 'nu bơngai bu mă ưh tam tŏk hlôi kơ đak Krong.

Êsai 38:1

Kơplah noh pơtao Hesekia jĭ dêh wă jê̆ lôch; Êsai 'bok khan lê̆ adrol kon drŏ-nglo Amôt năm mơ̆t roi kơ pơtao păng khan: “Kră Yang khan thoi âu: Hơmet bĕ dôm tơdrong jang ih lăm hnam ih, yua kơ ih wă lôch, ưh pă arih bơih.”

Horiso 109:20

Rŏ kơ Kră Yang pơm 'mong thoi noh kơ lu bơngai mă pơm kơnê̆ kơ inh. Păng lu bơngai mă pơma kơnê̆ kơ bơhngol inh.